தான் தானாக வாழத் தெரிந்த அந்த அவளுக்கு...உலக மகளிர் தின வாழ்த்துக்கள்

சென்னை : உலக மகளிர் தினமான இன்று, பெண்கள் அனைவருக்கும் மகளிர் தின நல்வாழ்த்துக்கள். தன்னை சுயமாக நிலைநிறுத்திக் கொள்ள ஒவ்வொரு நொடியும் போராடும் பெண்களுக்கு இந்த கவிதை சமர்ப்பணம்...

எனக்கு ஒருத்தியை தெரியும்...

அவளுக்கு தன்மான உணர்வு அதிகம்...

உலகம் அதை தலைக்கணம் என்றது.

அவளுக்கு உரிமை உணர்வு அதிகம்...

உலகம் அவளை வாயாடி என்றது.

அவளுக்கு ஆர்வம் அதிகம்...

உலகம் அதை ஆணவம் என்றது.

அவளுக்கு திறமை அதிகம்...

உலகம் அதை திமிர் என்றது.

அதெற்கெல்லாம் அஞ்சி நின்றுவிட்டால்....

அவள் அவளில்லையே...!!

எனக்கு இன்னொருத்தியை தெரியும்...

குடும்பத்திற்காக எதையும் செய்ய துணிந்தவள் அவள்...

உலகம் அவளை குணம் கெட்டவள் என்றது.

சாதிப்பதற்காக சாஸ்திரங்களை தூக்கி எறிந்தவள் அவள்...

உலகம் அவளை குறையுடையவள் என்றது.

உரிமைக்காக உடைமைகளை இழந்தவள் அவள்...

உலகம் அவளை முட்டாள் என்றது.

சமூகத்திற்காக தன்னையே தியாகம் செய்தவள் அவள்...

உலகம் அவளை அடங்காதவள் என்றது.

அதெற்கெல்லாம் அஞ்சி நின்று விட்டால்....

அவள் அவளில்லையே...!!

எனக்கு மற்றொருத்தியையும் தெரியும்.

அடுத்தவர் நலம் காக்க அமைதி காக்க தெரிந்தவள் அவள்...

உலகம் அவளை ஊமை என்றது.

கணவனுக்காக தன்னையே தொலைத்தவள் அவள்...

உலகம் அவளை பழமைவாதி என்றது.

குழந்தைகளை மேதையாக்க பேதையானவள் அவள்...

உலகம் அவளை ஒன்றும் தெரியாதவள் என்றது.

உறவுகளையே தனது உலகமாக்கிக் கொண்டவள் அவள்...

உலகம் அவளை தகுதியில்லாதவள் என்றது.

அதெற்கெல்லாம் அஞ்சி நின்றுவிட்டால்...

அவள் அவளில்லையே...!!

எனக்கு தெரிந்த அந்த அவளை...அந்த ஒருத்தியை...

உங்களுக்கும் தெரியும்.

தனக்கான பாதையை சரியாக வகுத்த பின்...

தான் தானாகவே வாழ தெரிந்த அந்த ஒருத்தியை...

அந்த ஒருத்தியாக...வாழ்த்துகிறேன்...வணங்குகிறேன்...!!

நீங்களும் அவளை...அந்த ஒருத்தியை...வாழ்த்துங்கள்...வணங்குங்கள்...!!

இயலவில்லையா?

குறைந்தபட்சம் வழிவிடுங்கள்...அவள் முன்னேறட்டும்...!!

- ஆரா அருணா

English summary

International Women's day kavithai dedicated to all women