எதிர்க்கட்சி அந்தஸ்துக்கே ஆபத்தா? அது மட்டும் நடந்தால் அதிமுகவிற்கு செக்! எடப்பாடிக்கு போன ரெட் நோட்

சென்னை: தமிழக அரசியல் களத்தில் அரை நூற்றாண்டு காலமாக ஆளுங்கட்சி அல்லது பிரதான எதிர்க்கட்சி என்கிற கம்பீரத்தோடு வலம் வந்த அஇஅதிமுக, இப்போது தன் அரசியல் வரலாற்றிலேயே மிக இக்கட்டான ஒரு சூழலைச் சந்தித்து நிற்கிறது. வரவிருக்கும் சட்டமன்றத் தேர்தலுக்கான முன்கூட்டிய கருத்துக்கணிப்புகள், அக்கட்சிக்கு அபாயச் சங்கை ஊதியுள்ளன. அதாவது அதிமுக எதிர்க்கட்சி அந்தஸ்தை இழக்க கூட வாய்ப்புகள் உள்ளதாக சில சர்வேக்கள் சொல்கின்றன.

தடுமாறும் கோட்டை: எதிர்க்கட்சி அந்தஸ்து பறிபோகுமா?

லோக் போல்' (Lok Poll) மற்றும் 'போல் ட்ராக்கர்' (Poll Tracker) ஆகிய இரண்டு ஏஜென்சிகளுமே ஆளுங்கட்சியான திமுக கூட்டணிக்கே வெற்றி வாய்ப்பு பிரகாசமாக இருப்பதாகத் தெரிவிக்கின்றன.

லோக் போல் கணிப்பு: திமுக கூட்டணி 181 முதல் 189 இடங்களைக் கைப்பற்றி அசுர பலத்துடன் ஆட்சியைத் தக்கவைக்கும் என்கிறது. இக்கூட்டணியின் வாக்கு வங்கி 40.1 சதவீதமாக இருக்கும் என மதிப்பிடப்பட்டுள்ளது.

போல் ட்ராக்கர் கணிப்பு: இதுவும் திமுக கூட்டணிக்குச் சாதகமாகவே உள்ளது. 172 முதல் 178 இடங்கள் வரை திமுக கூட்டணிக்குக் கிடைக்கும் என்றும், சுமார் 42.7 சதவீத வாக்குகளை அவர்கள் அறுவடை செய்வார்கள் என்றும் கணிக்கப்பட்டுள்ளது. லோக் போல் கணிப்பின்படி 38 - 42 இடங்களும், போல் ட்ராக்கர் கணிப்பின்படி 46 - 52 இடங்களும் மட்டுமே அஇஅதிமுக கூட்டணிக்குக் கிடைக்க வாய்ப்புள்ளது.

மேற்கண்ட கருத்துக்கணிப்புகளின்படி, அஇஅதிமுக தலைமையிலான கூட்டணி வெறும் 38 முதல் 52 இடங்களுக்குள் சுருங்கிவிடும் எனக் கணிக்கப்பட்டுள்ளது. இது ஒருபுறமிருக்க, முதல் தேர்தலிலேயே சுமார் 20 சதவீதத்திற்கும் அதிகமான வாக்குகளை நடிகர் விஜய்யின் 'தமிழக வெற்றி கழகம்' அறுவடை செய்யும் என்ற தகவல், எடப்பாடி பழனிசாமி முகாமை நிலைகுலையச் செய்துள்ளது.

ஒருவேளை இந்த வாக்குச் சரிவு தொடர்ந்தால், சட்டசபையில் பிரதான எதிர்க்கட்சி என்கிற அந்தஸ்தைக் கூட அஇஅதிமுக இழக்க நேரிடும் என்ற விவாதம் இப்போதே அரசியல் ரத்தத்தின் ரத்தங்களிடையே புகைச்சலைக் கிளப்பியுள்ளது.

ஏன் இந்தச் சறுக்கல்? - கள ஆய்வு சொல்லும் உண்மைகள்

அஇஅதிமுகவின் இந்தச் சரிவுக்குப் பின்னால் இருக்கும் முக்கியக் காரணங்களாக அரசியல் விமர்சகர்கள் முன்வைப்பவை:

உட்கட்சிப் பூசலும் பிளவுகளும்: கட்சி பிளவுபட்டது முதல் ஓ.பி.எஸ், டி.டி.வி தினகரன் எனப் பல முனைகளில் வாக்குகள் சிதறுவது கட்சிக்குக் கடும் பலவீனமாக மாறியுள்ளது.

தென் மாவட்டங்களில் தொய்வு: ஒரு காலத்தில் அஇஅதிமுகவின் அசைக்க முடியாத கோட்டையாக இருந்த தென் மாவட்டங்களிலும், டெல்டா பகுதிகளிலும் கட்சி தனது பிடியை இழந்து வருவதாகக் கருத்துக்கணிப்புகள் எச்சரிக்கின்றன.

கூட்டணிச் சிக்கல்: பாஜகவுடனான கூட்டணி சிறுபான்மையின வாக்குகளை ஒட்டுமொத்தமாக திமுக பக்கம் தள்ளியுள்ளது. அதேசமயம், நடுநிலை வாக்குகளை விஜய் தன் பக்கம் இழுத்துக் கொள்கிறார்.

விஜய்யின் எழுச்சியும் - இலையின் வீழ்ச்சியும்!

எதிர்க்கட்சி வரிசையில் அமர வேண்டிய வாக்குகளை 'தமிழக வெற்றி கழகம்' தட்டிப்பறிப்பதுதான் அஇஅதிமுகவிற்குப் பெரும் தலைவலியாக உருவெடுத்துள்ளது. இளைஞர்கள் மற்றும் 'மாற்றம்' வேண்டும் என நினைப்பவர்களின் முதல் சாய்ஸாக விஜய் உருவெடுத்திருப்பது, அஇஅதிமுகவின் வாக்கு வங்கியில் பெரும் ஓட்டையைப் போட்டுள்ளது.

"கட்சியின் தொண்டர்களிடையே நிலவும் உற்சாகமின்மையும், வலுவான இரண்டாம் கட்டத் தலைவர்கள் இல்லாததும் அடிமட்டத் தொண்டர்களைக் குழப்பத்தில் ஆழ்த்தியுள்ளது" என்கிறது ஒரு கள ஆய்வு.

மீண்டு வருமா 'இரட்டை இலை'?

எம்.ஜி.ஆர், ஜெயலலிதா போன்ற ஆளுமைகளால் வளர்க்கப்பட்ட இந்த இயக்கம், இதற்கு முன்பும் பல சோதனைகளைச் சந்தித்துள்ளது. ஆனால், இந்த முறை சவால் என்பது வெறும் தேர்தல் தோல்வி மட்டுமல்ல, தன் 'இருப்பினை'த் தக்கவைத்துக்கொள்வதுதான்.

எடப்பாடி பழனிசாமி அதிரடியான வியூகங்களை வகுத்து, பிரிந்து கிடக்கும் சக்திகளை ஒன்றிணைக்கத் தவறினால், தமிழக அரசியலில் 'இரண்டாவது பெரிய கட்சி' என்கிற அடையாளத்தை அஇஅதிமுக இழக்கும் சூழல் உருவாகலாம்.

துணிச்சலான முடிவுகளும், தொண்டர்களைத் தட்டியெழுப்பும் வேகமும் மட்டுமே இப்போதைக்கு இலைக்குத் தேவைப்படும் உயிர்நீர்!

English summary

Is AIADMK Losing Its Grip? Pre-Poll Trends Suggest a Threat to Principal Opposition Status