செய்யூர் தான் சென்னையின் இரண்டாவது விமான நிலையம்? முதல்வர் விஜய் தேர்வு செய்ததன் பின்னணி

சென்னை: சென்னையின் இரண்டாவது விமான நிலையத்திற்கான சிறந்த தேர்வாக செய்யூர் உருவெடுத்துள்ளது. பரந்தூர் பரிசீலனையில் இல்லாத பட்சத்தில், மற்ற அனைத்து விருப்பங்களிலும் இதுவே மிகச் சிறந்ததாகக் கருதப்படுகிறது. சென்னையின் இரண்டாவது விமான நிலையத்தை அமைப்பதற்கு, செங்கல்பட்டு மாவட்டத்தில் (சென்னையிலிருந்து சுமார் 90 கி.மீ தொலைவில்) உள்ள செய்யூர் பகுதிக்குத் தமிழக அரசு முன்னுரிமை அளித்துத் தேர்வு செய்துள்ளது. ஏற்கனவே கைவிடப்பட்ட மின் திட்டத்திற்காகக் கையகப்படுத்தப்பட்ட 623 ஏக்கர் நிலம் மற்றும் சுமார் 300 ஏக்கர் புறம்போக்கு நிலம் ஆகியவை அரசின் வசம் உள்ளதால், நிலம் கையகப்படுத்துவதில் உள்ள சிக்கல்கள் பெருமளவு குறைகின்றன.

தமிழக அரசு தேர்வு செய்த இடங்களில் கும்மிடிப்பூண்டியில் உள்ள மனல்லூர் மற்றொரு மாற்று இடமாக இருந்தாலும், அது பழவேற்காடு ஏரிக்கு மிக அருகில் இருப்பதால் சுற்றுச்சூழல் சார்ந்த கவலைகள் எழுகின்றன. விமான நிலையத்திற்கான இடத்தை இறுதி செய்வது என்பது, இந்திய விமான நிலைய ஆணையத்தின் சாத்தியக்கூறு ஆய்வு அறிக்கை மற்றும் பாதுகாப்பு அமைச்சகத்தின் வான்வெளிப் பயன்பாட்டு அனுமதி ஆகியவற்றைப் பொறுத்தே அமையும்.

செங்கல்பட்டு மாவட்டத்தில் உள்ள செய்யூர் பகுதி, முன்மொழியப்பட்ட இரண்டாவது விமான நிலையத்தை அமைப்பதற்கான தமிழக அரசின் முதல் தேர்வாக இருக்கக்கூடும் என்று அரசு வட்டாரங்கள் 'டைம்ஸ் ஆஃப் இந்தியா' ஊடகத்திடம் தெரிவித்துள்ளதாகச் செய்தி வெளியிடப்பட்டுள்ளது.

பரந்தூர் நிலம் என்னாகும்

'டைம்ஸ் ஆஃப் இந்தியா' நாளிதழ் வெளியிட்டுள்ள செய்தியின்படி, "பரந்தூரில் கையகப்படுத்தப்பட்ட நிலங்களை அவற்றின் முந்தைய உரிமையாளர்களிடமே திருப்பி அளிப்பதற்கான வழிகள் குறித்தும் அரசு ஆலோசித்து வருகிறது. அடையாளம் காணப்பட்ட 3,874 ஏக்கர் பட்டா நிலங்களில் 1,802 ஏக்கர் நிலத்தை முந்தைய அரசு கையகப்படுத்தியிருந்த பரந்தூர் விமான நிலையத் திட்டத்தை ரத்து செய்வதாக, ஆகஸ்ட் 24 அன்று முதல்வர் ஜோசப் விஜய் அறிவித்தார். இந்திய விமான நிலைய ஆணையத்தின் சாத்தியக்கூறு ஆய்வுக்குத் தமிழக அரசால் சமீபத்தில் தேர்வு செய்யப்பட்ட மற்றொரு இடம் திருவள்ளூர் மாவட்டம், கும்மிடிப்பூண்டியில் உள்ள மனல்லூர் ஆகும்.

செய்யூர் ஏன் சிறந்த தேர்வு

செய்யூர் குறித்து அதிகாரி ஒருவர் கூறுகையில், "சென்னையிலிருந்து 90 கி.மீ தொலைவில் உள்ள செய்யூரில், மத்திய அரசுக்காக 'தமிழ்நாடு பவர் ஃபைனான்ஸ் கார்ப்பரேஷன்' மூலம் மின் திட்டத்திற்காக முன்பு கையகப்படுத்தப்பட்ட 623 ஏக்கர் நிலம் அரசிடம் உள்ளது. மேலும் சுமார் 300 ஏக்கர் புறம்போக்கு நிலமும் அங்கு உள்ளது. முந்தைய ஆட்சிகளின் இறுதிக்கட்டத்தில் அந்த மின் திட்டம் கைவிடப்பட்டது. எனவே, விமான நிலையத் திட்டத்திற்குச் செய்யூர் பரிசீலிக்கப்படுகிறது," என்றார்.

கும்மிடிப்பூண்டி வாய்ப்பில்லை

மற்றொரு மூத்த விமான நிலைய அதிகாரி கும்மிடிப்பூண்டி இடம் குறித்துக் கூறுகையில், "மாற்றுத் தேர்வாக உள்ள கும்மிடிப்பூண்டி மனல்லூர் பகுதி, பழவேற்காடு ஏரிக்கு அருகில் இருப்பதால் சுற்றுச்சூழல் கவலைகளை ஏற்படுத்தக்கூடும். இருப்பினும், இந்திய விமான நிலைய ஆணையம் தனது சாத்தியக்கூறு ஆய்வு அறிக்கையைச் சமர்ப்பித்த பின்னரே இறுதி முடிவு தெரியவரும். தற்போதைய விமான நிலையத்தால் இன்னும் சில ஆண்டுகளுக்குக் கணிக்கப்பட்ட விமானப் போக்குவரத்தைக் கையாள முடியும். ஆனால் மேலும் விரிவாக்கம் செய்ய முடியாது" என்றார்.

சென்னை மீனம்பாக்கம் விமான நிலையம்

சென்னை விமான நிலையம் ஆண்டுக்கு 30 மில்லியன் பயணிகளைக் கையாளும் திறன் கொண்டது. சென்னை விமான நிலையத்தின் மூன்றாவது முனைய மேம்பாட்டுப் பணிகள் மூலம், மொத்தத் திறன் ஆண்டுக்கு 35 மில்லியன் பயணிகளாக உயரும் என்று எதிர்பார்க்கப்படுகிறது. மேலும், ஆண்டுக்கு 20 மில்லியன் பயணிகளைக் கையாளும் கூடுதல் திறன் கொண்ட ஒரு செயற்கைக்கோள் முனையத்தையும் இந்திய விமான நிலைய ஆணையம் முன்மொழிந்துள்ளது.

செயற்கைகோள் முனையம்

செயற்கைக்கோள் முனையம் தற்போதைய விமான நிலைய வளாகத்திற்குள்ளேயே கட்டப்படவுள்ளதால், அதற்குத் கூடுதல் நிலம் கையகப்படுத்த வேண்டிய அவசியம் இருக்காது. "தேசிய நெடுஞ்சாலையிலிருந்து விமான நிலையத்தை அணுகுவதற்கு உயர்த்தப்பட்ட விரைவுச் சாலை வழித்தடம் ஒன்றை நாங்கள் திட்டமிட்டு வருகிறோம்," என்று விமான நிலைய அதிகாரி தெரிவித்தார்.

செய்யூர் நிலம் எப்படி?

சென்னையின் புதிய விமான நிலையத்திற்காக, கைவிடப்பட்ட 4,000 மெகாவாட் திறன் கொண்ட 'செய்யூர் அல்ட்ரா மேகா' மின் திட்டத்தின் இடத்தை அரசு இப்போது பரிசீலித்து வருகிறது. அந்த மின் திட்டம் கைவிடப்பட்ட நிலையில், அங்கு ஒரு சிப்காட் தொழிற்பூங்காவை அமைக்க திமுக அரசு முடிவு செய்திருந்தது. மின் நிலையத் திட்டத்திற்காக அரசு அங்கு சுமார் 900 ஏக்கர் நிலத்தைக் கையகப்படுத்தியுள்ளது. இந்த இடம் மீனம்பாக்கத்திலிருந்து சுமார் 100 கி.மீ. தொலைவில் உள்ளது.

அதிவிரைவுச் சாலை

ஒருவேளை செய்யூரில் விமான நிலையம் அமைந்தால், அது சென்னையிலிருந்து 100 கி.மீ என்பதால் மீனம்பாக்கம் விமான நிலையம் எப்போதும் போலவே செயல்படும். செய்யூர் மற்றும் மீனம்பாக்கத்தை இணைக்கும் வகையில் வெளிவட்டச் சாலை (Outer Ring Road) வழியாகச் செய்யூர் வரை பஸ் பே (Bus bay) அமைக்க வாய்ப்பு அதிகம். ஏற்கனவே கிளாம்பாக்கம் வரை வெளிவட்டச் சாலை இருக்கிறது. தேசிய நெடுஞ்சாலை ஆணையம் கிளாம்பாக்கம் முதல் பரனூர் (செங்கல்பட்டு) வரை உயர்மட்டப் பாலம் அமைக்கிறது. அங்கிருந்து அதிவேகமாகச் செல்லும் வகையில் செய்யூருக்குச் சாலை அமைத்தால் ஒரு மணி நேரம் முதல் ஒன்றரை மணி நேரத்தில் செய்யூர் போய்விட முடியும்.

புதுச்சேரி, கடலூர் வளரும்

அதுமட்டுமல்லாமல், தற்போதைய நிலையிலேயே மறைமலைநகர், மகேந்திரா சிட்டி, ஒரகடம், ஸ்ரீபெரும்புதூரில் இருந்து வெறும் ஒரு மணி நேரம் முதல் ஒன்றரை மணி நேரத்திலேயே செய்யூர் போய்விட முடியும். எனவே சரக்குப் போக்குவரத்து (Cargo) வசதிகளுக்குப் பிரச்சினையில்லை. அதேபோல் அருகிலேயே 35 கி.மீ தூரத்தில் புதுச்சேரி இருக்கிறது. எனவே புதுச்சேரி, கடலூர், மதுராந்தகம் பகுதிகள் மிகப்பெரிய அளவில் தொழில் வளர்ச்சி பெறவும் வாய்ப்புள்ளது. காலம் காலமாக ஏக்கத்துடன் இருக்கும் விழுப்புரமும் தொழில் வளர்ச்சி பெறச் செய்யூர் விமான நிலையம் மிகப்பெரிய உதவியாக இருக்கும். புதுச்சேரி துறைமுகம், செய்யூர் விமான நிலையம் அருகருகே இருப்பதால் எளிதாகச் சரக்குகளைக் கையாளவும் முடியும்.

English summary

Cheyur has emerged as the best choice for Chennai's second airport. If Parandur is not under consideration, this is regarded as the superior option among all others. Let us examine in detail the background behind the Chief Minister's selection.