சத்தமே இன்றி.. திமுகவை வீழ்த்திய Gen Z புரட்சி.. விஜய் வெற்றிக்கு காரணமான அந்த விஷயம்! பின்னணி
சென்னை: தமிழக அரசியல் வரலாற்றில் இதுவரை கண்டிராத ஒரு மாபெரும் மாற்றம் இன்று அரங்கேறி வருகிறது. 2026 சட்டமன்றத் தேர்தல் வாக்கு எண்ணிக்கையில், ஆரம்பம் முதலே தமிழக வெற்றிக் கழகம் (TVK) யாரும் எதிர்பார்க்காத வகையில் பெரும் முன்னிலை பெற்று வருகிறது. தற்போதைய நிலவரப்படி, விஜய் தலைமையிலான தவெக 108 இடங்களிலும், ஆளும் திமுக 69 இடங்களிலும், அதிமுக 64 இடங்களிலும் முன்னிலை வகிக்கின்றன.
இந்தத் தேர்தல் வெற்றியை வெறும் அரசியல் மாற்றமாக மட்டும் பார்க்காமல், தமிழகத்தின் 'ஜென்-இசட்' (Gen Z) தலைமுறையின் புரட்சியாகவே அரசியல் விமர்சகர்கள் பார்க்கின்றனர்.
சமீபத்திய ஆண்டுகளில் உலகையே வியக்க வைக்கும் அளவிற்கு இளைஞர் புரட்சி உலகம் முழுக்க அரங்கேறின. அரசு வேலைவாய்ப்புகளில் இருந்த பாரபட்சமான ஒதுக்கீட்டு முறைக்கு எதிராக மாணவர்கள் தொடங்கிய இந்தப் போராட்டம், மிக குறுகிய காலத்தில் நாடு தழுவிய மக்கள் இயக்கமாக மாறியது.
பங்களாதேஷின் 'ஜூலை எழுச்சி' மற்றும் ஆட்சி மாற்றம்:
சமீபத்தில் வங்கதேசத்தில் சமூக வலைதளங்கள் மூலம் ஒன்றிணைந்த 'ஜென்-இசட்' இளைஞர்கள், அடக்குமுறைகளைத் தாண்டி தலைநகர் டாக்காவை ஸ்தம்பிக்க வைத்தனர். இதன் விளைவாக, பல தசாப்தங்களாக ஆட்சியில் இருந்த பிரதமர் ஷேக் ஹசீனா தனது பதவியை ராஜினாமா செய்துவிட்டு நாட்டை விட்டு வெளியேற வேண்டிய கட்டாயம் ஏற்பட்டது. இது நவீன காலத்தில் இளைஞர்களின் ஒருங்கிணைந்த போராட்டத்திற்கு கிடைத்த மிகப்பெரிய வெற்றியாகப் பார்க்கப்படுகிறது.
கென்யாவின் டிஜிட்டல் புரட்சி மற்றும் வரி எதிர்ப்பு:
ஆப்பிரிக்க நாடான கென்யாவில் 2024-ல் நடந்த போராட்டங்கள், 'ஜென்-இசட்' தலைமுறையினர் எப்படி தொழில்நுட்பத்தைப் பயன்படுத்தி அரசியலில் மாற்றம் கொண்டு வர முடியும் என்பதற்குச் சிறந்த உதாரணமாக அமைந்தது. அந்நாட்டு அரசு கொண்டு வந்த புதிய வரி விதிப்புகளுக்கு (Finance Bill) எதிராக, எந்தவொரு அரசியல் கட்சியின் பின்னணியும் இன்றி, டிக்டாக் (TikTok) மற்றும் எக்ஸ் (X) தளங்கள் வாயிலாக இளைஞர்கள் தன்னெழுச்சியாகத் திரண்டனர். "7 நாட்கள்... 7 போராட்டங்கள்" என டிஜிட்டல் முறையில் திட்டமிடப்பட்ட இவர்களின் வீரியத்தைக் கண்டு அதிர்ந்த அதிபர் வில்லியம் ரூட்டோ, இறுதியில் அந்த வரி சட்டத்தை முழுமையாகத் திரும்பப் பெற்றார். பாரம்பரிய அரசியல் போராட்ட முறைகளைத் தகர்த்து, அதிகார வர்க்கத்தை அடிபணிய வைத்த பெருமை அங்குள்ள இளம் தலைமுறையையே சாரும்.
டிஜிட்டல் தளத்தில் தொடங்கிய வேட்டை
அதேபோன்ற ஜென் ஜி அரசியல் மாற்றம்தான், போராட்டம் எதுவும் இன்றி தமிழ்நாட்டில் அரங்கேறி உள்ளது. இந்தத் தேர்தலின் போக்கை மாற்றியமைத்ததில் சமூக ஊடகங்களின் பங்கு மிக முக்கியமானது. குறிப்பாக, இன்ஸ்டாகிராம் ரீல்ஸ் மற்றும் எக்ஸ் (X) தளங்களில் தவெக ஆதரவாளர்கள் உருவாக்கிய டிரெண்டுகள், முதல்முறை வாக்காளர்களைப் பெருமளவில் ஈர்த்துள்ளன. விஜய்யின் அரசியல் வருகையை ஒரு கொண்டாட்டமாக மாற்றிய இளைஞர்கள், அதனை வாக்குகளாகவும் மாற்றி காட்டியுள்ளனர். ஒவ்வொரு தொகுதியிலும் தவெக தொண்டர்கள் செய்த டிஜிட்டல் பிரச்சாரம், பாரம்பரிய அரசியல் கட்சிகளின் மேடைப் பேச்சுகளை விடவும் அதிக தாக்கத்தை ஏற்படுத்தியுள்ளது.
வெள்ளைச் சட்டை, பிரவுன் பேண்ட் - டிரெண்டான விஜய்யின் 'ஸ்டைல்'
வாக்குப்பதிவு அன்று தமிழகம் முழுவதும் ஒரு சுவாரசியமான காட்சியைப் பார்க்க முடிந்தது. விஜய் தனது பிரச்சாரங்களின் போது அணிந்திருந்த 'வெள்ளைச் சட்டை மற்றும் பிரவுன் பேண்ட்' உடையைப் பின்பற்றி, ஆயிரக்கணக்கான இளைஞர்கள் அதே உடையில் வந்து வாக்குச் சாவடிகளில் வரிசையில் நின்றனர்.
"இது வெறும் உடை அல்ல, இது எங்கள் தலைவனுக்கான அடையாளம்" என்று உற்சாகத்துடன் பதிவிட்ட இளைஞர்களின் புகைப்படங்கள் இணையத்தில் வைரலாகின. கடைசி நேர உத்தியாக இது பெரும் விவாதத்தை ஏற்படுத்தினாலும், இளைஞர்களை ஒரே குடையின் கீழ் கொண்டு வர இது ஒரு பாலமாக அமைந்ததை மறுக்க முடியாது. இதை பார்த்து மனம் மாறி தவெகவிற்கு வாக்களித்த பலரும் கூட உண்டு.
உடைக்கப்படுகிறதா திராவிட பிம்பம்?
கடந்த 50 ஆண்டுகளுக்கும் மேலாக திமுக மற்றும் அதிமுக ஆகிய இரு துருவங்களைச் சுற்றியே சுழன்று கொண்டிருந்த தமிழக அரசியலில், ஒரு புதிய சக்தி இவ்வளவு பெரிய முன்னிலை பெறுவது இதுவே முதல் முறை. குறிப்பாக, வட மாவட்டங்கள் மற்றும் சென்னை சுற்றுவட்டாரப் பகுதிகளில் தவெக பெற்றுள்ள முன்னிலை, ஆளும் தரப்பை அதிர்ச்சியில் ஆழ்த்தியுள்ளது. இவர்களுக்கு திராவிட அரசியல் என்றால் என்னவென்றே தெரியாத நிலையில்.. விஜய் மீதான மோகம் எளிதாக அவர்களை தவெக நோக்கி நகர்த்தி இருக்கிறது.
"நாங்கள் மாற்றத்தை விரும்பினோம், அந்த மாற்றமாக விஜய் அண்ணா வந்திருக்கிறார்" என முதல்முறை வாக்களித்த கல்லூரி மாணவர்கள் கருத்து தெரிவித்து வருகின்றனர். 'ஜென்-இசட்' தலைமுறையினர் மாற்றத்தை தரும் ஒரு புதிய அரசியலை முன்னெடுப்பதாக தவெக ஆதரவாளர்கள் நம்புகின்றனர்.
முடிவுகள் சொல்லும் செய்தி என்ன?
வாக்கு எண்ணிக்கை இன்னும் முழுமையாக முடிவடையாத நிலையில், தற்போது கிடைத்துள்ள முன்னிலை நிலவரங்கள் தமிழக அரசியலில் ஒரு புதிய சகாப்தம் தொடங்கியுள்ளதையே காட்டுகின்றன. ஒருபக்கம் அனுபவம் வாய்ந்த திமுக மற்றும் அதிமுக அணிகள் இருந்தாலும், மறுபக்கம் எந்தவித அரசியல் பின்புலமும் இன்றி இளைஞர்களின் பலத்தை மட்டுமே நம்பி களமிறங்கிய விஜய், தற்போது கிங் மேக்கராக உருவெடுத்துள்ளார்.
வாக்கு எண்ணிக்கையின் இறுதி முடிவுகள் வரும்போது, தமிழகத்தின் அரசியல் வரைபடம் முற்றிலும் மாறக்கூடும் என எதிர்பார்க்கப்படுகிறது. எது எப்படியோ, இந்த 2026 தேர்தல் தமிழக இளைஞர்களின் கையில் அதிகாரம் சென்றடைந்த ஒரு "டிஜிட்டல் புரட்சி"யாகவே வரலாற்றில் இடம்பெறும்.
Click it and Unblock the Notifications
Sign in with Google