அமெரிக்கா.. இந்த ஒற்றைச் சொல்.. இனி உலகத்தை ஆட்டிப்படைக்காது.. வீழும் சாம்ராஜ்ஜியம்.. என்ன நடக்குது?

Updated: Friday, March 20, 2026, 9:43 [IST]

Subscribe to Oneindia Tamil

சென்னை: "உலக போலீஸ்" என்று மார்தட்டிக்கொண்டிருந்த அமெரிக்காவின் பிடி மெல்ல மெல்ல நழுவி வருகிறதா? ஆப்கானிஸ்தான் நாட்டில் ஏற்கனவே தோல்வி, ஈரானின் எழுச்சி, நேட்டோ நாடுகளின் தயக்கம் என உலக அரசியல் சதுரங்கத்தில் காய்கள் தலைகீழாக மாறத் தொடங்கியுள்ளன. .

அமெரிக்கா - இந்த ஒற்றைச் சொல் பல தசாப்தங்களாக உலக நாடுகளின் தலையெழுத்தை தீர்மானிக்கும் சக்தியாக இருந்தது. ஆனால், இன்று நிலைமை தலைகீழ். 'வல்லரசு' என்ற மகுடம் அமெரிக்காவின் தலையிலிருந்து மெல்ல நழுவி வருவதை தற்போதைய சர்வதேச நிகழ்வுகள் அப்பட்டமாக உணர்த்துகின்றன.

1. ஆப்கானிஸ்தான்: அந்த 'முதல்' அடி!

அமெரிக்காவின் வீழ்ச்சிக்கு முதல் புள்ளியாக அமைந்தது ஆப்கானிஸ்தான் போர். இருபது ஆண்டுகள் போராடி, கோடிக்கணக்கான டாலர்களைக் கொட்டி, கடைசியில் தாலிபான்களிடமே ஆட்சியை ஒப்படைத்துவிட்டு அவசர அவசரமாக அமெரிக்கப் படைகள் வெளியேறிய விதம், அந்நாட்டின் ராணுவ பலத்தின் மீதான நம்பிக்கையைச் சிதைத்தது. "எங்களால் ஒரு சிறிய குழுவையே வெல்ல முடியவில்லை" என்ற பிம்பம் உலகரங்கில் அமெரிக்காவை பலவீனமாகக் காட்டியது.

2. ஈரானின் 'செக்' - மத்திய கிழக்கில் மாறும் ஆட்டம்!

இன்று மத்திய கிழக்கு நாடுகளின் அரசியலில் ஈரான் ஒரு தவிர்க்க முடியாத சக்தியாக உருவெடுத்துள்ளது. இஸ்ரேல் மற்றும் அமெரிக்காவின் நேரடி அச்சுறுத்தல்களையும், பொருளாதாரத் தடைகளையும் துச்சமாக மதித்து ஈரான் இன்று நிமிர்ந்து நிற்கிறது. குறிப்பாக, லெபனான் முதல் ஏமன் வரை ஈரானின் ஆதரவு பெற்ற அமைப்புகள் அமெரிக்காவின் திட்டங்களுக்கு முட்டுக்கட்டை போட்டு வருகின்றன. "எதிர்ப்பது அமெரிக்காவாக இருந்தாலும் சரி, இஸ்ரேலாக இருந்தாலும் சரி... பின்வாங்க மாட்டோம்" என்கிற ஈரானின் உறுதி, அரபு நாடுகளிடையே ஒரு புதிய அதிர்வலையை ஏற்படுத்தியுள்ளது.

3. கைவிட்ட நேட்டோ... தனித்து விடப்பட்ட அமெரிக்கா!

அமெரிக்காவின் மிகப்பெரிய பலமாக கருதப்படுவது நேட்டோ (NATO) படை. ஆனால், தற்போதைய சூழலில் உக்ரைன் விவகாரம் முதல் இஸ்ரேல் விவகாரம் வரை பல ஐரோப்பிய நாடுகள் அமெரிக்காவின் முடிவுகளில் முரண்படுகின்றன. அமெரிக்காவிற்காகத் தங்கள் நாட்டுப் பொருளாதாரத்தைப் பலிகொடுக்க பல நேட்டோ நாடுகள் இப்போது தயாராக இல்லை. அமெரிக்காவின் நெருங்கிய நேச நாடுகளே இன்று அமைதி காப்பதும், உதவ மறுப்பதும் அந்நாட்டின் உலகளாவிய அதிகாரக் கட்டுப்பாடு (Global Control) தளர்ந்துவிட்டதையே காட்டுகிறது.

4. ஹார்முஸ் ஜலசந்தியும் 'யுவான்' அரசியலும்!

இதற்கெல்லாம் சிகரம் வைத்தாற்போல் அமைந்திருப்பதுதான் ஈரானின் சமீபத்திய பொருளாதார நகர்வு. உலக கச்சா எண்ணெய் போக்குவரத்தில் மிக முக்கியமான பாதையான ஹார்முஸ் ஜலசந்தியை (Strait of Hormuz) தன் முழுக் கட்டுப்பாட்டிற்குள் கொண்டு வந்துள்ளது ஈரான்.

அங்கு ஈரான் எடுத்துள்ள அதிரடி முடிவு:

சீனக் கப்பல்களுக்கு முன்னுரிமை வழங்கப்படும்.

வர்த்தகத்தில் அமெரிக்க டாலருக்குப் பதில் சீனாவின் 'யுவான்' (Yuan) பயன்படுத்தப்படும்.

இது அமெரிக்காவின் பொருளாதார முதுகெலும்பான 'பெட்ரோ-டாலர்' (Petro-dollar) முறைக்கு விடுக்கப்பட்ட மிகப்பெரிய சவால். டாலரின் மதிப்பு குறையும்போது அமெரிக்காவின் பொருளாதார வல்லரசுத் தன்மை தானாகவே சரியத் தொடங்கும்.

புதிய உலக ஒழுங்கு?

சீனா மற்றும் ஈரானின் இந்த நெருக்கம், ரஷ்யாவின் ஆதரவு, நேட்டோவின் விரிசல் என அனைத்தும் சேர்ந்து அமெரிக்காவை ஒரு தற்காப்பு நிலைக்குத் தள்ளியுள்ளன. "ஒற்றை வல்லரசு" காலம் முடிந்து, அதிகார மையங்கள் பல இடங்களுக்குப் பரவத் தொடங்கியுள்ளன.

மகுடம் சரியுமா? அல்லது அமெரிக்கா மீண்டும் எழுமா? காலம் தான் பதில் சொல்ல வேண்டும்!