"போனி” ஆகலையா? ”வால்டர் வெற்றிவேல்" கதையா? 100 கோடி வசூலை தாண்டிய “வலிமை”..தெறிக்கவிடும் ரசிகர்கள்.!

Published: Sunday, February 27, 2022, 12:26 [IST]

Subscribe to Oneindia Tamil

சென்னை : வலிமை திரைப்படத்திற்கு எதிர்மறையான விமர்சனங்கள் எழுந்த நிலையில் அந்த திரைப்படம் இரண்டே நாட்களில் 100 கோடி ரூபாய் வசூலை ஈட்டி உள்ளதாக தகவல் வெளியாகி உள்ள நிலையில் அதனை அஜித் ரசிகர்கள் ட்விட்டர் உள்ளிட்ட சமூக வலைதளங்களில் கொண்டாடி வருகின்றனர்.

அஜித்தின் வலிமை

முன்னதாக ரசிகர்களின் கோரிக்கையை அடுத்து வலிமை படத்தின் டைட்டில், மோஷன் போஸ்டர், டீசர், சிங்கிள், ட்ரைலர் என அடுத்தடுத்து அப்டேட்களை வெளியிட தயாரிப்பு நிறுவனம் ரசிகர்களை இன்ப அதிர்ச்சியில் ஆழ்த்தியது. சமூகப் பிரச்சினைகளைப் பேசும் குடும்ப பொழுதுபோக்கு திரைப்படம் என இயக்குனர் வினோத் கூறியிருந்த நிலையில் படத்தின் டிரைலர் மற்றும் பாடல்கள் வேற லெவல் ஹிட்டானது.

ரசிகர்கள் ஆர்வம்

பிரம்மாண்ட சண்டைக்காட்சிகள் அட்டகாசமான பாடல்கள் வேற லெவல் பைக் ஸ்டண்ட் காட்சிகள் என அஜித் ரசிகர்களுக்கு விருந்து படைக்க இருப்பதாக வினோத் கூறியிருந்த நிலையில் பிப்ரவரி 24ஆம் தேதி இப்படம் வெளியானது. ஆனால் எதிர்பார்த்த அளவுக்கு வலிமை திரைப்படம் இல்லை என சமூக ஊடகங்களில் செய்தி வெளியானது. படத்தின் பிற்பகுதி மிகவும் மெதுவாகச் செல்வதாகவும் சென்டிமென்ட் மற்றும் பைக் ஸ்டண்ட் காட்சிகளில் கொடுக்கப்பட்ட முக்கியத்துவம் கொடுக்கவில்லை என எதிர்மறையாக விமர்சிக்கப்பட்டது.

கடும் விமர்சனம்

நீண்ட நேர சண்டைக் காட்சிகள், தமிழ் சினிமாவின் பழைய டெம்பிளேட் கதையான நல்ல போலீஸ் கெட்ட தம்பி, அம்மா செண்டிமெண்ட் என போர் அடிப்பதாகவும், கிட்டத்தட்ட 3 மணி நேர நீளமான திரைப்படம் என சலிப்பை ஏற்படுத்துவதாக கூறப்பட்டது. குறிப்பாக வால்டர் வெற்றிவேல் கதை எனவும் சிலர் கலாய்த்தனர். ஆனால் வழக்கம்போல் அஜித் திரையில் வந்து நின்றாலே போதும் என அஜித் ரசிகர்கள் கூறிய நிலையில், படத்தை வணிகரீதியாக மிகப்பெரிய வெற்றியை பெற்றுள்ளதாக கூறி வருகின்றனர் அஜித் ரசிகர்கள்.

100 கோடி வசூல்

இந்த நிலையில் இரண்டே நாட்களில் உலகம் முழுவதும் 100 கோடி ரூபாய் வசூல் செய்திருப்பதாக பெரும் பரபரப்பை ஏற்படுத்தி உள்ளது . வலிமை திரைப்படம் தமிழகத்தில் மட்டும் 65 கோடி ரூபாய் வசூல் செய்ததாகவும் தமிழகம் தவிர மற்ற மாநிலங்களில் 20.5 கோடி ரூபாய் வசூல் செய்திருப்பதாகவும் வெளிநாடுகளில் 20.60 கோடி ரூபாய் வசூல் செய்திருப்பதாகவும் மொத்தம் 96 கோடி ரூபாய் வசூல் செய்திருப்பதாகவும் தகவல்கள் கூறுகின்றன. இதனையடுத்து வலிமை திரைப்படம் வெற்றிப் படம்தான் எனவும், எதிர்மறையான விமர்சங்கள் இருந்தாலும் வணிக ரீதியாக வெற்றி பெற்றுள்ளதாக ரசிகர்கள் கூறி வருகின்றனர்.

Published On February 27, 2022