சர்ருனு ஏறும் தங்கம் விலை.. இன்று வரலாறு காணாத உயர்வு.. வெள்ளியும் எக்குத்தப்பா எகிறுதே!

சென்னை: வரலாற்றிலேயே இல்லாத அளவு ஆபரண தங்கம் விலை புதிய உச்சத்தை எட்டி உள்ளது. சென்னையில் ஆபரண தங்கம் விலை ஒரே நாளில் இன்று சவரனுக்கு ரூபாய் 480 அதிகரித்துள்ளது. ஒரு கிராம் ஆபரண தங்கம் விலை ரூபாய் 7 ஆயிரத்தை கடந்து எகிறிக் கொண்டிருக்கிறது.

சர்வதேச சந்தை வர்த்தகத்தின் அடிப்படையில் தங்கம் விலை நாள்தோறும் நிர்ணம் செய்யப்பட்டு வருகிறது. தங்கம் விலை இந்த ஆண்டின் ஏப்ரல் மாதவாக்கில் புதிய உச்சத்தை தொட்ட நிலையில் அதன்பிறகு ஏற்ற இறக்கங்களுடன் இருந்து வந்தது. இந்நிலையில் இன்று மேலும் உயர்ந்து புதிய உச்சத்தை எட்டி உள்ளது.

கடந்த ஜூலை மாதம் தாக்கல் செய்யப்பட்ட மத்திய அரசின் பட்ஜெட்டில் அறிவிக்கப்பட்ட இறக்குமதி சுங்க வரி குறைப்பால் தங்கம் விலை சரிந்தது. அமெரிக்க பெடரல் வங்கி வைப்பு நிதிக்கான வட்டி விகிதத்தை குறைத்த அறிவிப்பு வெளியானதை தொடர்ந்து, விலை சரிவு நின்று, அதன்பிறகு வேகமாக தங்கம் விலை உச்சம் தொட்டு வருகிறது.

சென்னையில் இன்று (செப்டம்பர் 25) ஒரு கிராம் ஆபரணத் தங்கத்தின் விலை ரூ. 60 உயர்ந்துள்ளது. இன்று சென்னையில் ஒரு கிராம் ஆபரண தங்கம் ரூபாய் 7,060-க்கு விற்பனை செய்யப்படுகிறது. அதேபோல 8 கிராம் (ஒரு சவரன்) ஆபரணத் தங்கம் ரூபாய் 480 உயர்ந்து, ரூபாய் 56,480க்கு விற்பனை செய்யப்படுகிறது.

தங்கம் விலை நேற்று முதல் முறையாக கிராம் ரூபாய் 7 ஆயிரத்தை எட்டிய நிலையில் இன்று மேலும் அதிகரித்துள்ளது. தங்கத்தின் இந்த தொடர் விலையேற்றம், தங்க நகை வாங்க எண்ணிய மக்களுக்கு பெரும் அதிர்ச்சியை ஏற்படுத்தி உள்ளது.

வெள்ளி விலையைப் பொறுத்தவரை, மீண்டும் ஒரு கிராம் வெள்ளி ரூபாய் 100-ஐ கடந்துள்ளது. ஒரு கிராம் வெள்ளி 101 ரூபாய்க்கும், 1 கிலோ வெள்ளி 1,01,000 ரூபாய்க்கும் விற்பனை செய்யப்படுகிறது.

English summary

Jewelery gold price in Chennai increased by Rs 480 per savaran in a single day. The price of one gram of jewelery gold is Rs. 7,060.