கலாநிதி வீராசாமி வடசென்னை திமுக வேட்பாளர்: ஆற்காடு வீராசாமியின் மகன்.. ‘பவர்’ காட்டுவாரா?

சென்னை: வடசென்னை திமுக வேட்பாளராக போட்டியிடுகிறார் முன்னாள் அமைச்சர் ஆற்காடு வீராசாமியின் மகனான கலாநிதி வீராசாமி.

திமுக மூத்தத் தலைவர்களில் ஒருவரும், முன்னாள் அமைச்சருமான ஆற்காடு வீராசாமியின் மகன் கலாநிதி வீராசாமி (49). சிதம்பரம் ராஜா முத்தையா மருத்துவக் கல்லூரியில் மருத்துவம் படித்த இவர், தனது எம்.எஸ் படிப்பை ஸ்ரீ ராமசந்திரா பல்கலைக்கழகத்தில் நிறைவு செய்துள்ளார். ப்ளாஸ்டிக் சர்ஜரி பற்றிய சிறப்புப் படிப்பை லண்டனில் நிறைவு செய்தவர்.

வீ கேர் மருத்துவமனையில் தலைமை நிர்வாக அதிகாரியாகவும் ப்ளாஸ்டிக் சர்ஜனாகவும் பணியாற்றிய கலாநிதி, அப்போலோ மருத்துவமனையிலும் ப்ளாஸ்டிக் சர்ஜனாகப் பணியாற்றி உள்ளார். திமுக மருத்துவ அணியில் நீண்ட காலமாகப் பணியாற்றி வருகிறார்.

இந்நிலையில், வடசென்னை மக்களவைத் தொகுதிக்கான திமுக வேட்பாளராக களமிறக்கப்படுகிறார் கலாநிதி. இதுவரை பத்துமுறை திமுகவை சேர்ந்தவர்கள் அந்த தொகுதியில் இருந்து தேர்ந்தெடுக்கப்பட்டுள்ளனர்.

வட சென்னையை பொறுத்தவரை திமுகவின் வலுவான தொகுதி என்றே கருதப்படுகிறது. ஆனால், கடந்த 2014ம் ஆண்டு நடைபெற்ற தேர்தலில், இத்தொகுதியில் அதிமுகவின் வெங்கடேஷ் பாபு, திமுக வேட்பாளர் கிரிராஜனை இரண்டாவது இடத்திற்கு தள்ளி வெற்றி பெற்றார் என்பது குறிப்பிடத்தக்கது.

English summary

kalanidhi veerasamy vada chennai DMK candidate: Here is the details of this candidate.