ஆஹா.. மக்கள் நீதி மய்யம் வேட்பாளர் லிஸ்ட்.. பரமக்குடியில் கமல்ஹாசன் பெயர் இல்லை.. என்ன பிளான்?

Updated: Wednesday, March 10, 2021, 20:52 [IST]

Subscribe to Oneindia Tamil

சென்னை: சட்டசபை தேர்தலில் மக்கள் நீதி மய்யம் கட்சி சார்பில் போட்டியிட உள்ள 70 வேட்பாளர்கள் பட்டியலை அந்த கட்சி தலைவர் கமல்ஹாசன் இன்று அறிவித்தார். பெரிதும் எதிர்பார்க்கப்பட்ட பரமக்குடி தொகுதியில் கமல்ஹாசன் போட்டியிடவில்லை. கருப்பு ராஜ் என்ற வேட்பாளர் களமிறங்கியுள்ளார்.

வாசித்த கமல்

கமல்ஹாசன் ஒவ்வொரு தொகுதிக்கும், வேட்பாளர் பெயரை அறிவித்தபோது சுற்றியிருந்த நிர்வாகிகள் கைதட்டி ஆதரவை தெரிவித்தனர். தானே வேட்பாளர்கள் பெயரை அறிவித்தால் பிணைப்பு அதிகமாக இருக்கும் என்பதால் இதைச் செய்வதாக கமல் விளக்கம் அளித்திருந்தார்.

பரமக்குடி தொகுதி

பரமக்குடி என்று அவர், சொன்னபோது அங்கு பெரும் நிசப்தம் நிலவியது. பெரும் எதிர்பார்ப்பு இருந்தது. வேட்பாளர் பெயரை கருப்புராஜ் என்று கமல்ஹாசன் அறிவித்தபோது ஒரு நிமிடம் நிர்வாகிகள் கைதட்ட மறந்துவிட்டனர். அதன் பிறகு சுதாரித்துக்கொண்டு கைதட்டினர் என்றால் எந்த அளவுக்கு கமல்ஹாசன் அங்கு போட்டியிடப் போகிறார் என்ற எதிர்பார்ப்பு இருந்திருக்கும் என்பதை உணர முடிகிறது.

கமல் கூட்டணி

கமல்ஹாசன் கட்சி கூட்டணியில் சமத்துவ மக்கள் கட்சி, இந்திய ஜனநாயக கட்சி, எஸ்டிபிஐ கட்சி ஆகியவை இருக்கின்றன. இப்போது முதல் கட்டமாக, தான் வேட்பாளர் பட்டியலை அறிவித்து உள்ளார் கமல்ஹாசன். அடுத்த வேட்பாளர் பட்டியல் அறிவிக்கும் போது அவரது பெயரும் இடம்பெறும் என்று எதிர்பார்க்கப்படுகின்றது.

சென்னையில் போட்டி?

பரமக்குடியில், கமல்ஹாசன் போட்டியிடவில்லை என்பது உறுதி செய்யப்பட்டு விட்டதால் அவர் சென்னையில் ஒரு தொகுதியில் போட்டியிடும், வாய்ப்புகள் இருப்பதாக கூறப்படுகிறது. சென்னையில் எந்த தொகுதியில் போட்டியிடுவார் என்று மிகுந்த எதிர்பார்ப்பு நிலவுகிறது. ஏனெனில் கட்சியின் தலைவர் போட்டியிடாவிட்டால் அது எழுச்சியை ஏற்படுத்தாது என்பதால் கமல் களம் காண்பார் என்று அடித்துச் சொல்கிறார்கள்.