எந்தச் சூழலிலும் கொள்கைகளை முதல்வர் ஸ்டாலின் விட்டுக்கொடுக்க மாட்டார்... உறுதி கூறும் கனிமொழி..!

Updated: Sunday, October 31, 2021, 17:04 [IST]

Subscribe to Oneindia Tamil

சென்னை: எந்தச் சூழலிலும் கொள்கைகளை முதல்வர் ஸ்டாலின் விட்டுக்கொடுக்க மாட்டார் என திமுக மகளிர் அணிச் செயலாளரும், மக்களவை உறுப்பினருமான கனிமொழி தெரிவித்துள்ளார்.

சென்னை கீழ்பாக்கம் அரசு மருத்துவமனையில் மார்பக புற்றுநோய் பரிசோதனை முகாம் நிறைவு நாள் நிகழ்ச்சியில் கலந்துகொண்ட பிறகு செய்தியாளர்களை சந்தித்த போது அவர் இதனைக் கூறினார்.

புதிய கல்விக் கொள்கையை தமிழக அரசு ஏற்கும் என்ற பேச்சுக்கே இடமில்லை என திட்டவட்டமாக கனிமொழி தெரிவித்திருக்கிறார்.

புற்றுநோய் சோதனை

சென்னை கீழ்ப்பாக்கம் அரசு மருத்துவமனையில் கடந்த ஒரு மாதமாக மார்பக புற்றுநோய் பரிசோதனை முகாம் நடைபெற்று வந்த நிலையில் அதன் நிறைவு நாள் நிகழ்ச்சி இன்று நடைபெற்றது. அதில் சிறப்பு விருந்தினராக கலந்துகொண்ட கனிமொழி எம்.பி., பெண்கள் தயக்கமின்றி மார்பக புற்றுநோய் பரிசோதனை செய்துகொள்ள முன்வர வேண்டும் என கேட்டுக்கொண்டார். தமிழகம் மட்டுமின்றி தேசியளவில் இது குறித்து போதிய விழிப்புணர்வு ஏற்படுத்த மத்திய அரசு முன்வர வேண்டும் என கனிமொழி வேண்டுகோள் விடுத்தார்.

கல்விக் கொள்கை

அதைத் தொடர்ந்து புதிய கல்விக் கொள்கை உள்ளிட்ட இன்னும் பல விவகாரங்கள் குறித்து செய்தியாளர்கள் எழுப்பிய கேள்விகளுக்கு பதிலளித்த அவர், புதியக் கல்விக் கொள்கையை தமிழக அரசு ஒரு போதும் அமல்படுத்தாது என்றும் எதிர்க்கட்சியாக இருந்தபோதே இது குறித்து ஆராய்ந்து அதிலுள்ள பாதகங்களை பட்டியிலிட்டு புக்லெட் போட்டு திமுக எம்.பி.க்கள் மூலம் மத்திய அமைச்சரிடம் வழங்கியவர் முதலமைச்சர் ஸ்டாலின் எனவும் கனிமொழி கூறினார்.

வரவேற்பு

எனவே கொள்கையில் இருந்து ஒரு போதும் முதலமைச்சர் ஸ்டாலின் பின்வாங்கமாட்டார் என உறுதி கூறிய கனிமொழி எம்.பி., ஜூலை 18-ம் தேதியை தமிழ்நாடு தினமாக அறிவிக்கப்பட்டதை தாம் வரவேற்பதாக தெரிவித்தார். தமிழ்நாடு தமிழ்நாடாக மாறிய தினம் ஜூலை 18 என்பதால் முதலமைச்சர் சரியாக முடிவெடுத்திருக்கிறார் எனக் கூறினார்.

கனிமொழி விளக்கம்

மொழிவாரியாக மாநிலங்கள் பிரிந்துபோனதை கொண்டாடுவதை காட்டிலும் என்று மதராஸ் மாகாணம் தமிழ்நாடாக மாறியதோ அன்று கொண்டாடுவதே சிறந்தது என விளக்கம் அளித்தார். மேற்கொண்டு அரசியல் தொடர்பாக கேள்விகளை செய்தியாளர்கள் எழுப்பிய நிலையில், அதனை தவிர்த்த அவர் தாம் பங்கேற்ற நிகழ்ச்சி குறித்து மட்டும் கேட்குமாறு கோரிக்கை விடுத்தார்.