வாக்கிங் போன கதிரவன் ஐஏஎஸ்.. நெஞ்சை பிடித்தபடியே சாய்ந்த சோகம்.. சிகிச்சை பலனின்றி மரணம்

கதிரவன் ஐஏஎஸ் அதிகாரி மாரடைப்பால் இறந்த நிலையில் அவரது இறப்புக்கு முதல்வர் ஸ்டாலின் இரங்கல்

Updated: Saturday, February 18, 2023, 17:15 [IST]

Subscribe to Oneindia Tamil

சென்னை: தமிழ்நாடு நெடுஞ்சாலை திட்டப் பணிகள் இயக்குநர் கதிரவன் திடீர் மாரடைப்பால் காலமானார். அவருக்கு வயது 52. அவரது இறப்புக்கு முதல்வர் ஸ்டாலின் இரங்கல் செய்தி வெளியிட்டுள்ளார்.

ஈரோடு, கிருஷ்ணகிரி மாவட்ட முன்னாள் ஆட்சியராக இருந்தார் கதிரவன். குரூப் 1 தேர்வில் தேர்ச்சி பெற்ற கதிரவன் கடந்த 2002 ஆம் ஆண்டு தருமபுரி மாவட்டத்தின் துணை ஆட்சியராக பணியில் சேர்ந்தார். இதைத் தொடர்ந்து அவர் கள்ளக்குறிச்சி, அறந்தாங்கி, விழுப்புரம் ஆகிய இடங்களில் வருவாய் கோட்டாட்சியராக பணியாற்றினார்.

2013 ஆம் ஆண்டு ஐஏஎஸ் அதிகாரியாக கதிரவன் பதவி உயர்வு பெற்றார். இதையடுத்து சேலம் ஆவின் பொது மேலாளராகவும் மதுரை மாநகராட்சி கமிஷனராகவும் பணியாற்றியுள்ளார். இதைத் தொடர்ந்து சேலம் மேக்னசைட் பொது மேலாளராகவும் பணிபுரிந்துள்ளார். அவர் தற்போது சென்னையில் தமிழ்நாடு நெடுஞ்சாலை திட்ட பணிகளின் இயக்குநராக பணியாற்றி வந்தார்.

CM Stalin expresses condolence for Kathiravan IAS death

அவர் நேற்றைய தினம் நடைப்பயிற்சியில் ஈடுபட்டிருந்தார். அப்போது அவருக்கு திடீரென நெஞ்சு வலி ஏற்பட்டுள்ளது. இதன் காரணமாக அவர் சென்னையில் உள்ள தனியார் மருத்துவமனையில் அனுமதிக்கப்பட்டார். அவர் சிகிச்சை பலனின்றி காலமானார். கதிரவனுக்கு தேன்மொழி என்ற மனைவியும் இரு பெண் குழந்தைகளும் உள்ளனர்.

கதிரவனின் உடல் அவரது சொந்த ஊரான நாமக்கல் மாவட்டம் சேந்தமங்கலம் அருகே காந்திபுரத்தில் உள்ள அவரது வீட்டில் பொது மக்கள் அஞ்சலிக்காக வைக்கப்பட்டது. அவரது உடலுக்கு தமிழக நெடுஞ்சாலை மற்றும் பொதுப் பணிகள் துறை அமைச்சர் எ.வ.வேலு, வனத்துறை அமைச்சர் மதிவேந்தன் ஆகியோர் தமிழக அரசு சார்பில் மலர்வளையம் வைத்து அஞ்சலி செலுத்தினர். அவரது உடல் மாலை 6 மணிக்கு காந்திரபுரம் மயானத்தில் தகனம் செய்யப்பட்டது.

ஐஏஎஸ் அதிகாரி கதிரவன் மறைவுக்கு முதல்வர் மு.க.ஸ்டாலின் வெளியிட்டுள்ள இரங்கல் செய்தியில், "தமிழ்நாடு சாலை மேம்பாட்டுத் திட்ட இயக்குநர் கதிரவன் ஐஏஎஸ் உடல் நலக் குறைவால் மறைவெய்திய செய்தி கேட்டு அதிர்ச்சியும் வேதனையும் அடைந்தேன். அவரை இழந்து வாடும் குடும்பத்தினர் உள்ளிட்ட அனைவருக்கும் எனது ஆழ்ந்த இரங்கலைத் தெரிவித்துக் கொள்கிறேன்" என்று தெரிவித்துள்ளார்.