குட்நியூஸ் மக்களே! இன்று முதல் தமிழகத்துக்கு 1460 சிறப்பு பஸ்! கிளாம்பாக்கத்தில் விறுவிறு ரிசர்வேஷன்

சென்னை: சுபமுகூர்த்தம் மற்றும் வார இறுதி நாட்களை முன்னிட்டு இன்றிலிருந்து சிறப்பு பேருந்துகளை தமிழக போக்குவரத்து துறை அறிவித்திருக்கிறது.

வழக்கமாக, பணிநிமித்தம், கல்வி, போன்ற பல்வேறு காரணங்களுக்காக, சொந்த ஊரிலிருந்து பொதுமக்கள் தங்களது நகரங்களுக்கு கிளம்பி செல்வது வழக்கம்.. அதன்படி, சென்னை, கோவை, திருச்சி, திருப்பூர் போன்ற தொழிற்நகரங்களில் வெளியூர் மக்கள் ஏராளமானோர் தங்கியிருக்கிறார்கள்.

விடுமுறை: எனவே, இவர்கள் வார இறுதி நாட்களில் அல்லது பண்டிகை நாட்களில் அல்லது தொடர் விடுமுறை நாட்களில், அவரவர் தங்கள் சொந்த ஊர்களுக்கு செல்வதும் வழக்கம். தற்போது வார விடுமுறை ஆரம்பமாகிவிட்டதாலும், சுபமுகூர்த்த நாட்களும் அடுத்தடுத்து வருவதாலும், பஸ்களில் அதிக நெரிசல் காணப்படும்.. எனவே, பயணிகளின் வசதிக்காக, போக்குவரத்துக் கழகம் சிறப்பு ஏற்பாடுகளை ஒவ்வொரு வாரமும் செய்து வருகிறது.

அந்த வகையில், இப்போதும் இந்த வார இறுதி நாட்களை முன்னிட்டு, சிறப்பு பேருந்துகள் இயக்கப்படுகின்றன.. மொத்தம் 1,460 சிறப்பு பேருந்துகள் இயக்க ஏற்பாடு செய்யப்பட்டுள்ளது.

சிறப்பு பஸ்கள்: அதாவது இன்றும், நாளையும் முகூர்த்த தினம் என்பதால் சென்னையில் இருந்தும் தமிழகத்தின் பல்வேறு இடங்களில் இருந்தும் வெளியூர் பயணம் அதிகரிக்க வாய்ப்பு உள்ளது. அதன் அடிப்படையில் தினசரி இயக்கப்படும் பஸ்களுடன் கூடுதலாக சிறப்பு பஸ்கள் இயக்க திட்டமிடப்பட்டிருக்கிறது.

சென்னை கிளாம்பாக்கத்தில் இருந்து திருவண்ணாமலை, திருச்சி, கும்பகோணம், மதுரை, திருநெல்வேலி, நாகர்கோவில், கன்னியாகுமரி, தூத்துக்குடி, கோயம்புத்தூர், சேலம், ஈரோடு, திருப்பூர் ஆகிய இடங்களுக்கு இன்று 1,130 பஸ்கள் கூடுதலாக இயக்கப்படுகின்றன. கோயம்பேட்டில் இருந்து நாகப்பட்டினம், வேளாங்கண்ணி, ஓசூர், பெங்களூரு ஆகிய இடங்களுக்கு 130 சிறப்பு பஸ்கள் இயக்கப்பட உள்ளன.

முன்பதிவு: மேலும் பெங்களூரு, திருப்பூர், ஈரோடு, கோவை உள்ளிட்ட பல்வேறு இடங்களில் இருந்து பிற பகுதிகளுக்கு 200 சிறப்பு பஸ்கள் என மொத்தம் 1,460 பஸ்கள் இயக்க திட்டமிடப்பட்டுள்ளது. இந்த பஸ்களில் www.tnstc.in என்ற இணையதளம் மற்றும் tnstc செயலி மூலமாக முன்பதிவு செய்து பயணம் செய்யலாம். வெளியூர்களுக்கு செல்ல இன்று 25 ஆயிரம் பேர் முன்பதிவு செய்துள்ளனர்.

English summary

Kilambakkam Bus Terminus and 1,460 Special Buses from Kilambakkam Bus stand for 2 days due to Holidays