கிருத்திகா உதயநிதி டூ ஷாலினி வரை.. சிஎஸ்கே-ஆர்சிபி போட்டியை நேரில் ரசித்த திரை பிரபலங்கள்! லிஸ்ட்

சென்னை: சென்னை சேப்பாக்கம் மைதானத்தில் இன்று தொடங்கிய ஐபிஎல் கிரிக்கெட் போட்டியில் சென்னை-பெங்களூர் அணிகள் மோதின. இதில் சென்னை அணி வெற்றி பெற்ற நிலையில் இந்த போட்டியை அமைச்சர் உதயநிதி ஸ்டாலினின் மனைவி கிருத்திகா உதயநிதி உள்பட ஏராளமான திரைப்பிரபலங்கள் நேரில் கண்டு ரசித்தனர்.

ஆண்டுதோறும் ஐபிஎல் போட்டிகள் நடந்து வருகின்றன. 2024ம் ஆண்டுகள் ஐபிஎல் போட்டிகள் இன்று தொடங்கின. இது ஐபிஎல்லின் 17 வது சீசனாகும். கடந்த முறை சென்னை சூப்பர் கிங்ஸ் சாம்பியனானது.

இதனால் இந்த சீசனின் நடப்பு சாம்பியான சென்னை சூப்பர் கிங்ஸ் களம்காண்கிறது. இந்நிலையில் தான் முதல் போட்டியில் சென்னை சூப்பர் கிங்ஸ் அணியும், ராயல் சேலஞ்சர்ஸ் பெங்களூர் அணிகளும் இன்று சேப்பாக்கம் மைதானத்தில் மோதின.

இதில் டாஸ் வென்ற பெங்களூரு அணியின் கேப்டன் டூபிளசிஸ் பேட்டிங் செய்ய முடிவு செய்தது. பெங்களூர் அணியின் தொடக்க ஆட்டக்காரர்களாக விராட் கோலி டூ பிளசிஸ் ஆகியோர் களமிறங்கினர். கோலி 21 ரன்களிலும், டூ பிளசிஸ் 17 ரன்களிலும் அவுட்டாகினர்.

அதன்பிறகு ரஜத் படிதார், அதிரடி ஆட்டக்காரர் ஆகியோர் டக் அவுட் ஆகினர். கிரீன் 18 ரன்னில் அவுட்டானார். இதனால் பெங்களூர் தடுமாறியது. இறுதியில் அனுஜ் ராவத், தினேஷ் கார்த்திக் அதிரடி காட்டினர். அனுஜ் ராவத் 48 ரன்களும், தினேஷ் கார்த்திக் 38 ரன்களும் எடுத்த நிலையில் 20 ஓவர் முடிவில் பெங்களூர் அணி 173 ரன்கள் குவித்தது. அதன்பிறகு களமிறங்கிய சென்னை அணி 174 இலக்கை எட்டிப்பிடித்து இந்த ஐபிஎல் சீசனை வெற்றிகரமாக தொடங்கி உள்ளது.

சென்னை அணியில் கேப்டன் ருதுராஜ் கெய்க்வாட் 15, ரச்சின் ரவீந்திரா 37 ரன்கள், ரஹானே 27 ரன், டேரில் மிட்செல் 22 ரன்கள் எடுத்து அவுட்டாகினர். சிவம் துபே 34 ரன்களும், ரவீந்திர ஜடேஜா 25 ரன்களும் எடுத்த நிலையில் சென்னை அணி 18.3 ஓவர்களில் 4 விக்கெட்டுகளை இழந்து 174 ரன்களை எடுத்து 6 விக்கெட்டுகள் வித்தியாசத்தில் வெற்றி பெற்றது. இந்நிலையில் தான் சென்னை - பெங்களூர் போட்டியை ஏராளமான திரைபிரபலங்கள் நேரில் ரசித்துள்ளனர்.

அதன்படி தமிழக இளைஞர் நலன் மற்றும் விளையாட்டுத் துறை அமைச்சரான உதயநிதி ஸ்டாலினின் மனைவி கிருத்திகா ஸ்டேடியத்திற்கு நேரில் சென்று அவர் போட்டியை ரசித்தார். கிருத்திகா உதயநிதி காரில் இருந்து இறங்கி ஸ்டேடியத்துக்குள் செல்லும் வீடியோ வெளியாகி வேகமாக பரவி வருகிறது.

அதேபோல் நடிகர் தனுஷ் தனது மகன்களான லிங்கா மற்றும் யாத்ராவுடன் போட்டியை ரசித்தார். காமெடி நடிகர் சதீஷ், நடிகர் அஜித் குமாரின் மனைவி ஷாலினி, ஷாமிலி மற்றும் ரிச்சர்டு உள்ளிட்டோரும் போட்டியை நேரில் கண்டு ரசித்தனர்.

English summary

The Chennai-Bangalore teams clashed in the IPL cricket match that started today at Chennai's Chepauk stadium. While the Chennai team won, the match was witnessed by many celebrities including Kruthiga Udhayanidhi, wife of Minister Udhayanidhi Stalin, actor Ajith's wife Shalini, actor Dhanush and Satish.