கொளத்தூர் இடைத்தேர்தல்.. தவெக வேட்பாளர் யார்? ரேஸில் முந்தும் தணிகா & பாபுவின் மகன்! விஜய் சாய்ஸ்
சென்னை: சென்னை கொளத்தூர் தொகுதி த.வெ.க. எம்.எல்.ஏ. வி.எஸ். பாபு (75) 71 நாட்கள் தீவிர சிகிச்சைக்குப் பிறகு நேற்று காலமானார். இதனைத் தொடர்ந்து கொளத்தூர் சட்டமன்றத் தொகுதி காலியானதாக அறிவிக்கப்பட உள்ள நிலையில், விரைவில் அங்கு இடைத்தேர்தல் நடைபெற உள்ளது.
2026 சட்டமன்றத் தேர்தலில் தி.மு.க. தலைவர் மு.க. ஸ்டாலினை வீழ்த்தி த.வெ.க. கைப்பற்றிய தொகுதி என்பதால், இடைத்தேர்தலிலும் கொளத்தூரைத் தக்கவைக்க விஜய் தீவிரம் காட்டி வருகிறார்.

இந்நிலையில், ஆளுங்கட்சியான தமிழக வெற்றிக் கழகம் சார்பில் கொளத்தூர் இடைத்தேர்தலில் போட்டியிடப் போவது யார் என்ற எதிர்பார்ப்பு எழுந்துள்ளது. கட்சி வட்டாரத் தகவல்களின்படி, தவெக மாவட்டச் செயலாளர் தணிகா மற்றும் மறைந்த வி.எஸ். பாபுவின் மகன் ஆகிய இருவரின் பெயர்கள் வேட்பாளர் பட்டியலில் முன்னணியில் அடிபடுகின்றன. யார் இவர்கள்? இவர்களின் பின்னணி என்ன? என்பதைப் பார்ப்போம்.
தவெக மாவட்டச் செயலாளர் தணிகா யார்?
கொளத்தூர் தொகுதியை உள்ளடக்கிய சென்னை மாவட்ட த.வெ.க. செயலாளராகப் பொறுப்பு வகிப்பவர் தணிகா. கட்சியின் ஆரம்பகாலம் முதலே விஜய் மக்கள் இயக்கத்திலும், பின்னர் தமிழக வெற்றிக் கழகத்திலும் தீவிரமாகப் பணியாற்றி வரும் இவர், கொளத்தூர் மற்றும் அதன் சுற்றுவட்டாரப் பகுதிகளில் கட்சியை அடிமட்டத்திலிருந்து பலப்படுத்தியவர்.
வி.எஸ். பாபு 2026 தேர்தலுக்குச் சற்று முன்புதான் அ.தி.மு.க.விலிருந்து விலகி த.வெ.க.வில் இணைந்து வேட்பாளரானார். ஆனால், அதற்கு முன்பிருந்தே கொளத்தூர் தொகுதியில் பூத் கமிட்டி அமைப்பது முதல் கட்சிப் பணிகள் அனைத்தையும் முன்னின்று கவனித்து வந்தவர் தணிகாதான்.
வி.எஸ். பாபு மருத்துவமனையில் அனுமதிக்கப்பட்டிருந்த கடந்த இரண்டு மாதங்களாக, கொளத்தூர் தொகுதியில் கட்சி மற்றும் அரசு சார்ந்த நிகழ்ச்சிகளைத் தணிகாவே ஒருங்கிணைத்து வந்தார். குறிப்பாக, கடந்த நவம்பர் 13-ம் தேதி குழந்தைகள் தினத்தன்று முதலமைச்சர் விஜய் கொளத்தூர் பள்ளி விழாவில் பங்கேற்றபோது, அதற்கான அனைத்து ஏற்பாடுகளையும் முன்னின்று செய்தவர் தணிகாதான். உள்ளூர் நிர்வாகிகளிடையே இவருக்கு நல்ல செல்வாக்கு இருப்பதால், கட்சியின் விசுவாசி என்ற அடிப்படையில் தனக்கு வாய்ப்பு கிடைக்கும் என இவர் எதிர்பார்க்கிறார்.
மறைந்த வி.எஸ். பாபுவின் மகன்
மறைந்த எம்.எல்.ஏ. வி.எஸ். பாபுவுக்கு பிரகாஷ், சதீஷ்குமார், விக்னேஷ், பாலு ஆகிய நான்கு மகன்களும், ஒரு மகளும் உள்ளனர். இதில் வி.எஸ். பாபுவின் அரசியல் பணிகளில் உடனிருந்து கவனித்து வந்த அவரது மகனுக்கு, குறிப்பாகத் தந்தையின் மருத்துவமனை நாட்களிலும் இறுதிச் சடங்குகளிலும் முன்னின்ற சதீஷ்குமார் அல்லது மூத்த மகன் பிரகாஷ் இருவரில் ஒருவருக்கு வாய்ப்பு வழங்கப்படலாம் என்றும் பேசப்படுகிறது.
வி.எஸ். பாபு கடந்த 40 ஆண்டுகளாக வடசென்னை அரசியலில் கோலோச்சியவர். தி.மு.க., அ.தி.மு.க. எனப் பல கட்சிகளில் பணியாற்றியதால், கொளத்தூர் மற்றும் பெரம்பூர் பகுதிகளில் வி.எஸ். பாபு குடும்பத்திற்கு எனத் தனிப்பட்ட வாக்கு வங்கியும், உள்ளூர் மக்களிடையே அறிமுகமும் உள்ளது.
பதவியேற்ற ஆறு மாதங்களிலேயே வி.எஸ். பாபு காலமாகிவிட்டதால், அவரது குடும்பத்தைச் சேர்ந்த ஒருவரை வேட்பாளராக நிறுத்தினால் தொகுதி மக்களின் அனுதாப வாக்குகளை எளிதாகப் பெற முடியும் எனத் தவெகவின் ஒரு தரப்பினர் கருதுகின்றனர். நேற்று வி.எஸ். பாபு உடலுக்கு அஞ்சலி செலுத்தச் சென்ற முதல்வர் விஜய், அவரது மகனை அரவணைத்து ஆறுதல் கூறியதும் கவனிக்கத்தக்கது.
திமுக தரப்பில் மீண்டும் மு.க. ஸ்டாலினோ அல்லது அக்கட்சியின் மிக முக்கியப் புள்ளியோ களமிறங்க வாய்ப்புள்ளதால், கொளத்தூர் இடைத்தேர்தல் மிகக் கடுமையான போட்டியாக இருக்கும். கட்சி அமைப்பைக் கையில் வைத்திருக்கும் தணிகாவுக்கு வாய்ப்பளிப்பதா? அல்லது வி.எஸ். பாபுவின் குடும்ப செல்வாக்கு மற்றும் அனுதாப அலையைப் பயன்படுத்த அவரது மகனுக்கு வாய்ப்பளிப்பதா? என்பது குறித்து முதல்வர் விஜய் விரைவில் முக்கிய முடிவெடுப்பார் என எதிர்பார்க்கப்படுகிறது.


Click it and Unblock the Notifications
