2021-ல் தமிழக மந்திரிசபையில் பாஜக இடம்பெறுவது உறுதி... எல்.முருகன் திட்டவட்டம்

Updated: Monday, August 31, 2020, 14:48 [IST]

Subscribe to Oneindia Tamil

சென்னை: வரும் 2021 சட்டமன்றத் தேர்தலுக்கு பிறகு தமிழக மந்திரி சபையில் பாஜக இடம்பெறுவது உறுதி என அக்கட்சியின் மாநில தலைவர் எல்.முருகன் தெரிவித்துள்ளார்.

மேலும், தமிழக சட்டமன்றத்திற்குள் பாஜக எம்.எல்.ஏ.க்களை இரட்டை இலக்கத்தில் அனுப்பி வைக்கும் வரை தனக்கு ஓய்வும் இல்லை உறக்கமும் இல்லை எனக் கூறியுள்ளார்.

கூட்டணி விவகாரத்தை பொறுத்தவரை தற்போதைய நிலை தொடரும் என அவர் தெரிவித்திருக்கிறார்.

எல்.முருகன்

தமிழக பாஜக தலைவராக நியமனம் செய்யப்பட்டது முதல் அக்கட்சியை பரபரப்பாகவே வைத்து வருகிறார் எல்.முருகன். கந்தசஷ்டி கவசத்தில் தொடங்கி கோயில் திறப்பு வரை கிடைத்த வாய்ப்புகளையெல்லாம் சாதகமாக பயன்படுத்தி துடிப்பாக செயல்பட்டு வருகிறார். வரும் சட்டமன்றத் தேர்தலில் பாஜக எம்.எல்.ஏ.க்களை சட்டமன்றத்திற்குள் அனுப்ப வேண்டும் என்ற ஒற்றை அஜெண்டாவோடு தமிழகத்தை சுற்றி வரத் தொடங்கியிருக்கிறார் எல்.முருகன்.

அமைச்சரவையில் பாஜக

இந்நிலையில் செய்தி தொலைக்காட்சி ஒன்றுக்கு அவர் அளித்த நேர்காணலில், வரும் 2021 தேர்தலுக்கு பிறகு தமிழக அமைச்சரவையில் பாஜக கண்டிப்பாக இடம்பெறும் என்றும், தமிழகத்தில் யார் ஆட்சி செய்ய வேண்டும் என்பதை தீர்மானிக்கும் சக்தியாக பாஜக உருவெடுக்கும் எனவும் கூறியிருக்கிறார். இரட்டை இலக்கத்தில் பாஜக உறுப்பினர்கள் தேர்தலில் வெல்வார்கள் என நம்பிக்கை தெரிவித்துள்ள முருகன் பாஜக எம்.எல்.ஏ.க்கள் ஆதரவின்றி ஆட்சி அமைக்க முடியாது எனத் தெரிவித்திருக்கிறார்.

யார் தலைமை?

மேலும், வரும் சட்டமன்றத் தேர்தல் கூட்டணி தொடர்பான கேள்விக்கு பதிலளித்த எல்.முருகன், கூட்டணியை பொறுத்தவரை தமிழகத்தில் தற்போது என்ன நிலை உள்ளதோ அது தேர்தலின் போதும் தொடரும் எனக் கூறியுள்ளார். இதன் மூலம் அதிமுக தலைமையிலான கூட்டணியை பாஜக ஏற்றுக்கொள்வதாக சூசகமாக விடையளித்துள்ளார் எல்.முருகன். அண்மையில் இது தொடர்பாக பேட்டியளித்த பாஜக துணை தலைவர் வி.பி.துரைசாமி பாஜக தலைமையில் தான் கூட்டணி எனக் கூறியிருந்தது குறிப்பிடத்தக்கது.

அதிமுக மவுனம்

பாஜக -அதிமுக இடையே கூட்டணி அமைந்தாலும் அமையலாம் அமையாமலும் போகலாம் என அண்மையில் ஒன் இந்தியா தமிழுக்கு அளித்த பேட்டியில் அதிமுக முன்னாள் எம்.பி. அன்வர் ராஜா தெரிவித்திருந்தது கவனிக்கத்தக்கது. இதனிடையே கூட்டணி விவகாரத்தில் தற்போதைய நிலை தொடரும் என எல்.முருகன் கூறியிருப்பது குறிப்பிடத்தக்கது.