வருத்தம் தெரிவித்த எல்ஐசி.. இணையதள பக்கம் ஆங்கிலத்துக்கு பதில் இந்தியில் மாறியது ஏன்? விளக்கம்

சென்னை: எல்ஐசி நிறுவனத்தின் அதிகாரப்பூர்வ இணையதளத்தில் ஆங்கிலத்துக்கு பதில் இந்தி Default மொழியாக மாற்றப்பட்டது சர்ச்சையை ஏற்படுத்தியது. இதற்கு முதல்வர் ஸ்டாலின் உள்பட தமிழக அரசியல் கட்சியினர் கடும் கண்டனம் தெரிவித்தனர். இந்நிலையில் தான் எல்ஐசி வருத்தம் தெரிவித்து ஆங்கிலத்துக்கு பதில் இந்தி மொழி இடம்பெற்றது எப்படி என்பது பற்றி முக்கிய விளக்கத்தை அளித்துள்ளது.

மத்திய அரசின் ஒவ்வொரு பொதுத்துறை நிறுவனங்களுக்கும் தனித்தனியாக இணையதள பக்கங்கள் உள்ளன. அந்த வகையில் எல்ஐசிக்கும் தனியாக இணையதள பக்கம் உள்ளது. இந்த இணையதள பக்கங்களில் ஆங்கிலம் மற்றும் இந்தியில் விபரங்கள் இடம்பெற்றிருக்கும்.

இதில் Default மொழியாக எப்போதும் ஆங்கிலமே இருக்கும். ஒருவேளை ஆங்கிலம் புரியாதவர்கள் இந்தி மொழியை தேர்வு செய்து விபரங்களை அறிந்து கொள்ள முடியும். இதற்கிடையே தான் எல்ஐசியின் இணையதள பக்கம் முழுவதும் ஆங்கிலத்துக்கு பதில் டீபால்ட்டாக இந்தி மொழிக்கு மாற்றம் செய்யப்பட்டு இருந்தது. இது இந்தி தெரியாத தமிழகம் உள்பட தென்மாநிலங்களை சேர்ந்தவர்களால் விபரங்களை பெற முடியாத நிலை ஏற்பட்டது.

இதனால் தமிழக முதல்வர் முக ஸ்டாலின் உள்பட பல்வேறு அரசியல் கட்சி தலைவர்கள் கடும் கண்டனம் தெரிவித்தனர். ஏற்கனவே மத்திய அரசு இந்தியை திணிப்பதாக திமுக மற்றும் அதன் கூட்டணி கட்சிகள் கூறி வரும் நிலையில் எல்ஐசி இணையதள பக்கம் வழியாக இந்தியை திணிக்க முயல்வதாக அரசியல் தலைவர்கள் சாடினர். மேலும் இணையதள பக்கத்தின் ‛டீபால்ட்' மொழியாக மீண்டும் ஆங்கிலத்தை மாற்ற வேண்டும் என்று வலியுறுத்தினர்.

இந்நிலையில் தான் தற்போது எல்ஐசியின் அதிகாரப்பூர்வ இணையதள பக்கத்தின் ‛டீபால்ட்' மொழியாக மீண்டும் ஆங்கிலம் மாற்றம் செய்யப்பட்டுள்ளது. அதோடு எல்ஐசி நிறுவனம் சார்பில் விளக்கத்தோடு மக்கள் எதிர்கொண்ட சிரமத்துக்கு வருத்தமும் தெரிவிக்கப்பட்டுள்ளது. இதுதொடர்பாக எல்ஐசி நிறுவனம் தனது அதிகாரப்பூர்வ LIC India Forever என்ற எக்ஸ் பக்கத்தில் கூறப்பட்டுள்ளதாவது:

‛‛எங்களின் கார்ப்பரேட் இணையதள பக்கம் தொழில்நுட்ப கோளாறு காரணமாக மொழி Shuffling செய்யவில்லை. தற்போது இந்த பிரச்சனை சரிசெய்யப்பட்டுள்ளது. இப்போது இணையதளம் ஆங்கிலம் மற்றும் இந்தி ஆகிய மொழிகளில் சேவையை வழங்குகிறது. முன்னதாக ஏற்பட்ட சிரமத்துக்கு ஆழ்ந்த வருத்தத்தை தெரிவித்து கொள்கிறோம் - டீம் எல்ஐசி'' என கூறப்பட்டுள்ளது.

English summary

Hindi Row: Our corporate websit was not shuffling the language page due to some technical problem. The Issue is resolved now, and the website is availbale in English/Hindi language. Incovenience caused is deeply regretted, says Team LIC.