"கோடீஸ்வரர்".. ராஜ்யசபா எம்பியாகும் தேமுதிகவின் எல்கே சுதீஷ் சொத்து மதிப்பு எவ்வளவு தெரியுமா?
சென்னை: திமுக கூட்டணியில் தேமுதிக சார்பில் ராஜ்யசபா எம்பி வேட்பாளராக எல்கே சுதீஷ் வேட்பு மனுத்தாக்கல் செய்துள்ளார். இந்நிலையில் தான் அவர் தாக்கல் செய்துள்ள வேட்புமனுவில் அசையும் சொத்து, அசையா சொத்து, கடன் உள்ளிட்ட முக்கிய விவரங்கள் இடம்பெற்றுள்ளன.
தமிழக சட்டசபை தேர்தலையொட்டி திமுக கூட்டணியில் விஜயகாந்தின் தேமுதிக இணைந்துள்ளது. திமுக சார்பில் தேமுதிகவுக்கு இன்னும் சட்டசபை தொகுதிகள் ஒதுக்கீடு செய்யப்படவில்லை.
குறைந்தபட்சம் 6 முதல் 7 சட்டசபை தொகுதிகள் வரை தேமுதிகவுக்கு முதல்வர் ஸ்டாலின் வழங்கலாம் என்று கூறப்படுகிறது. இதுதொடர்பாக விரைவில் அதிகாரப்பூர்வமாக அறிவிப்பு வெளியாக உள்ளது.
எல்கே சுதீஷ் போட்டி
மேலும் தேமுதிகவுக்கு ஒரு ராஜ்யசபா சீட்டை முதல்வர் ஸ்டாலின் வழங்கினார். இந்த ராஜ்யசபா சீட்டில் தேமுதிக பொதுச் செயலாளர் பிரேமலதாவின் சகோதரரான எல்கே சுதீஷ் போட்டியிட்டுள்ளார். இவர் தேமுதிகவின் பொருளாளராக பொறுப்பு வகித்து வருகிறார். இந்நிலையில் தான் ராஜ்யசபா தேர்தலுக்கான வேட்புமனுத்தாக்கல் நேற்று முடிவடைந்தது. எல்கே சுதீஷ் வேட்புமனுத்தாக்கல் செய்தார்.
சொத்து மதிப்பு எவ்வளவு?
இந்த மனுத்தாக்கலின்போது எல்கே சுதீஷ் தனது சொத்து விவரங்களை இணைத்திருந்தார். அதன்படி எல்கே சுதீஷ்க்கு அசையும் சொத்தாக ரூ.11.03 கோடி இருப்பதாக தெரிவிக்கப்பட்டுள்ளது. அசையா சொத்தாக ரூ.28.16 கோடி இருப்பதாகவும் தெரிவிக்கப்பட்டுள்ளது. அதேவேளையில் கடனாக ரூ.4.72 கோடி இருப்பதாக கூறப்பட்டுள்ளது.
யார் யார் போட்டி?
தமிழகத்தில் 6 ராஜ்யசபா இடங்களுக்கு தேர்தல் அறிவிக்கப்பட்டுள்ளது. இதில் 4 இடங்கள் திமுகவுக்கும், 2 இடங்கள் அதிமுகவுக்கும் கிடைக்கும். திமுக தனது 4 இடங்களில் ஒரு இடத்தை காங்கிரஸ் கட்சிக்கும், இன்னொரு சீட்டை தேமுதிகவுக்கும் ஒதுக்கியது.
மீதமுள்ள இரு இடங்களில் திமுக சார்பில் திருச்சி சிவா மற்றும் கான்ஸ்டன்டைன் ரவீந்திரன் ஆகியோர் போட்டியிடுகின்றனர். காங்கிரஸ் சார்பில் கிறிஸ்டோபர் திலக் களமிறங்கி உள்ளார். இவர்களின் வெற்றி உறுதி செய்யப்பட்டுள்ளது.
அதிமுக – பாமக
அதிமுகவை எடுத்து கொண்டால் ஒரு இடத்தில் தம்பித்துரையும், இன்னொரு இடத்தை கூட்டணி கட்சியான பாமகவுக்கும், அதிமுக வழங்கியது. பாமக சார்பில் அன்புமணி ராமதாஸ் ஆகியோர் வேட்பு மனுத்தாக்கல் செய்துள்ளனர். இவர் 6 பேரின் வேட்புமனுக்களும் இன்று ஏற்கப்பட்டது. இதன்மூலம் இவர்கள் 6 பேரும் ராஜ்யசபா எம்பியாவது உறுதி செய்யப்பட்டுள்ளது.
Click it and Unblock the Notifications
Sign in with Google