நண்பர் ஸ்டாலின்.. நீண்ட ஆரேக்கியம்..மன நிம்மதியுடன் மக்கள் சேவை செய்ய வேண்டும்.. ரஜினி வாழ்த்து

என் இனிய நண்பர் மு.க ஸ்டாலின் நீண்ட நாட்கள் நல்ல ஆரோக்கியத்துடனும் மன நிம்மதியுடனும் இருந்து மக்கள் சேவை செய்ய வேண்டும் என்று நடிகர் ரஜினிகாந்த் வாழ்த்தியுள்ளார்.

சென்னை: முதல்வர் மு.க ஸ்டாலின் நாளைய தினம் 70வது பிறந்தநாள் கொண்டாடுகிறார். அவருக்கு நடிகர் ரஜினிகாந்த் வாழ்த்து கூறி வீடியோ வெளியிட்டுள்ளார். என் இனிய நண்பர் முதலமைச்சர் மு.க ஸ்டாலின் நீண்ட நாட்கள் நல்ல ஆரோக்கியத்துடனும் மன நிம்மதியுடனும் இருந்து மக்கள் சேவை செய்ய வேண்டும் கூறியுள்ளார் ரஜினிகாந்த்.

தி.மு.க. தலைவரும் முதல்வருமான மு.க.ஸ்டாலினின் 70வது பிறந்தநாளை தொண்டர்கள் சிறப்பாக கொண்டாடுகிறார்கள். முதல்வருக்கு வாழ்த்து கூற திமுக சார்பில் பல்வேறு ஏற்பாடுகள் செய்யப்பட்டுள்ளது.

தமிழகம் மட்டுமல்ல, நாடு முழுவதும் இருக்கும் நலம் விரும்பிகள் அவருக்கு பிறந்தநாள் வாழ்த்துக்களை தெரிவிக்க முடியும். 07127191333 என்ற தொலைபேசி எண்ணிற்கு அழைத்து தங்கள் வாழ்த்துக்களை பதிவு செய்யலாம். இந்த தொலைபேசி எண் இன்று முதல் 2ஆம் தேதி வரை செயல்பாட்டில் இருக்கும்.

மெய்நிகர் சேவையை பயன்படுத்தி முதல்வருடன் புகைப்படம் எடுத்து தங்கள் வாழ்த்தையும் பதிவு செய்யலாம். www.selfiewithcm.com என்ற இணைய தளத்துடன் கியூ.ஆர்.குறியீடு இணைக்கப்பட்டுள்ளது. அதில் மு.க.ஸ்டாலின் பல்வேறு புகைப்படங்களோடு மக்கள் தங்கள் விருப்பப்படி மெய்நிகர் முறையில் செல்பி எடுத்து கொள்ளலாம். அந்த புகைப்படங்களை தங்களது சமூக ஊடகங்கள், வாட்ஸ்அப் ஸ்டேட்டஸ் ஆகவும் வைத்து முதலமைச்சருக்கு வாழ்த்து தெரிவிக்கலாம். முதல்முறையாக நவீன தொழில்நுட்ப முறை அறிமுகப்படுத்தப்பட்டுள்ளது.

இந்த நிலையில் முதல்வர் மு.க ஸ்டாலினுக்கு நடிகர் ரஜினிகாந்த் பிறந்தநாள் வாழ்த்து கூறியுள்ளார்.

நடிகர் ரஜினிகாந்த் இன்று வெளியிட்டுள்ள வீடியோவில் வணக்கம் என் இனிய நண்பர் மாண்புமிகு தமிழக முதலமைச்சர் மு.க ஸ்டாலின் நீண்ட நாட்கள் நல்ல ஆரோக்கியத்துடனும் மன நிம்மதியுடனும் இருந்து மக்கள் சேவை செய்ய வேண்டும் என்று அவரது 70வது பிறந்தநாளில் வாழ்த்துகிறேன் என்று கூறியுள்ளார்.

கடந்த ஆண்டு டிசம்பர் 12ஆம் தேதி ரஜினி பிறந்தநாளில் முதல்வர் ஸ்டாலின் தனது ட்விட்டர் பக்கத்தில், என் இனிய நண்பர் தமிழ்த் திரையுலக சூப்பர்ஸ்டார் @rajinikanth அவர்களுக்குப் பிறந்தநாள் வாழ்த்துகள்!நல்ல உடல்நலத்துடன் பல்லாண்டு வாழ வாழ்த்துகிறேன் என்று பதிவிட்டிருந்தார். அதே போல முதல்வர் ஸ்டாலின் பிறந்தநாளில் வாழ்த்து கூறியுள்ளார் ரஜினிகாந்த்.

நடிகரும் மக்கள் நீதி மய்யம் தலைவருமான கமல்ஹாசன், தனக்கும் முதல்வர் ஸ்டாலினுக்கும் அரசியலைத் தாண்டி நட்பு இருந்தது என்று குறிப்பிட்டிருந்தார். அவரது புகைப்படக் கண்காட்சியை திறந்து வைத்து வாழ்த்தினார். இந்த நிலையில் நடிகர் ரஜினிகாந்தும் இனிய நண்பர் என்று கூறி வாழ்த்தியுள்ளார்.

English summary

CM Stalin is celebrating his 70th birthday tomorrow. Actor Rajinikanth has released a video congratulating him. Rajinikanth has said that my dear friend Chief Minister M.K. Stalin should serve the people with good health and peace of mind for a long time.