இதுக்கு தான் தமிழகத்தில் NDA வரக்கூடாது.. இஸ்லாமிய இடஒதுக்கீட்டை நீக்கிய பாஜகவால் கொதித்த ஸ்டாலின்

சென்னை: ‛‛மகாராஷ்டிராவில் பிற்படுத்தப்பட்ட முஸ்லீம்களுக்கான இடஒதுக்கீட்டை பாஜக நீக்கி உள்ளது. இதுதான் இஸ்லாமிய மக்களுக்கு, சிறுபான்மையினருக்கு எதிரான பாஜக அறிவித்திருக்கும் ரம்ஜான் பரிசா? தப்பித் தவறிக் கூட தமிழ்நாட்டுக்குள் என்டிஏ கூட்டணி வரவே கூடாதென ஏன் சொல்கிறேன் புரிகிறதா? வந்தால் நம் அனைவரின் இடஒதுக்கீடும் காலி! இவர்களுக்கு ஒருநாளும் வளர்ச்சி அரசியல் தெரியாது; தெரிந்ததெல்லாம் மதவெறி சூழ்ச்சி அரசியல் மட்டும்தான் இத்தகைய வெறுப்பு எஞ்சின்கள் தமிழ்நாட்டில் ஓட அனுமதிக்க மாட்டோம்! "தமிழ்நாடா NDA-வா?" எனும் 2026 ஜனநாயகப் போரில் தமிழ்நாடே வெல்லும்!'' என்று முதல்வர் முக ஸ்டாலின் கடும் கண்டனத்தை பதிவு செய்துள்ளார்.

மகாராஷ்டிராவில் பாஜக கூட்டணி ஆட்சி நடந்து வருகிறது. முதல்வராக பாஜகவின் தேவேந்திர பட்னாவிஸ் உள்ளார். துணை முதல்வராக சிவசேனா கட்சியின் ஏக்நாத் ஷிண்டே உள்ளார். அதேபோல் தேசியவாத காங்கிரஸ் கட்சி சார்பில் துணை முதல்வராக அஜித் பவார் இருந்தார்.

இவர் விமான விபத்தில் மரணமடைந்ததால் தற்போது அவரது மனைவி சுனேத்ரா பவார் துணை முதல்வராக பொறுப்பேற்று செயல்பட்டு வருகிறார்.

இந்நிலையில் தான் பின்தங்கிய இஸ்லாமியர்களுக்கு தனியாக 5% இட ஒதுக்கீட்டை முந்தைய காங்கிரஸ் அரசு கொண்டு வந்தது. சமூக மற்றும் கல்வி ரீதியாகப் பின்தங்கிய வகுப்பினர் பிரிவின் கீழ் 'சிறப்புப் பின்தங்கிய பிரிவு-ஏ' ஆக இந்த இட ஒதுக்கீடு வழங்கப்பட்டது.

அதாவது 2014ம் ஆண்டில் காங்கிரஸ்-தேசியவாத காங்கிரஸ் கட்சி கூட்டணி அரசு, இஸ்லாமியர்களுக்கு இட ஒதுக்கீடு வழங்கும் அவசரச் சட்டத்தைக் கொண்டு வந்தது. அதாவது அரசு வேலைகள், கல்வி ஆகியவற்றில் முஸ்லிம்களுக்கு 5% இடஒதுக்கீட்டை அறிவித்தது. இதற்காக சட்டசபையில் அவசரச் சட்டம் நிறைவேற்றப்பட்டது.

இந்த அவசர சட்டம் சில சட்ட சிக்கல்களை எதிர்கொண்டது. நீதிமன்றங்களில் வழக்குகள் தொடரப்பட்டன. இதனால் இந்த இடஒதுக்கீட்டுக்கான அவசரச் சட்டம் 2014ல் காலாவதியான நிலையில், இட ஒதுக்கீடு எதுவும் வழங்கப்படவில்லை. இருப்பினும், சான்றளிப்பு முறை தொடர்ந்த நிலையில், தற்போது அதையும் மகாராஷ்டிர அரசு ரத்து செய்தது. இந்தச் சூழலில் தான் மகாராஷ்டிராவில் இப்போது இஸ்லாமியர்களுக்கான இட ஒதுக்கீட்டை பாஜக அரசு ரத்து செய்துள்ளது.

இந்நிலையில் தான் இஸ்லாமியர்களுக்கான இடஒதுக்கீட்டை நீக்கிய மகாராஷ்டிரா அரசுக்கு தமிழக முதல்வர் முக ஸ்டாலின் கடும் கண்டனம் தெரிவித்துள்ளார். இதுபற்றி அவர் தனது எக்ஸ் வலைதள பக்கத்தில், ‛‛மகாராஷ்டிராவில் பிற்படுத்தப்பட்ட முஸ்லீம்களுக்கான இடஒதுக்கீட்டை நீக்கிய பா.ஜ.க! இதைத்தான் இந்தியா முழுவதும் செய்யத் துடிக்கிறார்கள்.

அண்மையில் மறைந்த மகாராஷ்டிர துணை முதலமைச்சர் அஜித் பவார் அவர்கள் 2014-இல் பிற்படுத்தப்பட்ட முஸ்லீம்களுக்கு 5% இடஒதுக்கீடு அளிக்கும் முடிவை எடுத்தார். அவர் மறைந்த துயரம் அனைவரின் மனதில் இருந்தும் அகல்வதற்குள் அவர் எடுத்த முடிவை நீக்கியுள்ளது சிறுபான்மையினர் வெறுப்பில் ஊறிப்போன பா.ஜ.க.!

இதுதான் இஸ்லாமிய மக்களுக்கு சிறுபான்மையினருக்கு எதிரான பாஜக அறிவித்திருக்கும் ரம்ஜான் பரிசா? தப்பித் தவறிக் கூட தமிழ்நாட்டுக்குள் NDA வரவே கூடாதென ஏன் சொல்கிறேன் புரிகிறதா? வந்தால் நம் அனைவரின் இடஒதுக்கீடும் காலி! இவர்களுக்கு ஒருநாளும் வளர்ச்சி அரசியல் தெரியாது; தெரிந்ததெல்லாம் மதவெறி சூழ்ச்சி அரசியல் மட்டும்தான் இத்தகைய வெறுப்பு எஞ்சின்கள் தமிழ்நாட்டில் ஓட அனுமதிக்க மாட்டோம்! "தமிழ்நாடா NDA-வா?" எனும் 2026 ஜனநாயகப் போரில் தமிழ்நாடே வெல்லும்!'' என்று கூறியுள்ளார்.

English summary

Tamil Nadu CM MK stalin condemned BJP scraps reservation for backward Muslims in Maharashtra. He says This is the blueprint they want to impose across India. Is this the Ramzan gift that Anti minority BJP announces to Muslims?.