நாளை மாலை திமுகவில்.. இணையும் மநீம மகேந்திரன்.. கொங்கு மண்டலத்தை பலப்படுத்த சூப்பர் பிளான்

Updated: Wednesday, July 7, 2021, 18:54 [IST]

Subscribe to Oneindia Tamil

சென்னை: மக்கள் நீதி மய்யத்திலிருந்து விலகிய மகேந்திரன் நாளை மாலை 5 மணிக்குச் சென்னை அண்ணா அறிவாலயத்தில் ஸ்டாலின் முன்னிலையில் திமுகவில் இணைகிறார்.

நடந்து முடிந்த சட்டசபைத் தேர்தலில் கமல்ஹாசனின் மக்கள் நீதி மய்யம் முதல்முறையாகப் போட்டியிட்டது. இதில் சமக, ஐஜேகே ஆகிய கட்சிகளுடன் கூட்டணி அமைத்துப் போட்டியிட்டது.

இதில் போட்டியிட்ட அனைத்து தொகுதிகளிலும் மக்கள் நீதி மய்யம் படுதோல்வி அடைந்தது. அக்கட்சியின் தலைவர் கமல்ஹாசனும் கூட கோவை தெற்கு தொகுதியில் வானதி சீனிவாசனிடம் தோல்வியடைந்தார்

மக்கள் நீதி மய்யம்

சட்டசபைத் தேர்தலில் அடைந்த தோல்விக்குப் பிறகு அக்கட்சியின் முக்கிய நிர்வாகிகள் பலரும் கட்சியிலிருந்து விலகினர். மநீம நிர்வாகிகள் பொன்ராஜ், சிகே குமரவேல், மௌரியா, சந்தோஷ்பாபு எனப் பலரும் கட்சியிலிருந்து விலகினர். குறிப்பாக. கட்சியில் கமலுக்கு அடுத்து முக்கியமான முகமாக அறியப்பட்ட அக்கட்சியின் துணைத் தலைவர் மகேந்திரனும் விலகியது பெரும் பரபரப்பைக் கிளப்பியிருந்தது.

மகேந்திரன்

கட்சியில் ஜனநாயகம் இல்லை என்றும் கட்சி நிர்வாகிகளின் குரலுக்கு மதிப்பளிப்பதில்லை என்றும் கடுமையாக விமர்சனங்களை அவர் முன் வைத்தார். தேர்தல் முடிவிற்குப் பின் கமல்ஹாசன் மாறுவார் என்று எதிர்பார்த்தேன். ஆனால் அவர் மாறவில்லை என்றும் அடுக்கடுக்கான குற்றச்சாட்டுகளை முன் வைத்தார். அதேநேரம் தொடர்ந்து அரசியலில் கண்டிப்பாகப் பயணிப்பேன் என்றும் அவர் குறிப்பிட்டிருந்தார், அப்போதே அவர் திமுகவில் இணைய உள்ளதாகத் தகவல்கள் பரவின.

திமுகவில் இணைகிறார்

இந்நிலையில், மக்கள் நீதி மய்யத்திலிருந்து விலகிய மகேந்திரன் நாளை திமுகவில் இணைகிறார். நாளை மாலை ஐந்து மணிக்குச் சென்னை அண்ணா அறிவாலயத்தில் ஸ்டாலின் முன்னிலையில் மகேந்திரன் திமுகவில் இணைகிறார். கொங்கு மண்டலத்தில் மநீம-வின் முகமாக இருந்த மகேந்திரனின் வருகை திமுகவை அங்கு வலுப்படுத்தும்.

கொங்கு மண்டலம்

கொங்கு மண்டலத்தில், திமுக பலவீனமாக உள்ளது. கடந்த சட்டசபைத் தேர்தலிலும்கூட கொங்கு மண்டலத்தில் பல இடங்களில் திமுக தோல்வியடைந்திருந்தது. குறிப்பாகக் கோவை மாவட்டத்தில் ஒரு இடத்திலும்கூட திமுக வெல்ல முடியவில்லை. இந்தச் சூழ்நிலையில், மகேந்திரன் திமுகவில் இணைவது கொங்கு மண்டலத்தில் நிச்சயம் இருப்பை வலுப்படுத்தும் என்பதில் சந்தேகமில்லை.