மல்லை சத்யா எவ்வளவோ மேல்.. வைகோ இப்படி செய்யலாமா? கல்லாப்பெட்டி கூட்டணி அது: போட்டு தாக்கிய பிரபலம்
சென்னை: மதிமுகவை கலைத்துவிட்டுத் தமிழக வெற்றிக் கழகத்தில் போய் வைகோ இணைந்து விட வேண்டியதுதானே? அங்கே சென்று அவைத் தலைவராகப் பொறுப்பேற்றுக் கொள்ளலாம். மகனை தமிழக வெற்றிக் கழகத்தின் இளைஞரணித் தலைவராகப் போடச் சொல்லுங்கள். உங்களுக்கு எதற்குத் தனியாகக் கட்சி? அடிக்கடி மாறுகின்ற கட்சி உங்களுக்கு எதற்கு?" என்று பிரபல அரசியல் விமர்சகர் டாக்டர் பொன்ராஜ் காரசாரமாக கேள்விகளை எழுப்பியுள்ளார்.
தமிழக அரசியல் களம் தற்போது புதிய கூட்டணிகள் மற்றும் அரசியல் நகர்வுகளால் பெரும் பரபரப்பைச் சந்தித்து வருகிறது. குறிப்பாக, தவெக ஆட்சி அமைந்த பிறகு, முந்தைய கூட்டணிகளில் ஏற்பட்ட மாற்றங்கள் விவாதப் பொருளாக மாறியுள்ளன.
பொன்ராஜ் கேட்ட கேள்வி
இப்படிப்பட்ட சூழலில், முன்னணி அரசியல் விமர்சகரும் பிரபலமுமான டாக்டர் பொன்ராஜ், நேர்காணல் ஒன்றில் பங்கேற்று, தற்போதைய அரசியல் நிலவரங்கள் குறித்தும், மறுமலர்ச்சி திராவிட முன்னேற்றக் கழகத்தின் பொதுச்செயலாளர் வைகோவின் அரசியல் நிலைப்பாடுகள் குறித்தும் தனது கடுமையான விமர்சனங்களை முன்வைத்துள்ளார்.
பொன்ராஜ் பேசும்போது, "கல்லாப்பட்டி கூட்டணிதானே அது? தீய சக்தியினுடைய கல்லாப்பட்டி கூட்டணி! வைகோவும் உதய சூரியன் சின்னத்தில் நின்றுவிட்டு, பேசாமல் கட்சியைக் கலைத்துவிட்டு தவெகவிலேயே ஜாயின் பண்ண வேண்டியதுதானே? அங்காவது அவர்களுக்கு அவைத் தலைவர் பதவியையாவது வழங்குவார்கள் அல்லவா?
உதயசூரியன் சின்னம் - வைகோ
தீய சக்தியினுடைய இந்தச் சுயநலக் கூட்டணியில், எந்தவிதமான தயக்கமும் இல்லாமல் அங்கே சென்று ஆதரவு அளித்துவிட்டுப் பலரும் அமர்ந்திருக்கிறார்கள். அப்படியென்றால், வைகோவும் முந்தைய தேர்தலில் உதய சூரியன் சின்னத்தில் போட்டியிட்டுவிட்டு, பேசாமல் தனது கட்சியைக் கலைத்துவிட்டுத் தமிழக வெற்றிக் கழகத்திலேயே நேரடியாக இணைந்துவிடலாம் அல்லவா?
இந்த வயதில் பதவிக்காகவும், பணத்திற்காகவும், கொள்கையை அடகு வைத்துவிட்டு நீங்கள் இப்படிச் செய்து கொண்டிருக்கிறீர்கள். இவரை விட மல்லை சத்யா அவர்களும், அவருக்குப் பின்னால் இருக்கும் தொண்டர்களும் எவ்வவளோ மேலானவர்கள்.
நியூட்ரினோ திட்டத்தை வைகோ தடுத்தாரா
நாட்டின் நாசகார திட்டமான நியூட்ரினோ திட்டத்தை வைகோ அன்று தடுத்து நிறுத்தினாரா? நேற்று வந்து பேட்டி அளிக்கிறார், நியூட்ரினோ திட்டம் என்பது ஒரு அருமையான திட்டம் என்றும், தமிழ்நாடு அதன் மூலம் பயனடைய வேண்டிய திட்டம் என்றும் சொல்கிறார்.
இந்த நியூட்ரினோ திட்டத்தை விரட்டி, தமிழ்நாட்டின் படித்த இளைஞர்களுடைய அறிவியல் சார்ந்த, ஆராய்ச்சி சார்ந்த வேலைவாய்ப்பைக் கெடுத்தவரே வைகோதான். இதனை மக்கள் நன்றாகப் புரிந்து கொள்ளுங்கள், வேலைவாய்ப்பைக் கெடுத்தவர் இந்த வைகோ. இன்றைக்கு வந்து இவர் ஏதோ பெரிய சாதனை செய்தது போலப் பேசுகிறார்.
பேசாமல் கட்சியைக் கலைத்துவிட்டு அங்கே சென்று இணைந்துவிடுங்கள். உங்களையெல்லாம் ஒரு மிகப்பெரிய தலைவராக நான் நினைத்துக் கொண்டிருந்தேன். துரை வைகோவும் திமுகவிற்குப் பின்னால் போய் நின்று கொண்டு... இந்த வயதில் நீங்கள் என்ன மாதிரியான நிலைப்பாட்டை எடுக்கிறீர்கள்? பதவிக்காகவும், பணத்திற்காகவும், உங்களுடைய கொள்கையை அடகு வைத்துவிட்டு நீங்கள் இதனைச் செய்து கொண்டிருக்கிறீர்கள்.
கல்லாப்பெட்டி கூட்டணி
கம்யூனிஸ்ட் கட்சியினர் வெளியிலிருந்து ஆதரவு கொடுக்கிறார்கள், விடுதலைச் சிறுத்தைகள் கட்சியினர் உள்ளிருந்து ஆதரவு கொடுக்கிறார்கள், இந்திய யூனியன் முஸ்லிம் லீக் கட்சியினரும் உள்ளிருந்து ஆதரவு கொடுக்கிறார்கள். அவர்கள் அனைவரும் திமுக கூட்டணியை விட்டு வெளியேறிவிட்டார்கள், அக்கூட்டணி முற்றிலும் முடிந்துவிட்டது. இனி அங்கே கூட்டணி இல்லை என்று அவர்களே அதிகாரப்பூர்வமாக அறிவித்துவிட்டார்கள்.
ஆனால் மதிமுக யாரை ஏமாற்றப் பார்க்கிறது? உங்களுடைய தகுதிக்கும், தரத்திற்கும், உங்களுடைய வயதிற்கும் இந்தச் செயல் அழகானதுதானா? சொல்லுங்கள். பதவிக் காசிற்காகவும், பணத்திற்காகவும் நீங்களும் உங்களுடைய மகனும் இன்றைக்கு ஒட்டுமொத்த மறுமலர்ச்சி திராவிட முன்னேற்றக் கழகத்தையே அடகு வைத்திருக்கிறீர்கள்.
கட்சியைக் கலைத்துவிட்டுத் தமிழக வெற்றிக் கழகத்தில் போய் இணைந்துவிடுங்கள். அங்கே சென்று அவைத் தலைவராகப் பொறுப்பேற்றுக் கொள்ளுங்கள். உங்களுடைய மகனைத் தமிழக வெற்றிக் கழகத்தின் இளைஞரணித் தலைவராகப் போடச் சொல்லுங்கள். உங்களுக்கு எதற்குத் தனியாகக் கட்சி? அடிக்கடி மாறுகின்ற கட்சி உங்களுக்கு எதற்கு?" என்று காரசாரமாகக் கேள்வி எழுப்பியுள்ளார்.
Click it and Unblock the Notifications
Sign in with Google