காங்கிரஸ் கட்சியின் தமிழக தேர்தல் பொறுப்புகளில் இருந்து விலகியது ஏன்? மாணிக்கம் தாகூர் விளக்கம்!

Updated: Thursday, April 2, 2026, 15:45 [IST]

Subscribe to Oneindia Tamil

சென்னை: விருதுநகர் நாடாளுமன்றத் தொகுதிக்கு உட்பட்ட 6 தொகுதிகளிலும் திமுக மற்றும் கூட்டணி கட்சி வேட்பாளர்களின் வெற்றிக்காக பணியாற்ற கண்டிப்பாக நானும் வருவேன் என்று காங்கிரஸ் எம்பி மாணிக்கம் தாகூர் தெரிவித்துள்ளார். அதேபோல் காங்கிரஸ் கட்சியின் மாநில அளவிலான தேர்தல் பொறுப்புகளில் இருந்து மார்ச் 28ஆம் தேதியே விலகிவிட்டேன் என்றும் மாணிக்கம் தாகூர் கூறியுள்ளார்.

தமிழ்நாட்டில் சட்டசபைத் தேர்தலுக்கு இன்னும் 21 நாட்களே இருக்கும் நிலையில், காங்கிரஸ் கட்சி சார்பாக இதுவரை வேட்பாளர்கள் பட்டியல் கூட வெளியிடப்படவில்லை. திமுக சார்பாக ஒதுக்கீடு செய்யப்பட்ட 28 தொகுதிகளால், காங்கிரஸ் எம்பிக்கள் பலரும் அதிருப்தி தெரிவித்து வருகின்றனர். இதனால் காங்கிரஸ் மையக்குழு கூட்டத்தில் ராகுல் காந்தி முன்னிலையிலேயே காரசார விவாதம் நடந்திருக்கிறது.

அதுமட்டுமல்லாமல் பணத்தை பெற்றுக் கொண்டு காங்கிரஸ் கட்சியில் எம்எல்ஏ சீட் கொடுப்பதாக குற்றச்சாட்டுகளும் எழுந்துள்ளன. இதனிடையே நேற்று தமிழ்நாடு தேர்தல் பொறுப்பில் இருந்தும், ஒருங்கிணைப்புக் குழு பொறுப்பில் இருந்து காங்கிரஸ் எம்பி மாணிக்கம் தாகூர் விலகி இருப்பது தெரிய வந்துள்ளது. காங்கிரஸ் வேட்பாளர்கள் பட்டியலால் எழுந்த அதிருப்தியே இதற்கு காரணமாக சொல்லப்படுகிறது.

இதுதொடர்பாக காங்கிரஸ் எம்பி மாணிக்கம் தாகூர் விளக்கம் கொடுத்துள்ளார். அதில் மாணிக்கம் தாகூர், ஒரு குழப்பம் தேவையில்லாமல் பேசப்பட்டு வருகிறது. காங்கிரஸ் கட்சியில் தேர்தல் சம்மந்தப்பட்ட மாநில அளவிலான பொறுப்புகள் எனக்கு வழங்கப்பட்டிருந்தது. அந்த பொறுப்பில் தொடர விரும்பவில்லை என்று அகில இந்திய காங்கிரஸ் தலைவர் கார்கேவிடம் கூறிவிட்டேன்.

மார்ச் 28ஆம் தேதி இதுதொடர்பாக கூறிவிட்டேன். அதனைப் பற்றி விவாதங்கள் தேவையில்லாதது. என்னை பொறுத்தரவரை மதச்சார்பற்ற முற்போக்கு கூட்டணி வெற்றிபெற வேண்டும். அதற்காக எம்பி என்ற முறையில் விருதுநகர் நாடாளுமன்றத் தொகுதியில் பணியாற்றுவேன். நாடாளுமன்ற கொறடா பணி முடிவடைந்த பின் தேர்தல் பணிகளில் கவனம் செலுத்துவேன்.

மதுரையின் திருப்பரங்குன்றம், திருமங்கலம் மற்றும் விருதுநகர் மாவட்டத்தின் விருதுநகர், சிவகாசி, சாத்தூர், அருப்புக்கோட்டை தொகுதியில் என் உழைப்பு தொடரும். காங்கிரஸ் மற்றும் கூட்டணி கட்சி தோழர்களுடன் இணைந்து பணியாற்றி 6க்கு 6 தொகுதிகளிலும் வெற்றிபெற வைப்பதற்காக நானும் வந்து சேர்வேன் என்று தெரிவித்துள்ளார்.