கண்ணீர் வழிய தந்தைக்கு இறுதிச் சடங்கு செய்த மகள்கள்.. மனோஜ் உடலுக்கு கொள்ளி வைத்த சித்தப்பா மகன்!

சென்னை: மனோஜ் உடலுக்கு பாரதிராஜாவின் தம்பி ஜெயராஜின் மகன் வினோத் கொள்ளி வைத்தார். தமது தந்தைக்கு மனோஜின் மகள்கள் கண்ணீர் மல்க கொள்ளிக்குடம் தூக்கி இறுதிச்சடங்கு செய்தனர்.

இயக்குநர் பாரதிராஜாவின் மகன் மனோஜ் பாரதிராஜா (48) நேற்று (மார்ச் 25) மாரடைப்பால் காலமானார். மாரடைப்பால் காலமான மனோஜ் பாரதிராஜாவின் உடல் நீலாங்கரை வீட்டில் இருந்து ஊர்வலமாக எடுத்துச் செல்லப்பட்டு பெசன்ட் நகர் மின் மயானத்தில் இன்று மாலை தகனம் செய்யப்பட்டது.

'தாஜ்மஹால்', 'அல்லி அர்ஜூனா', 'வருஷமெல்லாம் வசந்தம்', 'விருமன்', 'மாநாடு' உள்ளிட்ட பல்வேறு படங்களில் நடித்தவர் மனோஜ். இயக்குநர் பாரதிராஜாவின் மகனான இவருக்கு நடிப்பை விட இயக்குநர் ஆவதில் தான் விருப்பம் என பல பேட்டிகளில் தெரிவித்திருந்தார்.

மணிரத்னத்தின் பம்பாய் படத்தில் உதவி இயக்குநராக பணியாற்றியுள்ளார் மனோஜ். பல படங்களில் நடித்த பின்பு ஷங்கரின் எந்திரன் படத்தில் மீண்டும் உதவி இயக்குநராக பணியாற்றி இருந்தார். மேலும் 2023ஆம் ஆண்டு சுசீந்திரன் கதையில் வெளியான 'மார்கழி திங்கள்' படம் மூலம் இயக்குநராக அவதாரம் எடுத்திருந்தார். இப்படத்தில் தனது தந்தை பாரதிராஜாவை முக்கிய கதாபாத்திரத்தில் நடிக்க வைத்து இயக்கியிருந்தார்.

'சிகப்பு ரோஜாக்கள்' படத்தின் 2 ஆம் பாகத்தை உருவாக்க வேண்டும் என்பது மனோஜின் ஆசை. ஆனால் அந்த ஆசை இறுதி வரை நிறைவேறவில்லை. 48 வயதான மனோஜுக்கு ஒரு மாதத்திற்கு முன்பு மனோஜுக்கு இதய அறுவை சிகிச்சை நடைபெற்றது. பின்னர் ஓய்வில் இருந்து வந்த மனோஜ் நேற்று மாரடைப்பால் காலமானார். அவரது மறைவு திரையுலகில் பெரும் சோகத்தை ஏற்படுத்தியுள்ளது.

மனோஜ் பாரதிராஜாவின் உடல் சென்னை நீலாங்கரையில் உள்ள வீட்டில் பொதுமக்கள் அஞ்சலிக்காக வைக்கப்பட்டது. ஏராளமான திரையுலகினர், அரசியல் பிரமுகர்கள் நேரில் அஞ்சலி செலுத்தினர். முதல்வர் மு.க.ஸ்டாலின், துணை முதல்வர் உதயநிதி ஸ்டாலின் உள்பட பலரும் மனோஜ் பாரதிராஜா உடலுக்கு அஞ்சலி செலுத்தினர்.

இந்நிலையில் அவரது உடல் நீலாங்கரை வீட்டில் இருந்து ஊர்வலமாக பெசன்ட் நகர் மின் மயானத்துக்கு எடுத்துச் செல்லப்பட்டது. அங்கு அவருக்கு இறுதி மரியாதை செய்யப்பட்டது. மனோஜின் மகள்கள் அவருக்கு கொள்ளிக் குடம் தூக்கி இறுதிச் சடங்கு செய்தனர். ஆழ்ந்த சோகத்தில் நாற்காலியில் அமர்ந்திருந்த பாரதிராஜாவை அவரது உறவினர்கள் இறுதி சடங்குகளை செய்ய வைத்தனர்.

இதையடுத்து மின் மயானத்தில், மனோஜ் உடலுக்கு, பாரதிராஜாவின் தம்பி ஜெயராஜின் மகன் வினோத் கொள்ளி வைக்க, மனோஜின் உடல் தகனம் செய்யப்பட்டது. அனைவரும் கூடி நின்று கண்ணீர் வழிய மனோஜுக்கு பிரியாவிடை அளித்தனர்.

English summary

Vinod, son of Bharathiraja's younger brother Jayaraj, performed the funeral pyre for Manoj. Manoj's daughters carried the pyre for their father and performed the last rites.