தமிழ்நாட்டில் நடக்கும்.. FIH ஹாக்கி ஆடவர் ஜூனியர் உலகக் கோப்பை 2025.. தரமாக செய்யப்பட்ட ஏற்பாடுகள்

Updated: Thursday, November 27, 2025, 14:33 [IST]

Subscribe to Oneindia Tamil

சென்னை: பெரிய அளவில் எதிர்பார்க்கப்பட்ட FIH ஹாக்கி ஆடவர் ஜூனியர் உலகக் கோப்பை தமிழ்நாடு 2025 போட்டி சென்னை மற்றும் மதுரையில் நவம்பர் 28 முதல் டிசம்பர் 10 வரை நடைபெறவுள்ளது.

தமிழ்நாடு விளையாட்டு துறையில் தொடர்ந்து முன்னேறி வருகிறது. தேசிய அளவிலான, சர்வதேச அளவிலான போட்டிகளை தொடர்ந்து தமிழ்நாடு அரசு சிறப்பாக நடத்தி வருகிறது. ஏற்கனவே Fide chess world cup, சர்வதேச பீச் வாலிபால் போட்டி போன்ற போட்டிகளை சிறப்பாக நடத்தி தமிழக அரசு கவனம் பெற்றுள்ளது. அந்த வகையில் தற்போது FIH ஹாக்கி ஆடவர் ஜூனியர் உலகக் கோப்பை 2025 தமிழ்நாட்டில் நடந்து வருகிறது.

தமிழ்நாடு சிறப்பான ஏற்பாடு

தமிழ்நாடு அரசு இதற்கான ஏற்பாடுகளை சிறப்பாக செய்துள்ளது. போட்டிகளுக்கான தயார் நிலையும், அணிகள் தங்குவதற்கான வசதியும் சிறப்பாக ஏற்பாடு செய்யப்பட்டு உள்ளது. இந்தப் போட்டியில் பங்கேற்பதற்காக சீன அணி சென்னை வந்தடைந்தது. இவர்களுடன், 24 நாடுகளின் அணிகளும் இந்தியாவுக்கு வந்துள்ளதால், இந்த மதிப்புமிக்க உலக நிகழ்வுக்கான இறுதி ஏற்பாடுகள் முழுமையடைந்துள்ளன.

ஜூனியர் உலகக் கோப்பையில் சீனா முதன்முறையாக களமிறங்குகிறது. முதல் போட்டியிலேயே வலுவான தாக்கத்தை ஏற்படுத்த அவர்கள் தீவிரமாக முயற்சி செய்வார்கள். சி பிரிவில் ஜப்பான், நியூசிலாந்து, அர்ஜென்டினா ஆகிய நாடுகளுடன் சீன அணி இடம் பெற்றுள்ளது. நவம்பர் 28 அன்று சென்னையில் நியூசிலாந்து அணிக்கு எதிராக முதல் போட்டியில் களமிறங்கும் சீனா, தனது வரலாற்றுப் பயணத்தை வெற்றிகரமாகத் தொடங்க இலக்கு நிர்ணயித்துள்ளது.

சீன அணியின் பயிற்சியாளர் யாங்சின் சூய் வருகை குறித்து பேசுகையில், "இந்தத் தொடரில் நாங்கள் முதல்முறையாக பங்கேற்பது பெருமையாக உள்ளது. இது ஹாக்கியில் எங்கள் நாட்டின் வளர்ச்சிக்கு ஒரு சான்று. ஒவ்வொரு போட்டியையும் தனித்தனியாக அணுகி, முடிந்தவரை சிறப்பாக விளையாட முயற்சிப்போம். முடிவுகளை விட செயல்முறையில் கவனம் செலுத்துவதால், வீரர்கள் ஒவ்வொரு வாய்ப்பையும் பயன்படுத்திக் கொள்ள வேண்டும்" என்று குறிப்பிட்டார்.

FIH ஹாக்கி ஆடவர் ஜூனியர் உலகக் கோப்பை தமிழ்நாடு 2025 போட்டிகளின் நேரடி ஒளிபரப்பு JioCinema-வில் ஒளிபரப்பாகும் என்பது குறிப்பிடத்தக்கது.