சவுதி அரேபியாவில் கேன்சல் ஆன அமைச்சர் மஸ்தான் புரோகிராம்! 30,000 ரியால் வீண்! பின்னணி என்ன?

சென்னை: சவுதி அரேபியாவில் அமைச்சர் செஞ்சி மஸ்தான் கலந்து கொள்ளவிருந்த 'தமிழர்கள் சங்கமம்' நிகழ்ச்சி திடீரென ரத்து செய்யப்பட்டதால் 30,000 ரியால் வரை வீணாகியுள்ளது. இது இந்திய மதிப்பிற்கு சுமார் ஆறரை லட்சம் ரூபாய் என்பது குறிப்பிடத்தக்கது.

சவுதி அரேபியாவில் உள்ள மக்கா, மதினாவுக்கு சிறுபான்மை நலத்துறை அமைச்சர் மஸ்தான் புனித உம்ரா பயணம் சென்றிருந்தார். அந்தப் பயணத்தின் ஒரு பகுதியாக ரியாத்தில் தமிழர்கள் சங்கமம் என்ற நிகழ்ச்சியில் பங்கேற்க இசைவு தெரிவித்திருந்தார் அமைச்சர் மஸ்தான்.

அதற்கேற்ப தமிழக கலாச்சார மைய நிர்வாகிகள் சார்பில் இதற்கான ஏற்பாடுகள் செய்யப்பட்டன. அமைச்சரை விமான நிலையத்திலிருந்து அழைத்து வரவும், மீண்டும் அழைத்துச் செல்லவும் சொகுசு கார், தங்குவதற்கு 5 நட்சத்திர விடுதிகள் எல்லாம் ஏற்பாடு செய்யப்பட்டன. அமைச்சர் தரப்பும் தமிழர்கள் சங்கமம் நிகழ்ச்சியில் பங்கேற்க ஆவலுடன் இருந்தது.

இந்தச் சூழலில் லண்டனை சேர்ந்த திமுக பிரமுகர் போட்ட சில கன்டிஷன்கள் 'தமிழர்கள் சங்கமம்' நிகழ்ச்சியை ஏற்பாடு செய்திருந்த தமிழக கலாச்சார மைய நிர்வாகிகளுக்கு கடும் கோபத்தை ஏற்படுத்தியதாக தெரிவிக்கப்படுகிறது. இதனால் அவர்கள் கூடி பேசி, நாம் செலவு செய்தது வீணாகப் போனாலும் பரவாயில்லை, லண்டன் பிரமுகர் போடும் கண்டிஷன்களை எல்லாம் ஏற்க முடியாது என தீர்க்கமாக முடிவெடுத்துள்ளனர்.

அதனடிப்படையில் விழாவுக்காக 30,000 ரியால் செய்யப்பட்ட போதும் தமிழர்கள் சங்கமம் நிகழ்ச்சியை ரத்து செய்வதாக அறிவித்து அமைச்சர் மஸ்தானுக்கு அதிர்ச்சியை கொடுத்தனர். இதனிடையே புனித பயணத்தில் இருந்த போது தான் மகன் மீதும் மருமகன் மீதும் கட்சித் தலைமை நடவடிக்கை எடுத்ததால் அந்த அப்செட்டில் இருந்த மஸ்தானும் நேராக சவுதியிலிருந்து சென்னை திரும்பிவிட்டார்.

இதனிடையே இந்த விவகாரத்தை சவுதி அரேபியாவில் உள்ள தமிழக கலாச்சார மைய நிர்வாகிகள் முதலமைச்சர் ஸ்டாலின் கவனத்திற்கும் கொண்டு செல்லும் முயற்சியில் ஈடுபட்டுள்ளனர்.

English summary

In Saudi Arabia, Minister Masthan 'Tamil Sangamam' event was wasted up to 30,000 Riyal due to the sudden cancellation of the event.