சி.எம்.டி.ஏ. வரலாற்றிலேயே இது முதல்முறை! வேற லெவலுக்கு மாறப்போகும் சென்னை! சேகர்பாபு பெருமிதம்!
சென்னை: சென்னை பெருநகர வளர்ச்சி குழுமத்தின் வரலாற்றில் இல்லாத வகையில் மேம்பாட்டுப் பணிகள் வேகப்படுத்தப் பட்டுள்ளதாக அமைச்சர் சேகர்பாபு தெரிவித்துள்ளார்.
சென்னை தி.நகரில் ரூ.10 கோடி மதிப்பீட்டில் கிரிக்கெட் மைதானம், டென்னிஸ் கோர்ட், ஜிம், ஈசிஆரில் 5 கிமீ தூரத்துக்கு சைக்கிளிங் செல்ல தனி மிதிவண்டி பாதை என ஏராளமான பணிகள் துரிதமாக நடந்து வருகிறது எனக் கூறுகிறார்.
சென்னையின் புதிய அடையாளங்களை உருவாக்கும் பணியில் ஈடுபட்டு வரும் அமைச்சர் சேகர்பாபு இது குறித்து கூறியிருப்பதாவது;
சென்னை பெருநகர வளர்ச்சி குழுமத்திற்கு அறிவிக்கப்பட்ட 50 அறிவிப்புகளையும் முதலமைச்சர் விரைவாக செயல்படுத்த வேண்டுமென்ற உத்தரவிட்டுள்ளார். அதன் அடிப்படையில் 50 இடங்களையும் நேரடியாக சென்று கள ஆய்வு செய்ய முடிவு செய்து 22 இடங்களில் கள ஆய்வு செய்திருக்கின்றோம்.
கோயம்பேடு பாலத்திற்கு கீழே இருக்கின்ற நெடுஞ்சாலைத்துறைக்கு சொந்தமான 2 ஏக்கர் நிலப்பரப்பில் ரூ.10 கோடி மதிப்பீட்டில் இயற்கை வனப்புடன் பூங்கா அமைப்பதற்கு முடிவெடுத்திருக்கின்றோம்.
அதேபோல, சென்னை, தியாகராய நகர், சோமசுந்தரம் விளையாட்டு மைதானத்தில் சுமார் 5 ஏக்கர் நிலப்பரப்பளவில் கிரிக்கெட் விளையாடுவதற்கு என்று தனி மைதானம், டென்னிஸ் கோர்ட் மற்றும் பூங்கா வசதி, உடற்பயிற்சி கூடம் போன்றவற்றை ரூ.10 கோடி மதிப்பீட்டில் ஏற்படுத்துவதற்கு திட்டமிட்டிருக்கின்றோம்.
அதன் தொடர்ச்சியாக சென்னை, மயிலாப்பூர் முண்டகக்கண்ணி அம்மன் கோவில் அருகிலுள்ள மாநகராட்சி விளையாட்டு மைதானத்தில் ரூ.2.50 கோடி மதிப்பீட்டில் உள் விளையாட்டு அரங்கம் மற்றும் ஒரு மினி விளையாட்டு மைதானத்தை உருவாக்க திட்டமிட்டிருக்கின்றோம்.
சென்னை பெருநகர வளர்ச்சி குழுமத்தின் வரலாற்றில் இதுபோன்று மேற்கொள்ளப்படுகின்ற மேம்பாட்டுப் பணிகள் உடனடியாக துரிதப்படுத்தக்கூடிய நடவடிக்கை திமுக ஆட்சியில் தான் நடந்திருக்கின்றன.
இவைகள் இல்லாமல் அறிவிக்கப்பட்டிருக்கின்ற மெகா திட்டங்கள் நம்முடைய சென்னை தீவுத்திடலில் உள்ள சுற்றுலா பொருட்காட்சியில் உள் விளையாட்டு அரங்கம் அமைத்தல், கிழக்கு கடற்கரை சாலையிலே 5 கிலோ மீட்டர் நீளத்திற்கு மிதிவண்டி பாதை அமைத்தல், மகாபலிபுரத்தில் பேருந்து நிலையம் அமைத்தல் போன்ற பணிகளும் இதில் எடுத்துக்கொள்ளப்பட்டுள்ளன.
Click it and Unblock the Notifications
Sign in with Google