தமிழக மின்வாரிய காலிப்பணியிடங்கள் விரைவில் நிரப்பப்படும்... அமைச்சர் செந்தில்பாலாஜி தகவல்..!
சென்னை: தமிழக மின்வாரியத்தில் உள்ள காலிப்பணியிடங்கள் விரைவில் நிரப்பப்படும் என மின்சாரத்துறை அமைச்சர் செந்தில்பாலாஜி தெரிவித்துள்ளார்.
தமிழ்நாடு மின்சார வாரியத்தில் 1 லட்சத்து 46 ஆயிரம் பணியிடங்கள் உள்ளன. இதில் 56 ஆயிரம் இடங்கள் காலியாக உள்ளதால் அந்த பணியிடங்களை அரசு எப்போது நிரப்பும் என்ற எதிர்பார்ப்பு மின்வாரிய பணிகளுக்காக காத்திருக்கும் லட்சக்கணக்கானவர்களுக்கு இருந்து வருகிறது.
இந்நிலையில் இது குறித்து நெல்லை மாவட்டம் பாளையங்கோட்டையில் செய்தியாளர்களை சந்தித்த போது கூறிய அமைச்சர் செந்தில்பாலாஜி, தமிழ்நாடு மின்சார வாரியத்தில் 56,000 காலிப்பணியிடங்கள் இருப்பதாகவும் தற்போதைய சூழலில் இருக்கும் பணியாளர்களை கொண்டு மின் வாரிய பணிகளை நிர்வகித்து வருவதாகவும் கூறினார்.
விரைவில் மின் வாரியத்தில் உள்ள இந்த அனைத்து காலிப்பணியிடங்களும் நிரப்பப்படும் எனக் கூறினார். மேலும், கடந்த 5 ஆண்டுகளாக தமிழகத்தில் மின்சாரத்துறை செயல்பட்டதா என்பதே கேள்விக்குறியாக உள்ளதாகவும் எந்தப் பணிகளும் கடந்த அதிமுக ஆட்சிக்காலத்தில் நடைபெற்றதாக தெரியவில்லை எனவும் கூறினார்.
வீடுகளில் மின் கணக்கீடு எடுக்கும் பணிகளுக்கு 50 சதவீத பணியாளர்கள் மட்டுமே இருப்பதாகவும் இதனால் அனைத்து வீடுகளிலும் ஸ்மார்ட் மீட்டர் பொருத்தும் பணிகள் நடைபெற்று வருவதாகவும் தெரிவித்தார்.
தமிழகத்தில் கடந்த 10 ஆண்டுகளில் 4 லட்சத்து 52 ஆயிரத்து 777 விவசாயிகள் மின் இணைப்புக்காக பதிவு செய்து காத்திருப்பதாகவும் தன்னை விவசாயி விவசாயி என்று மார்தட்டிக் கொண்ட எடப்பாடி பழனிசாமி, விவசாயிகளுக்கு மின் இணைப்பு வழங்காமல் வஞ்சித்து வந்ததாக குற்றஞ்சாட்டியுள்ளார்.
9498794987 என்ற ஒரே எண் மூலம் மின் துறை சார்ந்த அனைத்து புகார்களும் பெறப்பட்டு வருவதாகவும் இதுவரை 3 லட்சம் புகார்கள் கிடைக்கப்பெற்று அவற்றில் 97% தீர்வு கொடுக்கப்பட்டுள்ளதாகவும் அமைச்சர் செந்தில்பாலாஜி கூறினார்.
இதனிடையே மின் வாரியத்தில் உள்ள காலிப்பணியிடங்கள் நிரப்பப்படும் என்ற அமைச்சரின் அறிவிப்பு லட்சக்கணக்கான இளைஞர்களையும், மின் வாரியத்தில் பணி எதிர்பார்ப்போரையும் மகிழ்ச்சி கொள்ளச் செய்துள்ளது.
முதலமைச்சர் அறிவித்துள்ள படி லஞ்ச லாவண்யங்களை தவிர்த்து, தகுதி மற்றும் திறமையை மட்டுமே அடிப்படையாக கொண்டு இந்த பணியிடங்கள் நிரப்பப்பட வேண்டும் என்பது அனைவரது எதிர்பார்ப்பாக உள்ளது.
Click it and Unblock the Notifications
Sign in with Google