அயோத்தி ராமர் கோவில் மோசடி.. ஆதாரங்களை அழிக்க மொபைல்களை ஃபார்மேட் செய்த குற்றவாளிகள்!
அயோத்தி: உத்தரப் பிரதேச மாநிலம் அயோத்தியில் உள்ள புகழ்பெற்ற பிரசித்தி பெற்ற ராமர் கோவிலுக்குப் பக்தர்கள் வழங்கிய நன்கொடை பணத்தில் பெரும் மோசடி நடந்துள்ளதாகப் புகார்கள் எழுந்தன. இந்த விவகாரம் நாடு முழுவதும் பெரும் அதிர்ச்சியை ஏற்படுத்திய நிலையில், வழக்கை விசாரித்து வரும் சிறப்பு புலனாய்வுக் குழு (SIT) மற்றும் உள்ளூர் காவல்துறையினர் தங்கள் விசாரணையை தீவிரப்படுத்தியுள்ளனர்.
இந்த வழக்கின் முக்கிய திருப்பமாக, கைது செய்யப்பட்டுள்ள 8 பேரின் வீடுகளிலும் ஞாயிற்றுக்கிழமை ஒரே நேரத்தில் அதிரடி சோதனைகள் (Raids) நடத்தப்பட்டன. நீதிபதிகள் (Magistrates) முன்னிலையில் தனிப்படை போலீசார் இந்த தேடுதல் வேட்டையை நடத்தினர். லவ்குஷ் மிஸ்ரா, அவினாஷ் சுக்லா, ரமாசங்கர் யாதவ் உள்ளிட்ட முக்கிய குற்றவாளிகளின் வீடுகளில் இந்த சோதனைகள் மேற்கொள்ளப்பட்டன.
டிஜிட்டல் ஆதாரங்களை அழித்த குற்றவாளிகள்
போலீசாரின் விசாரணை மற்றும் நீதிமன்ற நடவடிக்கைகள் தீவிரமடைந்ததை உணர்ந்த குற்றவாளிகள், தங்களுக்கு எதிரான டிஜிட்டல் ஆதாரங்களை அழிக்க முயன்ற அதிர்ச்சித் தகவல் தற்போது வெளியாகியுள்ளது. முதற்கட்ட விசாரணையின்படி, குற்றம் சாட்டப்பட்டவர்களில் பலர் தங்களது மொபைல் போன்களில் இருந்த வாட்ஸ்அப் (WhatsApp) அரட்டைகள், குறுஞ்செய்திகள் மற்றும் பணப் பரிவர்த்தனை தொடர்பான முக்கியத் தரவுகளை நீக்கியுள்ளனர்.
மேலும், சிலர் ஒருபடி மேலே சென்று, காவல்துறையினரிடம் மாட்டிக் கொள்ளக் கூடாது என்பதற்காகத் தங்களது மொபைல் போன்களை முழுமையாக 'ஃபார்மேட்' (Format) செய்து ஒட்டுமொத்த சான்றுகளையும் துடைத்தெறிந்துள்ளனர். இருப்பினும், நவீன தடய அறிவியல் மற்றும் சைபர் கிரைம் தொழில்நுட்ப உதவியுடன் இந்தத் தரவுகளை மீட்டெடுக்கப் புலனாய்வுக் குழுவினர் தீவிர நடவடிக்கைகளில் ஈடுபட்டு வருகின்றனர்.
அறக்கட்டளை நிர்வாகிகள் திடீர் ராஜினாமா
இந்த ஊழல் விவகாரம் பூதாகரமாக வெடித்ததைத் தொடர்ந்து, ஸ்ரீ ராம் ஜென்மபூமி தீர்த்த க்ஷேத்ரா அறக்கட்டளையின் (Shri Ram Janmabhoomi Teerth Kshetra Trust) பொதுச் செயலாளர் சம்பத் ராய் மற்றும் அறங்காவலர் அனில் மிஸ்ரா ஆகியோர் தங்களது பதவிகளை அதிரடியாக ராஜினாமா செய்துள்ளனர். இந்த மோசடிக்கு "நெறிமுறைப் பொறுப்பேற்று" (Moral Responsibility) தாங்கள் பதவியில் இருந்து விலகுவதாக அவர்கள் அறிவித்துள்ளனர்.
முன்னதாக, ஜூன் 25-ஆம் தேதி புதிய பாரதிய நியாய சன்ஹிதா (BNS) சட்டப்பிரிவுகளின் கீழ் இந்த நிதி முறைகேடு தொடர்பாக முதல் தகவல் அறிக்கை (FIR) பதிவு செய்யப்பட்டது. அதைத் தொடர்ந்தே இந்த அதிரடி ராஜினமாக்கள் நிகழ்ந்துள்ளன.
வங்கி ஊழியர்களுக்குத் தொடர்பு
பக்தர்கள் காணிக்கையாகச் செலுத்திய தொகையைத் திட்டமிட்டு, முறையான நெட்வொர்க் மூலம் ஆன்மீகப் பணியாளர்கள் மற்றும் வங்கி அதிகாரிகள் இணைந்து சுருட்டியுள்ளது விசாரணையில் தெரியவந்துள்ளது. இந்த வழக்கில் கைது செய்யப்பட்ட 8 பேரில் அரசு ஊழியர்கள் மற்றும் பாரத ஸ்டேட் வங்கி (SBI) ஊழியர்களும் அடங்குவர்.
கடந்த வெள்ளிக்கிழமை அயோத்தி சிறப்பு நீதிமன்றம் இவர்களை ஜூன் 29 வரை நீதிமன்றக் காவலில் வைக்க உத்தரவிட்டது. இதுவரை இவர்களிடமிருந்து சுமார் 79.85 லட்சம் ரூபாய் ரொக்கம் பறிமுதல் செய்யப்பட்டுள்ளது. பணப் பரிவர்த்தனையின் முழுப் பின்னணியையும், இதில் தொடர்புடைய மற்ற நபர்களையும் கண்டறிய, குற்றவாளிகளை மீண்டும் போலீஸ் காவலில் (Custodial Remand) எடுத்து விசாரிக்கக் காவல்துறை திட்டமிட்டுள்ளது.
அரசியல் களத்தில் வெடித்த மோதல்
நாடே உற்று நோக்கும் அயோத்தி ராமர் கோவிலில் நடந்துள்ள இந்த நிதி மோசடி விவகாரம், உத்தரப் பிரதேச மாநில அரசியலிலும், தேசிய அளவிலும் பெரும் புயலைக் கிளப்பியுள்ளது. ஆளும் பாரதிய ஜனதா கட்சிக்கும் (BJP) எதிர்க்கட்சிகளுக்கும் இடையே இது கடுமையான அரசியல் மோதலாக மாறியுள்ளது.
கோவில் நிர்வாகத்தை கவனித்து வரும் அறக்கட்டளை மற்றும் அதிகாரிகளின் வெளிப்படைத்தன்மை குறித்து எதிர்க்கட்சிகள் சரமாரியாகக் கேள்விகளை எழுப்பி வருகின்றன. பக்தர்களின் புனிதமான உணர்வுகளோடும், அவர்கள் கொடுத்த காணிக்கைப் பணத்தோடும் விளையாடியவர்கள் மீது கடுமையான நடவடிக்கை எடுக்க வேண்டும் என்றும், இந்த வழக்கை சுதந்திரமான முறையில் விசாரிக்க வேண்டும் என்றும் கோரிக்கைகள் வலுத்து வருகின்றன.
Click it and Unblock the Notifications
Sign in with Google