நாளை டெல்லி செல்கிறார் உதயநிதி ஸ்டாலின்! அமைச்சராகிய பிறகு முதல் பயணம்! என்ன அஜெண்டா?

அமைச்சராகிய பிறகு முதல்முறையாக உதயநிதி டெல்லி பயணம்.

சென்னை: அமைச்சராக பொறுப்பேற்ற பின்னர் முதல்முறையாக உதயநிதி ஸ்டாலின் நாளை டெல்லி புறப்பட்டுச் செல்கிறார்.

ஜவஹர்லால் நேரு பல்கலைக்கழகத்தில் ஏபிவிபி அமைப்பினர் நடத்திய தாக்குதலில் காயம் அடைந்த தமிழ்நாடு மாணவர்களை சந்தித்து பேசும் அவர் மத்திய அமைச்சர்களையும் 28ஆம் தேதி நேரில் சந்தித்து பேசவுள்ளார்.

அமைச்சர் உதயநிதி ஸ்டாலினுடனான டெல்லி பயணத்தின் போது நாடாளுமன்ற உறுப்பினர்கள் ஆ.ராசா உள்ளிட்டோர் உடனிருப்பார்கள் எனத் தெரிகிறது.

உதயநிதி டெல்லி பயணம்

தமிழக இளைஞர் நலன், விளையாட்டு மேம்பாட்டுத் துறை மற்றும் சிறப்புத் திட்ட செயலாக்கத் துறை அமைச்சராக பொறுப்பேற்ற பின்னர் முதல்முறையாக நாளை டெல்லி புறப்பட்டுச் செல்கிறார் உதயநிதி ஸ்டாலின். அங்கு தனது துறை ரீதியான சில கோரிக்கைகள் தொடர்பாக மத்திய அமைச்சர்களை நாளை மறுதினம் சந்தித்து பேசுவார் எனத் தெரிவிக்கப்படுகிறது. இதேபோல் டெல்லியில் உள்ள திமுக அலுவலகத்துக்கும் உதயநிதி ஒரு விசிட் அடிப்பார் என எதிர்பார்க்கப்படுகிறது.

பல நிகழ்வுகள்

இந்த நிகழ்ச்சிகளை தொடர்ந்து அண்மையில் ஜவஹர்லால் நேரு பல்கலைக்கழகத்தில் ஏபிவிபி அமைப்பினர் நடத்திய தாக்குதலில் காயம் அடைந்த தமிழ்நாடு மாணவர்களயும் அமைச்சர் உதயநிதி ஸ்டாலின் நேரில் சந்தித்து நலம் விசாரிப்பார் எனத் தெரிகிறது. கடந்த வாரம் காயம் அடைந்த மாணவர்களோடு வீடியோ கால் மூலம் பேசி நலம் விசாரித்து தைரியம் அளித்திருந்தார். இப்போது நேரிலேயே செல்லவுள்ளார்.

28ஆம் தேதி சென்னை திரும்புதல்

இதேபோல் மார்ச் 1ஆம் தேதி நடைபெறும் முதலமைச்சர் ஸ்டாலின் பிறந்தநாள் விழா பொதுக்கூட்டம் தொடர்பான அழைப்பிதழ்களையும் டெல்லியில் சில முக்கியப் புள்ளிகளுக்கு அவர் நேரில் கொடுப்பார் எனத் தெரிவிக்கப்படுகிறது. 28ஆம் தேதி இரவு சென்னை திரும்பும் வகையில் அமைச்சர் உதயநிதி ஸ்டாலினின் நிகழ்ச்சி நிரல்கள் தயாரிக்கப்பட்டுள்ளன.

அரசியல் ரீதியாக முக்கியத்துவம்

அமைச்சராகிய பிறகு உதயநிதி மேற்கொள்ளும் முதல் டெல்லி பயணம் என்பதால் இந்தப் பயணம் அரசியல் ரீதியாக மிகுந்த முக்கியத்துவம் வாய்ந்ததாக பார்க்கப்படுகிறது. அமைச்சர் உதயநிதி ஸ்டாலினுடனான டெல்லி பயணத்தின் போது நாடாளுமன்ற உறுப்பினர்கள் ஆ.ராசா உள்ளிட்டோர் உடனிருப்பார்கள் எனத் தெரிகிறது.

English summary

Udhayanidhi Stalin going to Delhi for the first time after taking over as minister.