விஜய் பதவியேற்க தோழமை கட்சிகளை சம்மதிக்க வைத்ததே ஸ்டாலின் தான்.. திமுக செய்தி தொடர்பாளர் பேட்டி

Updated: Saturday, May 9, 2026, 21:45 [IST]

Subscribe to Oneindia Tamil

சென்னை: தமிழகத்தில் தமிழக வெற்றிக் கழகம் ஆட்சி அமைக்க உள்ள நிலையில், திமுக செய்தித் தொடர்பாளர் சரவணன் அண்ணாதுரை ஏஎன்ஐ செய்தி நிறுவனத்துக்கு அளித்த பேட்டியில் கூறுகையில், "தமிழகத்தின் புதிய முதலமைச்சராகப் பொறுப்பேற்க உள்ள விஜய் அவர்களுக்கு வாழ்த்துகள். திமுகவின் தோழமைக் கட்சிகளின் உதவியுடனும், எங்கள் தலைவர் மு.க. ஸ்டாலின் அவர்கள் ஏற்கனவே சுட்டிக்காட்டியது போல, ஒரு அரசியலமைப்புச் சட்ட நெருக்கடி ஏற்படுவதை அவர் விரும்பாததாலும் விஜய் அவர்களால் முதலமைச்சராக முடிகிறது.

தமிழக மக்கள் ஒரு தெளிவான தீர்ப்பை வழங்கியுள்ளனர். எங்களது முதலமைச்சர் (மு.க. ஸ்டாலின்) கூட்டணி கட்சிகளைச் சமாதானப்படுத்தி, உரிய முறையில் வழிநடத்தியதற்கு நன்றிகள். திமுக கட்சித் தலைவர்களுடன் நாங்கள் விரிவான ஆலோசனைகளை நடத்தினோம்.

அதேபோல், காங்கிரஸ் கட்சி திமுகவிற்கு எப்படித் துரோகம் செய்தது என்பது குறித்தும் எங்களது தலைவர் மு.க. ஸ்டாலின் குறிப்பிட்டுள்ளார். அவர்கள் வெற்றி பெற்ற அந்த ஐந்து இடங்களும் திமுகவின் அடிமட்டத் தொண்டர்கள், வாக்குச்சாவடி முகவர்கள் மற்றும் வாக்கு எண்ணிக்கை முகவர்களின் கடின உழைப்பால் மட்டுமே சாத்தியமானது." இவ்வாறு கூறினார்.

முன்னதாக திமுக தலைவர் ஸ்டாலின் வெளியிட்ட எக்ஸ் தள பதிவில்," என் உயிரோடு கலந்திருக்கும் தலைவர் கலைஞரின் அன்பு உடன்பிறப்புகளுக்கும், என் உயிர்நிகர் தமிழ் மக்களுக்கும் என் அன்பு வணக்கம்.

தேர்தல் முடிவுகள் அறிவிக்கப்பட்ட பின்பு, நடக்கும் நிகழ்வுகளை நீங்கள் பார்க்கிறீர்கள். எந்தக் கட்சிக்கும் ஆட்சி அமைக்கும் பெரும்பான்மை கிடைக்காத வகையில் சட்டமன்றத் தேர்தல் முடிவுகள் அமைந்திருந்தன. ஆட்சி அமைக்கும் அளவுக்குப் பெரும்பான்மை இடங்களைத் திராவிட முன்னேற்றக் கழகத்தின் தலைமையிலான மதச்சார்பற்ற முற்போக்குக் கூட்டணி பெறவில்லை என்றாலும், குறிப்பிடத்தக்க வாக்குகளை நாம் பெற்றுள்ளோம்.
நான் ஏற்கனவே பத்திரிகைகளுக்கு அளித்த பேட்டியில், புதிய ஆட்சி அமைவதற்கு இடையூறாக இருக்க மாட்டோம் என்றும், ஆக்கபூர்வமான எதிர்க்கட்சியாக தி.மு.க. செயல்படும் என்றும் சொல்லியிருந்தேன்.

அதன்பின், என் தலைமையில் நடந்த சட்டமன்ற உறுப்பினர்கள் கூட்டத்தில், முடிவெடுக்கும் பொறுப்பை எனக்குக் கொடுத்தார்கள். அந்தக் கூட்டத்தில், "கட்சியின் நலனை மனதில் வைத்து, தலைமைக் கழக நிர்வாகிகளுடன் கலந்து பேசி முடிவெடுப்பேன்" எனத் தெரிவித்தேன்.

ஆட்சி அமைக்கும் பெரும்பான்மை யாருக்கும் கிடைக்காத நிலையில், மாற்று யோசனைகளைப் பலரும் சொன்னார்கள். என்னைப் பொறுத்தவரை, தோழமைக் கட்சிகள் எந்த முடிவை எடுத்தாலும் அவர்களின் முடிவை மதித்து ஒருங்கிணைந்து செயல்பட்டு, நிலையான ஆட்சி அமைய வேண்டும்; இன்னொரு தேர்தலுக்கு வழிவகுத்துவிடக் கூடாது என்பதே எனது எண்ணமாக இருந்தது.
எங்களது கூட்டணியைச் சார்ந்த தோழர்கள், "இன்றைய நெருக்கடியான சிக்கலைத் தவிர்க்க, நாங்கள் தமிழக வெற்றிக் கழகத்திற்கு ஆட்சி அமைக்க ஆதரவு தெரிவித்தாலும், கொள்கை அடிப்படையில் தி.மு.க. தலைமையிலான மதச்சார்பற்ற முற்போக்குக் கூட்டணியில் தொடர்கிறோம்" என்று அறிவித்திருப்பதை நான் வரவேற்கிறேன்.

கூட்டணியின் சார்பில் போட்டியிட்டு வெற்றிபெற்ற காங்கிரஸ் எம்.எல்.ஏ.க்கள் நன்றி தெரிவிக்க அண்ணா அறிவாலயம் வரவில்லை. ஒரே நாளில் தி.மு.க.வுடனான உறவை முறித்துக்கொண்டு காங்கிரஸ் கட்சி சென்றது. அதேசமயம் தமிழ்நாட்டின் உரிமைகளுக்காகவும் மக்கள் நலனுக்காகவும் தொடர்ந்து தி.மு.க.வுடன் கைகோத்துப் போராடுவோம் என்று கம்யூனிஸ்ட் தலைவர்கள் தோழர் சண்முகம், தோழர் வீரபாண்டியன், விடுதலைச் சிறுத்தைகள் கட்சித் தலைவர் திருமாவளவன் அவர்களும் அறிவித்துத் தோழமை உணர்வை வெளிப்படுத்தியுள்ளது, கொள்கையில் வலுவாக உள்ள திராவிட முன்னேற்றக் கழகத்தின் மீது அவர்கள் கொண்டுள்ள நம்பிக்கையைக் காட்டுகிறது.

#WATCH | Chennai: On TVK set to form the govt in Tamil Nadu, DMK spokesperson, Saravanan Annadurai says, "Congratulations to the new Chief Minister of Tamil Nadu, Vijay. He is able to become the Chief Minister with the help of the allies of the DMK, and our leader, MK Stalin,… pic.twitter.com/7os0oiJIrG
— ANI (@ANI) May 9, 2026

இந்நேரத்தில் மிக முக்கியமான சோதனைக் காலத்தில் உறுதியுடன் உடன் நின்ற தோழமை இயக்கத் தலைவர்கள் பேராசிரியர் அய்யா காதர் மொகிதீன், அண்ணன் வைகோ, சகோதரி பிரேமலதா விஜயகாந்த், பேராசிரியர் ஜவாஹிருல்லா, சகோதரர்கள் ஈஸ்வரன், தமிமுன் அன்சாரி உள்ளிட்ட அனைவருக்கும் என் நெஞ்சார்ந்த நன்றியைத் தெரிவித்துக்கொள்கிறேன். அவர்களின் உறுதிக்கு எத்தகைய நன்றியும் பாராட்டும் பொருந்தும்.

கடந்த ஐந்தாண்டு காலத்தில் தமிழ்நாட்டை அனைத்துத் துறைகளிலும் வளர்த்தெடுத்து, தமிழ்நாட்டை வளப்படுத்தியிருக்கிறோம். ஏராளமான திட்டங்களின் மூலமாக ஒவ்வொரு தனிமனிதரும் நன்மை அடைய வழிவகை செய்துள்ளோம்.
தொலைநோக்குச் சிந்தனையும், வளமான திட்டமிடலும் கொண்ட அந்தத் திட்டங்களை அமைய இருக்கும் புதிய அரசு தொடர வேண்டும் என்பதே எனது தனிப்பட்ட விருப்பமாகும்.

மகளிர், இளைஞர்கள், மாணவர்கள், குழந்தைகள், விளிம்புநிலை மக்கள், அரசு ஊழியர்கள் ஆகியோரை உள்ளடக்கிய அனைத்துத் திட்டங்களையும் தொடர்ந்து செயல்படுத்தினால் மக்களுக்கு நன்மைகள் தொடரும்; மாநிலமும் வளரும். இதனைக் கவனத்தில் கொண்டு புதிய அரசு செயல்பட வேண்டும் என்று கேட்டுக்கொள்கிறேன்.

அமைய இருக்கும் புதிய அரசுக்கு மீண்டும் எனது நல்வாழ்த்துகளைத் தெரிவித்துக்கொள்கிறேன்." இவ்வாறு கூறியிருந்தார்.