ஸ்டாலினின் பெருந்தன்மை.. எல்லா கட்சி எம்பி, எம்எல்ஏக்களையும் வர சொல்றாரே! ஆஹா இதான் அரசியல் நாகரீகம்

சென்னை: தமிழ்நாடு முதலமைச்சர் முக ஸ்டாலின் அனைத்துக் கட்சி எம்பி, எம்.எல்.ஏக்களையும் குறிப்பிட்டு பதிவிட்டு ட்விட்டர் பதிவு அரசியல் நாகரிகத்துக்கு எடுத்துக்காட்டாக அமைந்து உள்ளது.

இன்று தமிழ்நாடு அரசு வெளியிட்ட செய்திக்குறிப்பு ஒன்றில், "வயிற்றுக்குச் சோறிடல் வேண்டும் - இங்கு வாழும் மனிதர்க்கெல்லாம்; பயிற்றிப் பல கல்வி தந்து, இந்தப்பாரை உயர்த்திட வேண்டும்" - என்று பாடினார் மகாகவி பாரதியார்.

மகாகவியின் கூற்றினை மெய்ப்பிக்கும் வகையில், தமிழ்நாட்டில் அனைத்துத் தரப்பினரும் போற்றும் வகையில் நல்லாட்சி நடத்தி வரும் மாண்புமிகு முதலமைச்சர் திரு. மு.க.ஸ்டாலின் அவர்கள் தொடங்கி வைத்த முதலமைச்சரின் காலை உணவுத் திட்டம், தொடங்கப்பட்ட நாள்முதல், மிகச் சிறப்பாகச் செயல்படுத்தப்பட்டு, நல்ல பயன் அளித்து வருகிறது.

சிறப்பு வாய்ந்த முதலமைச்சரின் காலை உணவுத் திட்டம் தமிழ்நாட்டு மக்களிடையே மட்டுமின்றி, பிற மாநில மக்களிடையேயும் தாக்கத்தை ஏற்படுத்தி உள்ளது. முதற்கட்டமாக 1,545 பள்ளிகளில் செயல்படுத்தப்பட்டு வரும் இந்தக் காலை உணவுத் திட்டம், தமிழ்நாட்டில் உள்ள அனைத்து நகர்ப்புறப் பகுதிகள் மற்றும் ஊரகப் பகுதிகளில் உள்ள விரிவுப்படுத்தப்படவிருக்கிறது.

அனைத்து அரசு தொடக்கப் பள்ளிகளிலும் இதனை மாண்புமிகு தமிழ்நாடு முதலமைச்சர் திரு. மு.க. ஸ்டாலின் அவர்கள், வருகிற 25-8-2023 அன்று நாகப்பட்டினம் மாவட்டத்தில் தொடங்கி வைக்கவிருக்கிறார்கள். இந்த நிலையில், இந்தத் திட்டத்தினை நாடாளுமன்ற மற்றும் சட்டமன்ற உறுப்பினர்கள் அவரவர் தொகுதியில் உள்ள ஏதேனும் ஒரு அரசு தொடக்கப் பள்ளியில் தொடங்கி வைத்து சிறப்பிக்குமாறு கேட்டு தமிழ்நாட்டில் உள்ள அனைத்து சட்டமன்ற மற்றும் நாடாளுமன்ற உறுப்பினர்களுக்கும், மாண்புமிகு தமிழ்நாடு முதலமைச்சர் அவர்கள் இன்று (22-8-2023) கடிதம் எழுதியுள்ளார்.

மாண்புமிகு முதலமைச்சர் அவர்கள் எழுதியுள்ள கடிதத்தில், அரசு தொடக்கப் பள்ளிகளில் 1 முதல் 5 ஆம் வகுப்பு வரை பயிலும் மாணவ, மாணவியருக்கு அனைத்துப் பள்ளி நாட்களிலும் காலை உணவு வழங்க தமிழ்நாடு அரசு முடிவு செய்து, அதற்கான அரசாணை கடந்த 27-7-2022 அன்று வெளியிடப்பட்டதாகவும், அதன்படி, முதற்கட்டமாக 1,545 பள்ளிகளைச் சேர்ந்த சுமார் 1 இலட்சத்து 14 ஆயிரம் குழந்தைகள் காலை உணவுத் திட்டத்தில் சேர்க்கப்பட்டு, இந்தியாவில் தற்போது வேறெந்த பயனடைந்து மாநிலத்திலும் வருவதாகவும் இல்லாத குறிப்பிட்டுள்ளார்.

இந்தியாவில் வேறு எந்த மாநிலத்திலும் இல்லாத வகையில், நாட்டிற்கே முன்னோடியாய், தமிழ்நாட்டில் உள்ள அனைத்து நகர்ப்புறப் பகுதிகள் மற்றும் ஊரகப் பகுதிகளில் உள்ள 31,008 அரசு தொடக்கப் பள்ளிகளில் முதலமைச்சரின் காலை உணவுத் திட்டத்தினை 15.75 இலட்சம் தொடக்கப்பள்ளி மாணவ, மாணவியர் பயன்பெறும் வகையில் இந்த ஆண்டில் விரிவுபடுத்தி கடந்த 7-6-2023 அன்று ஆணை வெளியிடப்பட்டுள்ளதாகவும், முதற்கட்டமாக நடைமுறைப்படுத்தப்பட்ட பள்ளிகளில் காணப்பட்ட மிகச் சிறந்த பலன்களைக் கருத்தில் கொண்டு இந்தச் சீரிய முன்னெடுப்பு மேற்கொள்ளப்பட்டுள்ளதாகவும் மாண்புமிகு முதலமைச்சர் அவர்கள் தனது கடிதத்தில் குறிப்பிட்டுள்ளார்.

தமிழ்நாட்டின் வரலாற்றில் பொன்னேட்டில் பதிக்கப்பட இருக்கும் இத்திட்டத்தினை வருகிற 25-8-2023 அன்று நாகப்பட்டினம் மாவட்டத்தில், தான் தொடங்கி வைக்க உள்ளதாகவும், ஒவ்வொரு மாவட்டத்திலும் அந்தந்த மாவட்ட அமைச்சர்கள் இந்தத் திட்டத்தினைத் தொடங்கி வைக்கவுள்ளதாகவும் குறிப்பிட்டுள்ள மாண்புமிகு முதலமைச்சர் அவர்கள், மக்கள் பிரதிநிதிகளாகிய சட்டமன்ற மற்றும் நாடாளுமன்ற உறுப்பினர்கள், அவரவர் தொகுதியில் உள்ள அரசு தொடக்கப் பள்ளி ஒன்றில் இந்தச் சீர்மிகு திட்டத்தினைத் தொடங்கி வைத்து சிறப்பித்திட தி.மு.க., அ.இ.அ.தி.மு.க., காங்கிரஸ், பாட்டாளி மக்கள் கட்சி, பாரதிய ஜனதா கட்சி, விடுதலை சிறுத்தைகள் கட்சி, இந்திய கம்யூனிஸ்ட், மார்க்சிஸ்ட் கம்யூனிஸ்ட் கட்சிகளைச் சார்ந்த சட்டமன்ற மற்றும் நாடாளுமன்ற உறுப்பினர்களுக்கு அழைப்பு விடுத்துள்ளார்." என்று அதில் குறிப்பிடப்பட்டு உள்ளது.

1,545 பள்ளிகளில் முதற்கட்டமாகத் தொடங்கி வைத்த #முதலமைச்சரின்_காலைஉணவுத்_திட்டம் எதிர்பார்ப்புகளை மீறிய பயனை அளித்தது!

15.75 லட்சம் மாணவர்களின் பசியாற்றிடும் வகையில், 31,008 அரசு தொடக்கப் பள்ளிகளுக்கு விரிவுபடுத்தப்பட இருக்கும் இத்திட்டத்தை வரும் 25-ஆம் நாள் நாகையில் நான் தொடங்கி… pic.twitter.com/2dhpZJsQL8

— M.K.Stalin (@mkstalin) August 22, 2023

இது குறித்து ட்விட்டரில் பதிவிட்டு உள்ள முதலமைச்சர் முக ஸ்டாலின், "1,545 பள்ளிகளில் முதற்கட்டமாகத் தொடங்கி வைத்த முதலமைச்சரின் காலை உணவுத்திட்டம் எதிர்பார்ப்புகளை மீறிய பயனை அளித்தது. 15.75 லட்சம் மாணவர்களின் பசியாற்றிடும் வகையில், 31,008 அரசு தொடக்கப் பள்ளிகளுக்கு விரிவுபடுத்தப்பட இருக்கும் இத்திட்டத்தை வரும் 25-ஆம் நாள் நாகையில் நான் தொடங்கி வைக்கிறேன்.

தமிழ்நாட்டின் வரலாற்றில் பொன்னேட்டில் பதிக்கத்தக்க இந்தத் திட்டத்தைத் தமிழ்நாட்டைச் சேர்ந்த MLA, MP அனைவரும் கட்சி வேறுபாடின்றித் தங்கள் தொகுதிகளில் தொடங்கி வைத்துச் சிறப்பிக்க வேண்டும்." என்று குறிப்பிட்டு உள்ளார்.

English summary

Tamil Nadu Chief Minister MK Stalin's Twitter post mentioning all party MPs and MLAs is an example of political civility.