போதி தர்மரின் மரபணு வழி வந்தவர் ஸ்டாலின்! செல்வப்பெருந்தகை பேச்சு! ஜால்ரா என அதிமுக எம்எல்ஏ கிண்டல்!

Updated: Thursday, April 21, 2022, 15:41 [IST]

Subscribe to Oneindia Tamil

சென்னை: போதி தர்மரின் மரபணு வழி வந்தவர் முதல்வர் ஸ்டாலின் என சட்டசபை காங்கிரஸ் குழுத் தலைவர் செல்வப்பெருந்தகை எம்.எல்.ஏ. புகழாரம் சூட்டியுள்ளார்.

விளையாட்டுத்துறை தொடர்பாக முதலமைச்சர் ஸ்டாலின் 110 விதியின் கீழ் வெளியிட்ட அறிவிப்புகளை வரவேற்று பேசிய அவர் இதனைக் கூறினார்.

இவர் இவ்வாறு கூறிக்கொண்டிருக்கும் போதே அவருக்கு பின்னால் அமர்ந்திருந்த பாப்பிரெட்டியபட்டி தொகுதி அதிமுக எம்.எல்.ஏ. கோவிந்தசாமி, சைகையால் ஜால்ரா அடிப்பதாக சக உறுப்பினர்களிடம் கூறி கிண்டல் செய்தார்.

விளையாட்டுத்துறை

சென்னைக்கு அருகில் பிரம்மாண்டமான விளையாட்டு நகரம், அனைத்துச் சட்டமன்றத் தொகுதிகளிலும், தலா 3 கோடி ரூபாய் செலவில் சிறு விளையாட்டு அரங்கங்கள், மதுரை மாவட்டம் அலங்காநல்லூரில் ஜல்லிக்கட்டுக்கென்றே தனியாக பிரம்மாண்டமான மைதானம், வட சென்னை பகுதியில் நவீன தொழில்நுட்பங்களோடு கூடிய நவீன குத்துச்சண்டை விளையாட்டு வளாகம் உள்ளிட்ட பல்வேறு புதிய அறிவிப்புகளை முதலமைச்சர் ஸ்டாலின் 110 விதியின் கீழ் இன்று அறிவித்தார்.

செல்வப்பெருந்தகை பேச்சு

அதனை வரவேற்று பேசிய காங்கிரஸ் எம்.எல்.ஏ. செல்வப்பெருந்தகை, போதி தர்மரின் மரபணு வழி வந்தவர் முதல்வர் ஸ்டாலின் என புகழாரம் சூட்டினார். போதிதர்மர் தான் உலகம் முழுவதும் தற்காப்பு கலைகளையும், விளையாட்டையும் பரப்பியதாகவும் இன்று அவர் வழியில் நின்று தமிழகத்தில் விளையாட்டுத்துறையை முதல்வர் ஸ்டாலின் மேம்படுத்தி வருகிறார் எனவும் செல்வப்பெருந்தகை பேசினார்.

அதிமுக எம்.எல்.ஏ.

செல்வப்பெருந்தகை இவ்வாறு கூறிக்கொண்டிருக்கும் போதே அவருக்கு பின்னால் அமர்ந்திருந்த பாப்பிரெட்டியபட்டி தொகுதி அதிமுக எம்.எல்.ஏ. கோவிந்தசாமி, சைகையால் ஜால்ரா அடிப்பதாக சக உறுப்பினர்களிடம் கூறி கிண்டல் செய்தார். சட்டசபை நிகழ்வுகள் நேரடி ஒளிபரப்பு செய்யப்படுகிறது என்பதைக் கூட மறந்து விளையாட்டுத்துறை பற்றிய அறிவிப்புகளை வரவேற்று பேசிய போது, அதிமுக எம்.எல்.ஏ. கோவிந்தசாமி விளையாட்டு பிள்ளையை போல் விளையாடிக் கொண்டிருந்தார்.

முதல்முறையல்ல

பாப்பிரெட்டியபட்டி தொகுதி அதிமுக எம்.எல்.ஏ. கோவிந்தசாமி இவ்வாறு செய்வது இது முதல்முறையல்ல. பல முறை இதேபோல் சட்டசபையில் அமர்ந்துகொண்டு சைகையால் சக உறுப்பினர்களிடம் கிண்டல் அடிப்பதை வழக்கமாக கொண்டிருப்பது குறிப்பிடத்தக்கது. இதனிடையே இவர் இவ்வாறு செய்வதை அதிமுகவை சேர்ந்த சக உறுப்பினர்களே கண்டுகொள்ளாமல் நேரலை ஒளிபரப்பை மனதில் தாங்கி பொறுப்புடன் நடந்துகொண்டதையும் காண முடிந்தது.