மிஷன் 2021-ஐ போல் மிஷன் 200.. ஸ்டாலின் கூறிய மிஷன் என்ன?
சென்னை: மிஷன் 2021-ஐ போல் மிஷன் 200 என வைத்துக் கொள்வோம். 200-க்கும் மேற்பட்ட தொகுதிகளில் வெற்றி பெறுவதே மிஷன் 200 ஆகும் என திமுக தலைவர் மு.க.ஸ்டாலின் தெரிவித்துள்ளார்.
திமுக பிரச்சார பயணம் குறித்து அண்ணா அறிவாலயத்தில் மாவட்டச் செயலாளர்கள், நிர்வாகிகள் கலந்து கொண்ட கலந்துரையாடல் கூட்டம் நடைபெற்றது. இந்த கூட்டத்தில் திமுக தலைவர் மு.க.ஸ்டாலின் கலந்து கொண்டு பேசினார்.
அப்போது அவர் கூறுகையில், மாவட்டச் செயலாளர்களும் கழக நிர்வாகிகளும் உங்கள் சக்தியை முழுமையாக கொடுக்க வேண்டும். ஆட்சி அமைக்க 117 இடங்களில் வெற்றி பெற்றால் போதும். ஆனால் 117 இடங்களுக்காக நாம் இவ்வளவு கஷ்டப்படத் தேவையில்லை.
30 அமைச்சர்கள்
117 இடங்களுக்காக நாம் கட்சி நடத்தவில்லை. ஒரு 30 அமைச்சர்களை பெறுவதற்காகவும் நாம் கட்சி நடத்தவில்லை. நாடாளுமன்றத் தேர்தலில் ஒரு தொகுதியை தவிர்த்து மற்ற தொகுதிகளில் வென்றோம். அதுதான் உண்மையான வெற்றி. அத்தகைய வெற்றியை முழுமையாக பெற அனைவரும் முழுமுயற்சி எடுக்க வேண்டும்.
வெற்றி
திமுக கூட்டணி சார்பில் முதல்வர் வேட்பாளர் யார்? என்பதை பார்க்காதீர்கள். உதயசூரியன்தான் வேட்பாளர், கருணாநிதிதான் வேட்பாளர் என்பதை மனதில் நிறுத்துங்கள். திமுக ஆட்சி மலர வேண்டும். நாம் மட்டுமே வெற்றி பெற வேண்டும் என நினைக்காதீர். திமுக வேட்பாளர்கள் அனைவரும் வெற்றி பெற வேண்டும் என கருதுங்கள்.
ஓசை வராது
ஒரு கை தட்டினால் ஓசை வராது. தனிமரம் எப்போதும் தோப்பாகாது. ஒரு நபர் குடும்பமாக முடியாது. 5 முறை தமிழகத்தை ஆண்டோம், 6ஆவது முறையும் திமுக ஆட்சிக்கு வர வேண்டும். 10 ஆண்டுகளாக தொகுதி பக்கமே அதிமுகவினர் செல்லவில்லை. அனைத்து துறைகளிலும் தமிழகத்தை அதிமுக அரசு சந்தி சிரிக்க வைத்துவிட்டது.
குறை கேளுங்கள்
கிராம சபை பிரச்சாரம் முடிந்தவுடன் நானே ஒவ்வொரு கிராமமாக செல்வேன். ஊராட்சி சபை கூட்டம் பயன்பட்டது போல் கிராம சபை கூட்டங்களையும் நடத்த வேண்டும். அதிமுகவை நிராகரிக்க வேண்டும் என்ற பிரசாரத்தையும் முன்னெடுக்க வேண்டும். டிச. 23 முதல் மக்களை சந்தித்து குறைகளை கேளுங்கள்.
அரவணைக்க
கிராமங்களில் அதிமுகவை நிராகரிக்கிறோம் என்ற தீர்மானத்தை நிறைவேற்றுங்கள். சாலை வசதி, மருத்துவ வசதி, ரேஷன் கடைகள் இல்லை என கிராம மக்கள் சொல்வார்கள். கிராம மக்கள் சொல்லும் கோரிக்கைகளை பொறுமையாக கேளுங்கள். மக்கள் கேட்கும் கேள்விகளுக்கு பொறுமையாக பதில் சொல்லுங்கள். எல்லோரையும் அரவணைக்க கற்றுக் கொள்ளுங்கள்.
மிஷன் 200
வேட்பாளர்கள், தொகுதி குறித்து நீங்கள் கவலைப்படாதீர்கள். அவற்றையெல்லாம் நாங்கள் பார்த்துக் கொள்கிறோம். வெற்றி பெறுபவர்தான் வேட்பாளர். சட்டசபை தேர்தலில் 200 தொகுதிகளுக்கு மேல் வெற்றி பெற வேண்டும். மிஷன் 2021 ஐ போல மிஷன் 200 என வைத்துக் கொள்வோம் என்றார் ஸ்டாலின்.
Click it and Unblock the Notifications
Sign in with Google