"நான் கோட்ஸே ஆதரவாளர்".. தீயாய் பரவும் பாஜக உமா ஆனந்த் வீடியோ.. மோகன் குமாரமங்களம் பளீர் கேள்வி!

Updated: Tuesday, February 8, 2022, 11:01 [IST]

Subscribe to Oneindia Tamil

சென்னை: சென்னை மாநகராட்சி தேர்தலில் பாஜக கட்சி சார்பாக போட்டியிடும் உமா ஆனந்தன் வீடியோ ஒன்று இணையம் முழுக்க வைரலாகி வருகிறது. இதை பகிர்ந்து காங்கிரஸ் கட்சியை சேர்ந்த மோகன் குமார மங்களம் விமர்சனம் செய்துள்ளார்.

பாஜக

இந்த நிலையில் பாஜக கட்சி சார்பாக உமா ஆனந்தன் சென்னையில் களமிறக்கப்பட்டுள்ளார். சென்னையில் கோடம்பாக்கத்தில் உள்ள 134வது வார்டில் உமா ஆனந்தன் போட்டியிடுகிறார். ஏற்கனவே பல மேடைகளில் இவர் சர்ச்சைக்குரிய விஷயங்களை பேசி இருக்கிறார். தீவிர இந்துத்துவா கொள்கை கொண்ட இவர் சாதி ரீதியாக பல மேடைகளில் பேசி இருக்கிறார். அதேபோல் திராவிட கோட்பாடுகளுக்கு எதிராகவும் இவர் பேசிய வீடியோக்கள் பல இணையத்தில் வைரலாகி வருகிறது.

உமா ஆனந்தன்

மேற்கு மாம்பலத்தில் வசிக்கும் இவர் தற்போது பாஜக சார்பாக தேர்தலில் களமிறங்கி உள்ளார். இந்த நிலையில் தனியார் தொலைக்காட்சி ஒன்றுக்கு கோட்ஸே குறித்து இவர் அளித்த பேட்டி இணையம் முழுக்க சர்ச்சையாகி வருகிறது. கோட்ஸேவிற்கு ஆதரவாக இவர் பேசி உள்ளார். அதில், கோட்ஸே காந்தியை சுட்டார். ஆம் அது அவரின் நியாயாம். அவர் ஒரு இந்து.. இப்பவும் சொல்கிறேன்.. எனக்கு அது மிகவும் பெருமையாக உள்ளது.

கோட்ஸே உமா ஆனந்தன்

நான் பெருமையாக சொல்கிறேன்.. நான் ஒரு கோட்ஸே ஆதரவாளர், என்று உமா ஆனந்த் குறிப்பிட்டு இருந்தார். உமா ஆனந்த் இப்படி கோட்ஸேவிற்கு ஆதரவாக பேசிய வீடியோ இணையம் முழுக்க பரவி வருகிறது. இவரை எப்படி பாஜக வேட்பாளராக தேர்வு செய்தது. எந்த அடிப்படையில் இவருக்கு வாய்ப்பு வழங்கப்பட்டது என்று நெட்டிசன்கள் பலர் கேள்வி எழுப்பி வருகின்றனர்.

மோகன் குமார மங்களம்

இந்த நிலையில் காங்கிரஸ் கட்சியை சேர்ந்த மோகன் குமார மங்களம் இந்த வீடியோவை பகிர்ந்து உமா ஆனந்தை விமர்சனம் செய்துள்ளார். உமா ஆனந்த் கோட்ஸே பற்றி பேசும் வீடியோவை பகிர்ந்து , பாஜக அண்ணாமலை.. ரொம்ப நல்லா தேர்வு பண்ணி இருக்கீங்க கண்ணா.. மோடிஜியின் உண்மையான தொண்டன் என்று விமர்சனம் செய்து இருக்கிறார். இந்த வீடியோ தற்போது இணையத்தில் வைரலாகி வருவது குறிப்பிடத்தக்கது.

உமா ஆனந்த்

அதேபோல் உமா ஆனந்த் பேசிய இன்னொரு வீடியோவை மோகன் குமார மங்களம் பகிர்ந்து உள்ளார். அதில் உமா ஆனந்த் ஜாதிக்கு ஆதரவாக பேசி உள்ளார். அதில், பிராமின் என்பதில் நான் பெருமை கொள்கிறேன்.. ஜாதிகள் இருக்கிறது.. அது நம்முடைய கலாச்சாரத்தில் ஒன்று. ஜாதிதான் நம்முடைய அடையாளம்/ ஜாதிகள் இல்லை என்றால் நம்முடைய கலாச்சாரம் கிடையாது.

மோகன் குமார மங்களம் வீடியோ

ஜாதிகள் இருக்கிறது. ஜாதிகள் இருக்கும். ஈ. வே. ரா என்ன செய்தார்.. இவ்வளவு நாள் ஜாதியை ஒழித்துவிட்டு என்ன செய்தார் என்று உமா ஆனந்த் இந்த வீடியோவில் பேசி இருந்தார். இதையும் மோகன் குமார மங்களம் பகிர்ந்து, மத மற்றும் ஜாதி பிரிவினை? ஒன்று வாங்கினால்.. ஒன்று இலவசம். எப்படி ஒரு வேட்பாளர் பாருங்க.. விரைவில் இவர் நேராக பாஜக தேசிய செயற்குழுவிற்கு கூட தேர்வாகி விடுவார் என்று காங்கிரசின் மோகன் குமார மங்களம் பகிர்ந்து உள்ளார்.