தமிழர்கள் இல்லையா சார்? 1,800 MTC நடத்துநர்கள் பணிக்கு.. உ.பி நிறுவனத்துடன் விஜய் அரசு ஒப்பந்தம்!
சென்னை: சென்னை மாநகரப் போக்குவரத்துக்கழகத்தில் (MTC) காலியாக உள்ள நடத்துநர் பணியிடங்களை நிரப்புவது தொடர்பாக வெளியிடப்பட்டுள்ள புதிய அரசாணை மற்றும் டெண்டர் விவகாரம் தமிழக அரசியல் மற்றும் தொழிற்சங்க வட்டாரத்தில் பெரும் அதிர்வலைகளை ஏற்படுத்தியுள்ளது.
மாநகரப் பேருந்துகளில் பயணச்சீட்டு வழங்கும் பணிகளுக்காக 1,797 நடத்துநர்களை ஒப்பந்த அடிப்படையில் நியமிக்க, உத்தரப் பிரதேச மாநிலத்தைச் சேர்ந்த தனியார் நிறுவனத்துடன் ஒப்பந்தம் செய்யப்பட்டுள்ளது. இதற்குப் போக்குவரத்து தொழிற்சங்கங்களும், ஊழியர்களும் கடும் கண்டனம் தெரிவித்துப் போராட்டத்தில் குதித்துள்ளனர். இதனால் அந்த உபி நிறுவனம் வடஇந்தியர்களை பணிக்கு எடுக்கும் அபாயம் உள்ளது.
₹61.56 கோடி மதிப்பிலான டெண்டர் விவரம்
மாநகரப் போக்குவரத்துக்கழகத்தின் பல்வேறு பணிமனைகளில் நிலவும் நடத்துநர் பற்றாக்குறையைச் சமாளிக்கும் நோக்கில், வெளிமுகமை மூலம் ஆட்களைத் தேர்வு செய்ய டெண்டர் கோரப்பட்டிருந்தது. இதில், உத்தரப் பிரதேச மாநிலத்தை தலைமையிடமாகக் கொண்டு செயல்படும் 'எம்/எஸ். எஸ் எஸ் எண்டர்பிரைசஸ்' என்ற நிறுவனம் சமர்ப்பித்த விலைப்புள்ளி இறுதி செய்யப்பட்டுள்ளது.
சரக்கு மற்றும் சேவை வரி (GST) உட்பட மொத்தம் ₹61,56,14,335.74 மதிப்பீட்டில் இந்த ஒப்பந்தம் இறுதி செய்யப்பட்டுள்ளது. இதன்மூலம் 1,797 பணியாளர்கள் சென்னை முழுவதும் உள்ள பல்வேறு மண்டல பணிமனைகளில் தினசரி அடிப்படையில் பணியமர்த்தப்பட உள்ளனர்.
மண்டல வாரியான தேவைகள் மற்றும் கட்டண விவரம்
வெளியிடப்பட்டுள்ள பணி ஒதுக்கீட்டு விவரங்களின்படி, சென்னையில் உள்ள முக்கிய 4 மண்டலப் பணிமனைகளுக்குத் தேவையான மனிதவளம் மற்றும் அடிப்படை ஊதியக் கட்டமைப்பு வரையறுக்கப்பட்டுள்ளது.
அடையாறு மண்டலம்: தினசரி 350 பணியாளர்கள் தேவைப்படுகின்றனர். ஒரு நபருக்கான அடிப்படை வீதம் ₹27,679 ஆக நிர்ணயிக்கப்பட்டுள்ளது (கூடுதலாக 18% ஜி.எஸ்.டி).
குரோம்பேட்டை மண்டலம்: தினசரி 320 பணியாளர்கள் தேவை. அடிப்படை வீதம் ₹27,679 மற்றும் 18% ஜி.எஸ்.டி.
வடபழனி மண்டலம்: தினசரி 295 பணியாளர்கள் தேவை. அடிப்படை வீதம் ₹27,679 மற்றும் 18% ஜி.எஸ்.டி.
அயனாவரம் மண்டலம்: தினசரி 256 பணியாளர்கள் தேவை. அடிப்படை வீதம் ₹27,679 மற்றும் 18% ஜி.எஸ்.டி.
இதன்மூலம் ஒரு பணியாளருக்கு நிர்ணயிக்கப்பட்ட அடிப்படைத் தொகைக்கு மேல் 18 சதவீத ஜி.எஸ்.டி இணைக்கப்பட்டு நிறுவனத்திற்குத் தொகை வழங்கப்படும்.
தொழிற்சங்கங்கள் முன்வைக்கும் குற்றச்சாட்டுகள்
இந்த நடவடிக்கைக்கு அரசு போக்குவரத்துக் கழக தொழிலாளர் சங்கங்கள் கடுமையான எதிர்ப்பைப் பதிவு செய்துள்ளன. பல ஆண்டுகளாக அரசுப் போக்குவரத்துக் கழகங்களில் பல்லாயிரக்கணக்கான பணியிடங்கள் காலியாக உள்ள நிலையில், லட்சக்கணக்கான தமிழக இளைஞர்கள் வேலைவாய்ப்பு அலுவலகங்களில் பதிவு செய்துவிட்டுப் பணிக்காகக் காத்திருக்கின்றனர்.
அத்தகைய சூழலில், அரசு நிரந்தரப் பணியிடங்களை உருவாக்காமல் தனியார் மயமாக்கல் மற்றும் ஒப்பந்த முறைக்கு வழிவகுப்பது பொதுத்துறை நிறுவனங்களின் பாதுகாப்பைக் கேள்விக்குறியாக்கும் எனத் தொழிற்சங்கங்கள் சுட்டிக்காட்டுகின்றன. குறிப்பாக, உத்தரப் பிரதேசத்தைச் சேர்ந்த நிறுவனத்திற்கு டெண்டர் ஒதுக்கப்பட்டிருப்பதன் மூலம், உள்ளூர் இளைஞர்களுக்கான வேலைவாய்ப்பு பறிக்கப்பட்டு வடமாநிலத் தொழிலாளர்கள் அதிகளவில் பணியமர்த்தப்பட வாய்ப்புள்ளதாக அச்சம் தெரிவிக்கப்பட்டுள்ளது.
மொழிப் பிரச்சனை மற்றும் பொதுப் பாதுகாப்பு
மாநகரப் பேருந்துகளில் தினசரி லட்சக்கணக்கான பொதுமக்கள், மாணவர்கள், பெண்கள் மற்றும் முதியவர்கள் பயணிக்கின்றனர். உள்ளூர் நிலவியல், பேருந்து நிறுத்தங்களின் பெயர்கள் மற்றும் தமிழ் மொழிப் பயன்பாடு மிக அவசியமான ஒன்றாக இருக்கும் நடத்துநர் பணிக்கு, வெளிமாநில நிறுவனங்களின் வழியே ஊழியர்கள் நியமிக்கப்பட்டால் பயணிகளுடன் தகவல் தொடர்பில் சிக்கல்கள் எழும் என்று சமூக ஆர்வலர்கள் எச்சரிக்கின்றனர்.
வலுக்கும் போராட்டங்கள்
இந்த ஒப்பந்த உத்தரவை உடனடியாகத் திரும்பப் பெற வேண்டும், வெளிமுகமை முறையைக் கைவிட்டு தமிழ்நாடு அரசுப் பணியாளர் தேர்வாணையம் அல்லது வேலைவாய்ப்பு அலுவலகம் மூலம் வெளிப்படையாக நிரந்தர நடத்துநர்களைத் தேர்வு செய்ய வேண்டும் என்பதை வலியுறுத்தி, சென்னை முழுவதும் உள்ள முக்கியப் பணிமனைகள் முன்பு போக்குவரத்து ஊழியர்கள் தொடர் கண்டன ஆர்ப்பாட்டங்களில் ஈடுபட்டு வருகின்றனர். இந்த விவகாரம் அடுத்தகட்டமாகப் பெரும் அரசியல் விவாதமாக உருவெடுத்துள்ளது.
Click it and Unblock the Notifications
Sign in with Google
