"ம்மா.. கவலைப்படாதீங்க.. சீமான் அண்ணன் இருக்காரு".. திடீரென வைரலாகும் நாம் தமிழர் கட்சி விளம்பரம்
நாம் தமிழர் கட்சியின் தேர்தல் விளம்பரங்கள் வைரலாகி வருகின்றன
சென்னை: நாம் தமிழர் கட்சியின், தேர்தல் விளம்பரங்கள் இணையத்தில் வைரலாகி வருகின்றன.. விவசாயி சின்னத்திற்கு ஓட்டு கேட்டு, பிரச்சாரங்களை சீமான் தொடங்கி உள்ளார்.
Recommended Video
வரும் சட்டமன்ற தேர்தலில் அதிமுக - திமுக கட்சிகள் வழக்கம்போல மோத உள்ளன.. இதில், கமல்ஹாசனின் மக்கள் நீதி மய்யத்தோடு இணைந்து சமத்துவ மக்கள் கட்சி, ஐஜேகே உள்ளிட்ட கட்சிகள் தேர்தலை சந்திக்க உள்ளன. இன்னொரு பக்கம் நாம் தமிழர் கட்சி, அமமுகவும் தனித்தனியாக களமிறங்கி உள்ளன.
இதில், எப்போதும் போலவே, இந்த முறையும் 234 தொகுதிகளுக்கும் சரிபாதியாக ஆண், பெண் வேட்பாளர்களைக் களமிறக்கி உள்ளார் சீமான். இது தொடர்பாக சென்னையில் வேட்பாளர்களை அறிமுகப்படுத்தும் விழாவும் நடந்தது.. இதையடுத்து தேர்தல் வேலை மும்முரமாகியும் உள்ளது.
விவசாயி சின்னம்
இந்நிலையில், நாம் தமிழர் கட்சி சார்பாக தேர்தல் விளம்பரம் ஒன்று வெளியாகி உள்ளது.. விவசாய சின்னத்தில் நாம் தமிழர் கட்சி போட்டியிடுவதால், அக்கட்சிக்கு வாக்கு கேட்டு சீமானின் குரல் இந்த விளம்பரங்களில் ஒலிக்கிறது.. 3 விதமான விளம்பர காட்சிகள் வெளியாகி உள்ளன.. அதில், விவசாயி ஒருவர் வயலில் இறங்கி வேலை செய்து கொண்டிருக்கிறார்.. அப்போது அங்கு அவரிடம் ஓட்டு கேட்க சிலர் வருகிறார்கள்.. அவர்களிடம் விவசாயி, "போடா வெட்டி பயலே.. ஊருக்கே சோறு போடற விவசாயிடா நான்.. என் ஓட்டு விவசாயிக்குதான்.." என்கிறார்.
அண்ணன் சீமான்
இன்னொரு விளம்பரத்தில், "என்னங்க இதுவரைக்கும் பிள்ளையை படிக்க வெச்சாச்சு.. இதுக்கும் மேல முடியலன்னா, கடனை வாங்கியாவது படிக்க வைக்கணும்" என்று மனைவி கணவனிடம் சொல்கிறார். இதைக்கேட்ட அவர்களது மகள், "அம்மா, நீங்க ஏன் கவலைப்படறீங்க... தரமான கல்வியும், கல்விக்கேத்த வேலையும் தர்ற போறதா நம்ம அண்ணன் சொல்லி இருக்கார்.. நீங்க விவசாயி சின்னத்துல மட்டும் ஓட்டுப்போடுங்க.. மத்தத எல்லாம் அவங்க பார்த்துப்பாங்க:" என்கிறார்.
யாருக்கு ஓட்டு?
மற்றொரு விளம்பரத்தில், வீட்டில் மனைவியிடம், "சோறு போடும்மா" என்று சொல்கிறார் கணவர்.. அதற்கு மனைவி, "உங்க ஓட்டை யாருக்கு போட போறீங்க?" என்று கேட்கிறார்.. அதற்கு அவர், "யாருக்கோ ஒருத்தருக்கு போடறேன், நீ சோறு போடு" என்கிறார். அதற்கு அந்த மனைவியோ, "உப்பிட்டவரை உள்ளளவும் நினைன்னு சொல்லி இருக்காங்க.. நீ என்னைக்காவது இந்த சாப்பாட்டுக்கு காரணமாக இருக்கிற விவசாயியை யோசிச்சு பார்த்திருக்கியா? உன் ஓட்டு விவசாயி சின்னத்துக்கு போடுவேன்னு சொல்லு, அப்பதான் உனக்கு சாப்பாடு" என்கிறார்.
வைரல் வீடியோ
இந்த விளம்பரங்கள்தான் இணையத்தில் வைரலாகி வருகின்றன.. "நமது சின்னம் விவசாயி.. போட்டுப் பாருங்க ஓட்டை.. அப்பறம் பாருங்க நாட்டை" என்று சீமானின் குரல் ஒவ்வொரு விளம்பர இறுதியிலும் ஒலிக்கிறது.. இந்த விளம்பரங்களை நாம் தமிழர் கட்சியினர் ஷேர் செய்து வருவதுடன், வைரலாக்கியும் வருகிறார்கள்.
Click it and Unblock the Notifications
Sign in with Google