கணேசனை சிவாஜி கணேசனாக மாற்றிய பெரியார்! நடிகர் திலகத்தின் 96ஆவது பிறந்தநாள் நாளை!
சென்னை: நடிகர் திலகம் சிவாஜி கணேசனின் 96வது பிறந்தநாள் நாளை கொண்டாடப்படும் நிலையில் அவர் குறித்த சுவாரஸ்யமான தகவலை இங்கே பார்க்கலாம்.
நடிகர் திலகம் செவாலியர் சிவாஜி கணேசன் 1.10.1927 ஆம் ஆண்டு பிறந்தார். 'நடிப்பு தனது மூச்சு என்றும், நடிப்பு ஒன்றுதான் தனக்குத் தெரிந்த தொழில், நடிப்புதான் எனக்குத் தெய்வம்' எனவும் சிவாஜி கணேசன் அடிக்கடி குறிப்பிட்டிருக்கிறார். குழந்தைப் பருவம் முதற்கொண்டே நடிப்பதில் ஆர்வம் கொண்டு பல்வேறு நாடகங்களில் பங்கேற்று நடித்து வந்தவர் சிவாஜி.
அண்ணாவால் எழுதப்பட்ட "சிவாஜி கண்ட இந்து ராஜ்ஜியம்" என்கிற நாடகத்தில் சிவாஜியாக நடித்தார். அதில் அவரின் நடிப்புத் திறமையினைக் கண்ட பெரியார் "சிவாஜி கணேசன்" என்று பெயர் சூட்டினார்.
சிவாஜி கணேசன் பராசக்தி திரைப்படத்தின் மூலம் தமிழ் திரைப்பட உலகில் அறிமுகமாகி 300 க்கும் மேற்பட்ட திரைப்படங்கள், 2 இந்தி படங்கள், 9 தெலுங்கு திரைப்படங்கள் மற்றும் ஒரு மலையாளத் திரைப்படத்திலும் நடித்துள்ளார். "நடிகர் திலகம்", "நடிப்புச் சக்கரவர்த்தி" என்று மக்களாலும், திரை உலகத்தினராலும் அழைக்கப்பட்டார்.
இவர் நடித்த கப்பலோட்டியத் தமிழன், இராஜராஜ சோழன், வீரபாண்டிய கட்டபொம்மன் உள்ளிட்ட பல திரைப்படங்கள் காண்போரின் மனதில் இன்றும் நிலைத்து நிற்கிறது. ராஜராஜ சோழன், வீரபாண்டிய கட்டபொம்மன் என்றாலே நமது கண் முன் வந்து நிற்கும் பிம்பம் மேற்கண்ட கதாபாத்திரங்களில் நடித்த சிவாஜியின் முகம் தான். அந்தளவுக்கு தாம் ஏற்றுக்கொண்ட கதாபாத்திரத்தில் முழுமையாக ஒன்றி நடிக்கும் ஆற்றலை பெற்றிருந்தார்.
சிவாஜி கணேசன் நடிப்பு திறமையை பாராட்டி பத்ம ஸ்ரீ விருது, பத்ம பூஷன் விருது, செவாலியே விருது மற்றும் தாதா சாகிப் பால்கே விருது உள்ளிட்ட விருதுகள் வழங்கப்பட்டுள்ளன. தமிழ்நாடு அரசின் சார்பில் நடிகர் திலகம் சிவாஜி கணேசனின் பிறந்த நாள் ஆண்டுதோறும் சிறப்பாகக் கொண்டாடப்பட்டு வருகிறது. அந்த வகையில் நாளையும் தமிழக அரசு சார்பில் சிவாஜி கணேசன் மணிமண்டபத்தில் பிறந்தநாள் விழா நடத்தப்படவுள்ளன.
Click it and Unblock the Notifications
Sign in with Google