பூமியில் வெற்றிகரமாக தரையிறங்கிய.. ஆர்டெமிஸ்-II மிஷன்.. நிலவை சுற்றிவிட்டு.. திரும்பிய 4 வீரர்கள்!

வாஷிங்டன்: நாசாவின் வரலாற்றுச் சிறப்புமிக்க 'ஆர்டெமிஸ்-II' (Artemis-II) விண்வெளிப் பயணம், இன்று பசிபிக் கடலில் வெற்றிகரமாகத் தரையிறங்கியதுடன் நிறைவடைந்தது.

பூமியை நோக்கிய பயணத்தின் இறுதிப் பகுதியில், ஓரியன் விண்கலம் அதன் சேவைப் பகுதியை (Service Module) கழற்றிவிட்டு, விண்வெளி வீரர்கள் இருக்கும் முக்கியப் பகுதியை (Crew Module) மட்டும் தரை இறங்குவதற்குத் தயார் செய்தது. இன்று அதிகாலை விண்கலம் பூமியின் வளிமண்டலத்திற்குள் மணிக்கு 25,000 மைல் வேகத்தில் நுழைந்தது. இந்த அதீத வேகத்தினால் விண்கலத்தைச் சுற்றி ஒரு நெருப்புப் பிழம்பு போன்ற 'பிளாஸ்மா' மண்டலம் உருவானது.

இதன் காரணமாக விண்கலத்தின் வெப்பக்கவசம் சுமார் 5,000 டிகிரி பாரன்ஹீட் வெப்பத்தை எதிர்கொண்டது. இந்த நேரத்தில், காற்று மண்டலத்தின் தீவிர வெப்பத்தினால் சுமார் 6 நிமிடங்கள் பூமிக்கும் விண்கலத்திற்கும் இடையிலான தகவல் தொடர்பு முற்றிலும் துண்டிக்கப்பட்டது. இது விண்வெளிப் பயணத்தின் மிகவும் ஆபத்தான 'பிளாக்அவுட்' (Blackout) காலம் என்று அழைக்கப்படுகிறது.

பாராசூட் விரியும் நுட்பம்

வெற்றிகரமாக வெப்பத்தைத் தாண்டி, விண்கலம் பூமியின் அடர்த்தியான காற்று மண்டலத்திற்குள் நுழைந்து வேகம் குறையத் தொடங்கியதும், அடுத்தகட்டமாகப் பாராசூட்டுகள் விரிவடையத் தொடங்கின. சுமார் 25,000 அடி உயரத்தில் இருந்தபோது விண்கலத்தின் முகப்புப் பகுதி கழற்றப்பட்டு, முதலில் இரண்டு சிறிய 'ட்ரோக்' (Drogue) பாராசூட்டுகள் விரிந்தன. இவை விண்கலத்தை நிலைப்படுத்தி அதன் வேகத்தை ஓரளவு குறைத்தன.

பின்னர், கடல் மட்டத்தில் இருந்து சுமார் 6,000 அடி உயரத்தில் இருக்கும்போது, மூன்று பிரம்மாண்டமான ஆரஞ்சு நிற 'மெயின்' பாராசூட்டுகள் விரிவடைந்தன. மணிக்கு 25,000 மைல் வேகத்தில் வந்த விண்கலத்தின் வேகத்தை, வெறும் 20 மைல் என்ற மிகக் குறைந்த அளவிற்கு இந்த பாராசூட்டுகள் வெற்றிகரமாகக் குறைத்தன.

பசிபிக் கடலில் ஸ்பிளாஷ்டவுன்

இறுதியாக, அதிகாலை ஓரியன் விண்கலம் கலிபோர்னியாவின் சான் டியாகோ கடற்கரையிலிருந்து சுமார் 60 மைல் தொலைவில் பசிபிக் கடலில் கச்சிதமாக வந்து விழுந்தது. இது 'ஸ்பிளாஷ்டவுன்' (Splashdown) என்று அழைக்கப்படுகிறது. விண்கலம் கடலில் விழுந்த சில நிமிடங்களிலேயே, அங்குக் காத்திருந்த அமெரிக்கக் கடற்படையின் யு.எஸ்.எஸ் ஜான் பி. முர்தா (USS John P. Murtha) கப்பலில் இருந்து ஹெலிகாப்டர்கள் மற்றும் சிறிய படகுகள் மூலம் மீட்புப் படையினர் விரைந்தனர்.

நான்கு விண்வெளி வீரர்களும் பாதுகாப்பாக விண்கலத்திலிருந்து வெளியே எடுக்கப்பட்டு, மருத்துவப் பரிசோதனைக்காக மீட்புக் கப்பலுக்கு அழைத்துச் செல்லப்படஉள்ளனர். இதன் மூலம் 10 நாட்கள் நீடித்த வரலாற்றுச் சிறப்புமிக்க ஆர்டெமிஸ்-II மிஷன் முழுமையான வெற்றியை எட்டியுள்ளது.

கடந்த ஏப்ரல் 1-ஆம் தேதி, உலகின் அதிநவீன எஸ்.எல்.எஸ் (SLS) ராக்கெட் மூலம் நான்கு விண்வெளி வீரர்களுடன் 'ஓரியன்' விண்கலம் விண்ணில் பாய்ந்தது. 1972-ல் அப்பல்லோ மிஷனுக்குப் பிறகு, நிலவின் சுற்றுப்பாதைக்கு மனிதர்கள் சென்ற முதல் பயணம் இதுவாகும். 10 நாட்கள் நீடித்த இந்த ஆய்வுப் பயணம், எதிர்காலத்தில் மனிதர்கள் நிலவில் தங்கி ஆய்வு செய்வதற்கான அடித்தளமாகப் பார்க்கப்படுகிறது.

ஆர்டெமிஸ்-II: நிலவுப் பயணம் - ஒரு முழுமையான பார்வை

இந்த மிஷன் என்ன?

ஆர்டெமிஸ்-II என்பது நாசாவின் (NASA) ஆழ்ந்த விண்வெளி ஆய்வுத் திட்டத்தின் மனிதப் பயணமாகும். 1972-ல் அப்பல்லோ 17 மிஷனுக்குப் பிறகு, சுமார் 53 ஆண்டுகள் கழித்து நிலவை நோக்கி மனிதர்களை ஏற்றிச் சென்ற முதல் விண்கலம் இதுவே. இது நிலவில் தரை இறங்காமல், நிலவை ஒரு முறை சுற்றிவிட்டு மீண்டும் பூமிக்குத் திரும்பும் 10 நாள் சோதனையூட்டப் பயணமாகும் (Lunar Flyby).

ஏன் இந்த மிஷன்?

இந்த மிஷனின் முதன்மையான நோக்கம், மனிதர்கள் விண்வெளியில் நீண்ட தூரம் பயணிப்பதற்கான தொழில்நுட்பங்களைச் சோதிப்பதே ஆகும்.

விண்கலத்தின் உயிர் காக்கும் அமைப்புகள் (Life Support Systems) சரியாகச் செயல்படுகிறதா என்பதை உறுதி செய்தல்.

நிலவுக்கும் பூமிக்கும் இடையிலான தகவல் தொடர்பு மற்றும் வழிகாட்டுதல் தொழில்நுட்பங்களை ஆய்வு செய்தல்.

எதிர்காலத்தில் நிலவில் மனிதர்கள் தரை இறங்குவதற்கு (Artemis-III) இந்த மிஷன் ஒரு முன்னோட்டமாக அமைகிறது.

யார் சென்றார்கள்? எதில் சென்றார்கள்?

இந்த வரலாற்றுப் பயணத்தில் நான்கு விண்வெளி வீரர்கள் பங்கேற்றனர்:

ரீட் வைஸ்மேன் (Commander): அமெரிக்க விண்வெளி வீரர்.

விக்டர் குளோவர் (Pilot): நிலவை நோக்கிய பயணத்தில் பங்கேற்ற முதல் கறுப்பின வீரர்.

கிறிஸ்டினா கோக் (Mission Specialist): நிலவை நோக்கிய பயணத்தில் பங்கேற்ற முதல் பெண்.

ஜெர்மி ஹேன்சன் (Mission Specialist): கனடா நாட்டின் சார்பில் பங்கேற்ற முதல் விண்வெளி வீரர்.

இவர்கள் 'ஓரியன்' (Orion) என்ற அதிநவீன விண்கலத்தில் பயணம் செய்தனர்.

அவர்கள் எப்படிச் சென்றார்கள்?

இந்த விண்கலமானது உலகின் மிக சக்திவாய்ந்த ராக்கெட்டான எஸ்.எல்.எஸ் (SLS - Space Launch System) மூலம் கடந்த ஏப்ரல் 1, 2026 அன்று விண்வெளியில் ஏவப்பட்டது. பூமியின் சுற்றுப்பாதையை அடைந்த பிறகு, ஓரியன் விண்கலம் நிலவை நோக்கித் தனது பயணத்தைத் தொடர்ந்தது. நிலவின் ஈர்ப்பு விசையைப் பயன்படுத்தி (Slingshot effect) நிலவைச் சுற்றி வந்து மீண்டும் பூமியை நோக்கித் திரும்பியது.

சாதித்தது என்ன?

தொலைதூர சாதனை: ஏப்ரல் 6 அன்று பூமியில் இருந்து 2,52,757 மைல்கள் தொலைவைக் கடந்து, மனிதர்கள் விண்வெளியில் பயணித்த மிக நீண்ட தூரம் என்ற சாதனையைப் படைத்தனர்.

ஆய்வுகள்: நிலவின் 'மறுபக்கம்' (Far side) குறித்த தெளிவான தரவுகள் மற்றும் புகைப்படங்களைச் சேகரித்தனர். அதாவது நாம் பார்க்காத நிலவின் பின் பக்கம் பற்றிய ஆய்வுகளை செய்தனர்.

தொழில்நுட்பச் சோதனை: விண்வெளியில் லேசர் மூலம் தகவல் பரிமாற்றம் செய்யும் முறையை வெற்றிகரமாகச் சோதித்தனர்.

English summary

NASA Artemis II Mission Success: Orion Spacecraft Completes Historic Lunar Journey with Perfect Splashdown