நீட் தேர்வு முடிவுகள்.. மாணவர்களை விட மாணவிகளே அதிக தேர்ச்சி.. முதலிடம் பிடித்த மாணவர் யார்?

டெல்லி: இளநிலை மருத்துவ படிப்புகளுக்கான நீட் தேர்வு முடிவுகள் வெளியாகி இருக்கும் நிலையில், மாணவர்களை விடவும் மாணவிகளே அதிகளவில் தேர்ச்சியை பெற்றுள்ளனர். மொத்தமாக சுமார் 22 லட்சம் பேர் எழுதிய நீட் தேர்வில், 5.14 லட்சம் மாணவர்களும், 7.22 லட்சம் மாணவிகளும் தேர்ச்சி பெற்றுள்ளனர். அதேபோல் அகில இந்திய அளவில் டாப் 10 இடங்களை பிடித்த மாணவர்களையும் பார்க்கலாம்.

நாடு முழுவதும் இளநிலை மருத்துவ படிப்புகளுக்கான நீட் தேர்வு முடிவுகள் வெளியிடப்பட்டுள்ளது. இந்தியாவில் எம்பிபிஎஸ், பிடிஎஸ் உள்ளிட்ட இளநிலை மருத்துவப் படிப்புகளில் மாணவர்கள் சேர்வதற்கு தேசிய அளவில் நீட் தேர்வில் தேர்ச்சி பெறுவது கட்டாயமாகும். தமிழ்நாடு தொடர்ச்சியாக எதிர்த்து வந்தாலும், நீட் தேர்வு கட்டாயமாக நடக்க வேண்டும் என்பதில் மத்திய அரசு தீவிரமாக உள்ளது.

நீட் தேர்வு

இந்த நிலையில் 2025-26 கல்வியாண்டுக்கான இளநிலை மருத்துவ படிப்புகளுக்கான நீட் நுழைவுத்தேர்வு மே 4ஆம் தேதி நடைபெற்றது. பிற்பகல் 2 மணிக்குத் தொடங்கி மாலை 5.20 மணி வரை நடைபெற்றது. இத்தேர்வை நாடு முழுவதும் சுமார் 23 லட்சம் மாணவர்கள் எழுதியுள்ளனர். அதிலும் தமிழ்நாட்டில் இருந்து மட்டும் சுமார் ஒன்றரை லட்சம் மாணவர்கள் இந்த தேர்வை எழுதினர்.

முடிவுகள் வெளியீடு

தற்போது நீட் தேர்வு முடிவுகள் வெளியாகி இருக்கும் நிலையில், தமிழ்நாட்டைச் சேர்ந்த 6 மாணவர்கள் டாப் 100 இடங்களுக்குள் பிடித்து அசத்தி இருக்கின்றனர். சூர்யநாராயணன் என்ற மாணவர் தேசிய அளவில் 27வது இடமும், மாநில அளவில் முதலிடமும் பிடித்து அசத்தி இருக்கிறார். நீட் தேர்வை பொறுத்தவரை தேர்வு எழுதிய 22.7 லட்சம் மாணவர்கள், 12.36 லட்சம் மாணவர்கள் தேர்ச்சி பெற்றுள்ளனர்.

மாணவிகள் அசத்தல்

மொத்தமாக 5 லட்சத்து 14 ஆயிரத்து 63 மாணவர்களும், 7 லட்சத்து 22 ஆயிரத்து 462 மாணவிகளும் தேர்ச்சி பெற்றுள்ளனர். அதேபோல் மூன்றாம் பாலினத்தவர்களில் 6 பேர் தேர்ச்சி பெற்றுள்ளனர். அகில இந்திய அளவில் ராஜஸ்தான் மாநிலத்தைச் சேர்ந்த மகேஷ் குமார் முதலிடம் பிடித்து அசத்தி இருக்கிறார். அதேபோல் மாணவிகளில் டெல்லியை சேர்ந்த அவிகா அகர்வால் முதலிடம் பிடித்திருக்கிறார்.

முதலிடம் யார்?

தேசிய அளவில் அவிகா அகர்வால் 5வது இடத்தை பிடித்துள்ளார். அதேபோல் டாப் 4 இடங்களை மாணவர்கள் பெற்று அசத்தி இருக்கின்றனர். மத்திய பிரதேசத்தைச் சேர்ந்த உட்கர்ஷ் அவாதியா 2வது இடத்தையும், மகாராஷ்டிரா மாநிலத்தைச் சேர்ந்த க்ரிஷன்ஹ் ஜோஷி 3வது இடத்தையும், டெல்லியைச் சேர்ந்த மிரினல் கிஷோர் ஜா 4வது இடத்தையும், அவிகா அகர்வால் 5வது இடத்தை பிடித்துள்ளனர்.

டாப் 10 பட்டியல்

அதேபோல் குஜராத் மாநிலத்தைச் சேர்ந்த ஜெனில் வினோத்பாய் பயானி 6வது இடத்தையும், பஞ்சாப் மாநிலத்தைச் சேர்ந்த கேசவ் மிட்டல் 7வது இடத்தையும், குஜராத் மாநிலத்தைச் சேர்ந்த ஜா பவ்யா சிராஜ் 8வது இடத்தையும், டெல்லியைச் சேர்ந்த ஹர்ஷ் கெடாவத் 9வது இடத்தையும், மகாராஷ்டிராவைச் சேர்ந்த ஆரவ் அகர்வால் 10வது இடத்தையும் பிடித்துள்ளனர்.

English summary

With the NEET UG 2025 results officially released, data reveals that more female candidates than male have successfully cleared the exam. Out of approximately 22 lakh aspirants, 7.22 lakh girls cleared the test compared to 5.14 lakh boys. The All India Top 10 rank list has also been published, showcasing the nation's highest performers in the medical entrance exam.