நீட் தேர்வு முடிவுகள்.. முதலிடம் பிடித்த உத்தரப் பிரதேசம்.. தமிழ்நாட்டிற்கு எத்தனையாவது இடம்?

சென்னை: இளநிலை மருத்துவப் படிப்புகளுக்கான நீட் தேர்வு முடிவுகளில் உத்தரப் பிரதேசத்தைச் சேர்ந்த மாணவர்கள் அதிகளவில் தேர்ச்சி பெற்றுள்ளனர். 1.70 லட்சம் மாணவர்கள் நீட் தேர்வில் தேர்ச்சி பெற்றுள்ள நிலையில், தமிழ்நாட்டில் 76,181 மாணவர்கள் நீட் தேர்வில் தேர்ச்சி பெற்று அசத்தி உள்ளனர்.

இளநிலை மருத்துவப் படிப்புகளுக்கான நீட் தேர்வு முடிவுகள் வெளியாகி இருக்கிறது. மே 4ஆம் தேதி நீட் தேர்வு நடத்தப்பட்டது. நாடு முழுவதும் இருந்து 557 நகரங்களில் 13 மொழிகளில் நீட் தேர்வு நடத்தப்பட்டது. மொத்தமாக 22.7 லட்சம் மாணவர்கள் விண்ணப்பித்திருந்த நிலையில், சுமார் 22 லட்சத்திற்கும் அதிகமான மாணவர்கள் தேர்வை எழுதி இருந்தனர்.

இந்த நிலையில் நீட் தேர்வு முடிவுகள் வெளியிடப்பட்டுள்ளது. இதன்படி தேர்வு எழுதிய 22 லட்சம் பேரில் 12.36 லட்சம் மாணவர்கள் தேர்ச்சி பெற்றுள்ளனர். அதில் 7.22 லட்சம் மாணவிகளும், 5.14 லட்சம் மாணவர்களும் அடங்குவர். அதேபோல் மூன்றாம் பாலினத்தவர்களில் 6 பேர் தேர்ச்சி பெற்றிருக்கின்றனர். கடந்த ஆண்டை போல நடப்பாண்டிலும் மாணவிகளே அதிகளவில் தேர்வு பெற்றிருக்கிறார்கள்.

சிபிஎஸ்இ தேர்வு முடிவுகளில் வட இந்தியாவை விடவும் தென்னிந்திய மாநிலங்களில் தேர்ச்சி சதவிகிதம் அதிகமாக இருந்தது. ஆனால் நீட் தேர்வு முடிவுகளில் தென்னிந்திய மாநிலங்களை விடவும் வட இந்திய மாநிலங்களே முன்னணியில் இருக்கிறது. அதன்படி உத்தரப் பிரதேச மாநில அதிக தேர்ச்சியுடன் முதலிடத்தில் இருக்கிறது. உத்தரப் பிரதேசத்தைச் சேர்ந்த 1 லட்சத்து 70 ஆயிரத்து 684 மாணவர்கள் நீட் தேர்வில் தேர்ச்சி பெற்றுள்ளனர்.

அதேபோல் மகாராஷ்டிரா மாநிலத்தில் இருந்து 1 லட்சத்து 25 ஆயிரத்து 727 மாணவர்கள் தேர்ச்சி பெற்றுள்ளனர். இதன்பின் 3வது இடத்தில் ராஜஸ்தான் மாநிலம் உள்ளது. இங்கிருந்து 1 லட்சத்து 19 ஆயிரத்து 865 மாணவர்கள் தேர்ச்சி பெற்றுள்ளனர். இதன்பின் கர்நாடகா மாநிலத்தில் இருந்து 83 ஆயிரத்து 582 மாணவர்கள் தேர்ச்சியுடன் 4வது இடத்தில் உள்ளது.

தொடர்ந்து பீகார் மாநிலத்தில் 80 ஆயிரத்து 954 மாணவர்கள் தேர்ச்சி பெற்றுள்ளனர். பின்னர் தமிழ்நாடு 76 ஆயிரத்து 181 மாணவர்கள் தேர்ச்சி பெற்று 6வது இடத்தில் இருக்கிறது. இதன்பின் கேரளா 73 ஆயிரத்து 328 மாணவர்களின் தேர்ச்சியுடன் 7வது இடத்தில் இருக்கிறது. நடப்பாண்டில் இந்த 7 மாநிலங்களும் முன்னணியில் உள்ளன.

English summary

UG NEET Exam Results 2025: Over 1.70 lakh students from Uttar Pradesh qualified in NEET UG 2025, making it the leading state. Tamil Nadu also performed strongly, securing the 6th position with 76,181 successful candidates.