“புர்கா” பட சர்ச்சை.. குர்ஆனை இழிவுபடுத்துவதா! கொந்தளித்த சீமான்.. “தடை செய்யாவிட்டால் போராட்டம்”

Updated: Thursday, April 20, 2023, 16:21 [IST]

Subscribe to Oneindia Tamil

சென்னை: இஸ்லாம் மார்க்கம் பெண்களுக்கு எதிரானது என்பதைபோல் சித்தரித்து இருக்கும் புர்கா திரைப்படத்துக்கு தடை விதிக்க வேண்டும் என நாம் தமிழர் கட்சி ஒருங்கிணைப்பாளர் சீமான் அறிவித்து உள்ளார். மத்திய மாநில அரசுகள் இதனை ஏற்காவிட்டால் மக்களை திரட்டி போராடுவோம் எனவும் அவர் எச்சரித்து உள்ளார்.

மெட்ராஸ் உள்ளிட்ட திரைப்படங்களில் நடித்து இருக்கும் கலையரசன், மிர்னா, ஜிஎம் குமார் உள்ளிட்டோர் நடிப்பில் சர்ஜுன் கேஎம் இயக்கத்தில் சமீபத்தில் ஆஹா ஓடிடி தளத்தில் வெளியான திரைப்படம் புர்கா. சிவாத்மிகா இசையமைத்து இருக்கும் இப்படம் இஸ்லாமிய பெண்கள் அணியும் ஹிஜாப், இத்தா முறை விமர்சிக்கும் வகையில் அமைந்து உள்ளது.

NTK Seeman demand to ban Burqa film which hurt muslim sentiments

ஹிஜாப் முறையையும் இஸ்லாமிய சட்டத்திட்டங்களையும் விமர்சிப்பதாக கூறி இப்படத்திற்கு இஸ்லாமியர்களும் இஸ்லாமிய அமைப்புகளும் கண்டனங்களை பதிவு செய்து வருகிறார்கள். இந்த நிலையில் புர்கா படத்தை தடை விதிக்க வேண்டும் என நாம் தமிழர் கட்சி ஒருங்கிணைப்பாளர் சீமான் வலியுறுத்தி உள்ளார்.

இது குறித்து அவர் வெளியிட்டு இருக்கும் அறிக்கையில், "நபி பெருமானாரின் நன்மொழிகளால் தொகுக்கப்பட்டு இஸ்லாமியர்கள் பின்பற்றும் ஷரியத் சட்டம் பெண்களுக்குச் சம உரிமை வழங்குவதில் பல முற்போக்கான கருத்துக்களை வலியுறுத்தும் நிலையில், இஸ்லாம் மார்க்கமே பெண்களுக்கு எதிரானது போல் 'புர்கா' திரைப்படம் சித்தரிப்பது வன்மையான கண்டனத்திற்குரியது.

இந்திய பெருநாட்டில் முன்னெப்பொழுதும் இல்லாத அளவிற்கு மதவாத சக்திகளின் ஆதிக்கம் அதிகரித்து, அவர்களின் கொடுங்கரங்களில் அதிகாரம் சிக்கியுள்ள நிலையில், ஒரு குறிப்பிட்ட சமய மக்களை ஒட்டுமொத்த சமூகத்திற்கும் எதிரானவர்கள் போலக் காட்ட முனைவது கடுமையான எதிர் விளைவுகளை ஏற்படுத்தவே வழிவகுக்கும்.

நாட்டின் ஒற்றுமைக்கும், நல்லிணக்கத்திற்கும் எவ்வித தீங்கும் ஏற்படாத வண்ணம் படைப்பாளிகள் தங்களின் கடமையை உணர்ந்து, மிகுந்த பொறுப்புணர்வுடன் தங்களது படைப்புகளை வெளிக்கொணர வேண்டுமென்று கேட்டுக்கொள்கிறேன். அதோடு குறிப்பிட்ட மக்களின் நம்பிக்கைகளை இழிவுப்படுத்தி, அவர்களின் உணர்வுகளைச் சீண்டி, பதற்றமான சூழலை உருவாக்கும் படைப்புகளைப் புறக்கணிக்க வேண்டுமென திரைக்கலை ரசிகர்களையும் கேட்டுக்கொள்கிறேன்.

தற்போது 'ஆகா ஓடிடி இணையதளத்தில் வெளியாகியுள்ள 'புர்கா' திரைப்படம் இசுலாமிய பெருமக்களின் இறை நம்பிக்கையையும், அவர்களின் புனித நூலான குரானையும் இழிவுப்படுத்துவதாகக் கூறி எதிர்ப்பு தெரிவித்து அதனைத் தடைசெய்யக் கோரும் இசுலாமிய மக்களின் கோரிக்கையை இந்திய ஒன்றிய அரசும், தமிழ்நாடு அரசும் விரைந்து கவனத்தில் எடுக்க வேண்டுமெனவும், தவறும் பட்சத்தில் நாம் தமிழர் கட்சி மக்களைத் திரட்டி போராடும் என்றும் தெரிவித்துக் கொள்கிறேன்." என்று குறிப்பிட்டு உள்ளார்.