சில்வர் டம்ளரை காட்டிய பிரேமலதா! "அண்ணியாரே வேண்டாம்" என அரண்ட ஓ.பன்னீர்செல்வம்! அவையில் கலகல

சென்னை: டம்ளருக்கு பதிலாக வாட்டர் பாட்டில்களில் தண்ணீர் கொடுத்தால், அதை வீசும் வாய்ப்பு இருப்பதாக முன்னாள் முதல்வர் ஓ.பன்னீர்செல்வம் கூறியதால் தமிழக சட்டசபையில் சிரிப்பலை எழுந்தது.

தமிழக சட்டசபை கூட்டத் தொடர் சனி, ஞாயிறு இரு நாட்கள் விடுமுறைக்கு பிறகு இன்று மீண்டும் தொடங்கியது. அப்போது மேகதாது அணைக்கு எதிரான தீர்மானத்தில் திமுகவின் இடைச்செருகல் கோரிக்கையை எதிர்த்து அவையில் அதிமுகவினர் அமளி ஏற்பட்டது.

இதையடுத்து மேகதாது அணைக்கு எதிரான தீர்மானத்தில் எதிர்க்கட்சித் தலைவர் உதயநிதியின் கோரிக்கையான புதிய நடுவர் ஆணையம் அமைப்பது குறித்து அமைச்சர்கள் புஸ்ஸி ஆனந்த், ஆதவ் அர்ஜுனா ஆகியோர் விளக்கினர்.

இதையடுத்து விருத்தாசலம் எம்எல்ஏ பிரேமலதா விஜயகாந்த் பேசுகையில், "அண்ணன் விஜயகாந்த் சார்பிலும் தேமுதிக சார்பிலும் முதல்வர் விஜய்க்கு பிறந்தநாள் வாழ்த்துகள்.

ஆளுநர் உரை ஆளும் அரசின் செய்தி தொடர்பாளர் உரை போன்று இருந்தது. மேலும் தமிழில் பேசினாலே காதுக்குள் தேன் வந்து பாய்கிறது என்போம். ஆனால் ஆளுநர் பேசிய 37 நிமிடங்களில் பல பிழைகள் இருந்தன.

அண்ணாதுரை, கருணாநிதி, வேலுநாச்சியார் உள்ளிட்டோரின் பெயர்களை தவறாகவே படித்திருந்தார். விஜய் பிறந்தநாளில் இந்த மாமன்றத்திற்கு ஒரு கோரிக்கையை வைக்கிறேன்.

அதாவது அவை பணியாளர்கள் ஒவ்வொரு உறுப்பினர்களுக்கும் டம்ளரில் தண்ணீர் வைத்து வருகிறார்கள். இதை பார்க்க கஷ்டமாக இருக்கிறது. அந்த டம்ளரில் தண்ணீரை கொண்டு வருவதும் பிறகு அதை திரும்ப கொண்டு செல்வதும் என அவர்களுக்கு இருக்கும் பணிகளுக்கு மத்தியில் இந்த பணியையும் செய்கிறார்கள்.

இன்று டெக்னாலஜி எவ்வளோ முயன்றுவிட்டது. எனவே ஒவ்வொரு உறுப்பினர்களுக்கும் வாட்டர் பாட்டில் கொடுத்துவிட்டால் அவர்கள் அவர்களது பணியை பார்ப்பார்கள். அவை முடிந்ததும் அந்த வாட்டர் பாட்டிலை எடுத்துச் சென்றுவிடலாம்.

இதனால் அரசுக்கு எந்த செலவும் ஆகிவிடாது என்றார். அப்போது குறுக்கிட்ட ஓபிஎஸ், "அண்ணியார் ஒரு நல்ல கருத்தை சொல்லியிருக்கிறார்கள். அந்த கருத்து ஏற்புடையதல்ல என்பதை நான் தெரிவித்துக் கொள்ள கடமைப்பட்டிருக்கிறேன். ஏனென்றால் கோபம் வந்தால் தண்ணீர் பாட்டிலை தூக்கி அடிக்க வாய்ப்பிருக்கிறது" என கூறிய போது அவையில் சிரிப்பலை எழுந்தது. முதல்வர் விஜய்யும் சிரித்தார்.

அப்போது பிரேமலதா பேசுகையில், தூக்கி அடிப்பது என முடிவு செய்துவிட்டால் வாட்டர் பாட்டில்தான் என்றில்லை. இங்கு எத்தனையோ பொருட்கள் இருக்கின்றன. அவற்றில் அடிக்கலாம் என காமெடியாக சொன்னார்.