காரைக்குடி தொகுதி நிலவரம் என்ன? சீமான் சட்டசபை செல்வாரா? விகடன் கருத்துக்கணிப்பு

Updated: Saturday, April 18, 2026, 10:27 [IST]

Subscribe to Oneindia Tamil

சிவகங்கை: சீமான் சட்டசபை செல்ல வேண்டும் என்ற இலக்குடன் நாதகவினர் பணியாற்றி வரும் சூழலில், காரைக்குடி தொகுதியின் கருத்துக்கணிப்பை ஜூனியர் விகடன் வெளியிட்டுள்ளது. 3 வலிமையான வேட்பாளர்கள் களத்தில் இருப்பதால், யார் வெற்றி பெறுவார்கள் என்பதே கணிக்க முடியாத ஒன்றாக மாறி இருக்கிறது.

சட்டசபைத் தேர்தலுக்கு இன்னும் 4 நாட்கள் மட்டுமே இருக்கும் நிலையில், தேர்தல் பிரச்சாரம் உச்சத்தில் இருக்கிறது. அந்த வகையில் நாதக தலைமை ஒருங்கிணைப்பாளர் சீமான் அடுத்த சில நாட்கள் சிவகங்கை மாவட்டத்திலேயே முகாமிட இருக்கிறார். இந்த முறை சட்டசபையில் சீமானின் குரல் என்ற இலக்குடன் நாதகவினர் காரைக்குடி தொகுதியில் தீவிரமாக பணியாற்றி வருகின்றனர்.

2016 சட்டசபைத் தேர்தலில் கடலூர் தொகுதியிலும், 2021 சட்டசபைத் தேர்தலில் திருவொற்றியூர் தொகுதியிலும் போட்டியிட்டு சீமான் தோல்வி அடைந்தார். இந்த முறை நடிகர் விஜய் அரசியல் களம் புகுந்துள்ளதால், எப்படியாவது சட்டசபை செல்ல வேண்டும் என்பதில் சீமான் தீவிரமாக இருக்கிறார். அதற்கேற்ப கடந்த 6 மாதங்களாக நாதகவினர் காரைக்குடி தொகுதியில் வாக்கு சேகரிப்பில் ஈடுபட்டு வருகின்றனர்.

ஆனால் காரைக்குடி தொகுதியில் களம் கடுமையாக மாறி இருக்கிறது. ஏனென்றால் திமுக கூட்டணி சார்பாக காங்கிரஸ் வேட்பாளராக சிட்டிங் எம்எல்ஏ மாங்குடி களம் காண்கின்றார். எளிதாக அணுக கூடியவர் என்ற பெயர் தொகுதியில் இருப்பதோடு, கூட்டணியின் பலமும் மாங்குடிக்கு கூடுதல் சாதகத்தை உருவாக்கி கொடுக்கிறது.

அதிமுக கூட்டணி சார்பாக அமமுக வேட்பாளர் தேர்போகி பாண்டி சமூக வாக்குகளை தன் பக்கம் திருப்புகிறார். அதேபோல் தவெக தரப்பில் போட்டியிடும் பிரவு அதிருப்தி வாக்குகளை பிரிக்கிறார். அதேபோல் விவசாயிகள், நடுநிலை வாக்காளர்கள் நாதகவுக்கு ஆதரவு அளிக்கின்றனர். இந்த நிலையில் காரைக்குடி தொகுதி தொடர்பாக ஜூனியர் விகடன் கருத்துக்கணிப்பு வெளியாகி இருக்கிறது.

அதன்படி, காரைக்குடி தொகுதியில் மீண்டும் சிட்டிங் எம்எல்ஏ மாங்குடி மீண்டும் வெற்றி பெறுவார் என்று தெரிவிக்கப்பட்டுள்ளது. அதேபோல் நாம் தமிழர் கட்சியின் சீமான் 2வது இடத்தை பிடிப்பார் என்றும், தவெக பிரபு 3வது இடத்திற்கு செல்வார் என்றும், அமமுக வேட்பாளர் தேர்போகி பாண்டி 4வது இடம் செல்வார் என்றும் தெரிவிக்கப்பட்டுள்ளது. அதேபோல் இவர்களுக்கு இடையில் பெரிய வாக்கு வித்தியாசம் இருக்காது என்றும் தெரிவிக்கப்பட்டுள்ளது.