அதிமுக அடையாளங்களை அழித்த ஓபிஎஸ்.. வீட்டு கேட்டில் இருந்த இரட்டை இலை சின்னம் அகற்றம்.. மாறிய கலர்!

Updated: Sunday, March 1, 2026, 10:25 [IST]

Subscribe to Oneindia Tamil

சென்னை: திமுகவில் இணைந்ததுமே அதிமுக அடையாளங்களை முற்றிலுமாக துறந்துள்ளார் ஓ.பன்னீர்செல்வம். பெரியகுளத்தில் உள்ள ஓபிஎஸ் வீட்டின் நுழைவாயில் கதவில் பொருத்தப்பட்டிருந்த இரட்டை இலை சின்னம் அகற்றப்பட்டுள்ளது. மேலும், அவரது வீட்டின் சுவற்றில் அதிமுக கட்சி (கருப்பு - வெள்ளை - சிவப்பு) வண்ணம் மாற்றப்பட்டு திமுக கட்சிக் கொடி வண்ணம் (கருப்பு - சிவப்பு) தீட்டப்பட்டுள்ளது.

அதிமுகவில் இருந்து எடப்பாடி பழனிசாமியால் நீக்கப்பட்ட முன்னாள் முதலமைச்சர் ஓ.பன்னீர்செல்வம், மீண்டும் கட்சியில் எப்படியாவது சேர்ந்து விடலாம் என்ற எண்ணத்தில் இருந்தார். இதற்காக, அதிமுக தொண்டர்கள் உரிமை மீட்புக் குழுவை தொடங்கி நடத்தி வந்தார். தமிழக சட்டசபைக்கு விரைவில் தேர்தல் அறிவிக்கப்பட உள்ள நிலையில், அமமுகவை கூட்டணியில் சேர்த்துக் கொண்டார் எடப்பாடி பழனிசாமி. ஆனால், ஓபிஎஸ்ஸை ஏற்கவில்லை.

ஓபிஎஸ், மீண்டும் அதிமுகவில் தன்னை இணைக்க மேற்கொண்ட அனைத்து முயற்சிகளும் தோல்வியில் முடிந்த நிலையில், ஓபிஎஸ் ஆதரவாளர்களாக இருந்த முன்னாள் எம்எல்ஏக்கள் மனோஜ் பாண்டியன், வைத்திலிங்கம் ஆகியோர் திமுகவுக்கு சென்று விட்டனர். அதேபோல, கு.ப.கிருஷ்ணன், ஜேசிடி பிரபாகர் ஆகியோர் தவெகவுக்கு சென்றுவிட்டனர். ராஜ்யசபா எம்.பி தர்மர் மீண்டும் எடப்பாடி பழனிசாமி தலைமையை ஏற்றுக்கொண்டார்.

ஓபிஎஸ்ஸுக்கு ஆலோசகராக இருந்த பண்ருட்டி ராமச்சந்திரன், புதிய கட்சியை தொடங்கிவிட்டார். சசிகலாவும் புதிய கட்சியை தொடங்கியுள்ளார். இதனால், தனது அரசியல் எதிர்காலம் கேள்விக்குறி ஆன நிலையில், ஓபிஎஸ் அதிரடி முடிவை எடுத்தார். அதன்படி திமுகவில் இணைய விருப்பம் தெரிவித்து, முதல்வர் ஸ்டாலினிடம் பேசினார்.

முதல்வர் ஸ்டாலின், ஓபிஎஸ் வருகைக்கு பச்சைக்கொடி காட்டிய நிலையில் அண்மையில் திமுகவில் இணைந்தார் ஓபிஎஸ். அண்ணா அறிவாலயத்தில் முதல்வர் ஸ்டாலினை சந்தித்து ஓ.பன்னீர்செல்வம் தன்னை திமுகவில் இணைத்துக் கொண்டார். முதல்வர் ஸ்டாலினும் அவரை ஆரத்தழுவி வரவேற்றார்.

தொடர்ந்து, ஸ்டாலின் முன்னிலையில் திமுக உறுப்பினருக்கான படிவத்தில் ஓபிஎஸ் கையெழுத்திட்டார். ஓபிஎஸ் உடன், அவரது மகனும், முன்னாள் எம்.பியுமான ரவிந்திரநாத், ஓபொஎஸ் ஆதரவு எம்எல்ஏ அய்யப்பன், முன்னாள் எம்.பி கோபாலகிருஷ்ணன், புதுச்சேரி ஓம் சக்தி சேகர் உள்ளிட்டோரும் திமுகவில் இணைந்தனர்.

அதிமுக சார்பில் 3 முறை முதலமைச்சரான ஓ.பன்னீர்செல்வம், திமுகவில் இணைந்தது தமிழக அரசியல் வட்டாரத்தில் பெரும் பரபரப்பை ஏற்படுத்தியது. தமிழக சட்டசபைக்கு தேர்தல் அறிவிக்கப்பட்டால், திமுக சார்பில் தேனி தொகுதியில் அவர் போட்டியிட முயற்சி எடுப்பார் என்று தகவல்கள் வெளியாகி உள்ளன.

ஓ.பன்னீர்செல்வம் தனது காரின் முன்பகுதியில் ஜெயலலிதாவின் புகைப்படத்தை வைத்து இருந்தார். அதிமுகவில் இருந்து நீக்கப்பட்ட போதிலும் அவர் இந்த படத்தை அகற்றியது இல்லை. ஆனால், திமுகவில் இணைந்ததை தொடர்ந்து, அன்றைய தினமே ஜெயலலிதா படத்தை அகற்றிய ஓபிஎஸ், அதே இடத்தில் முதல்வர் ஸ்டாலின் படத்தை வைத்துள்ளார். மேலும், காரின் முன்புறத்திலும் திமுக கொடியை பொருத்தினார்.

ஓ.பன்னீர்செல்வத்தின் சொந்த ஊரான பெரியகுளத்தில் அவரது இல்லத்தின் நுழைவாயில் கதவில் பொருத்தப்பட்டிருந்த இரட்டை இலை சின்னம் அகற்றப்பட்டுள்ளது. மேலும், அவரது வீட்டில் இருந்த அதிமுக கட்சி (கருப்பு - வெள்ளை - சிவப்பு) வண்ணம் மாற்றப்பட்டு திமுக கட்சிக் கொடி வண்ணம் (கருப்பு சிவப்பு) தீட்டப்பட்டுள்ளது.

ஓபிஎஸ், அவரது மகன் ரவீந்திரநாத் பயன்படுத்தும் அனைத்து கார்களிலும் இருந்த ஜெயலலிதா படம் அகற்றப்பட்டு திமுக தலைவர் மு.க.ஸ்டாலின் படம் பொருத்தப்பட்டுள்ளது. மேலும், சட்டை பாக்கெட்டிலும் ஜெயலலிதா படத்திற்கு பதிலாக ஸ்டாலின் படத்தை வைத்துள்ளார் ஓபிஎஸ். திமுகவில் இணைந்ததுமே, அதிமுக அடையாளங்களை முற்றிலுமாக துறந்துள்ளார் ஓபிஎஸ்.