இந்தியா கூட்டணியில் இருந்து திமுக விலகுவதாக மு.க ஸ்டாலின் என்னிடம் கூறவில்லை - காங்கிரஸ் ப.சிதம்பரம்

சென்னை: இந்தியா கூட்டணியில் இருந்து திமுக விலகப் போவதாக மு.க ஸ்டாலின் என்னிடம் கூறவில்லை என்று காங்கிரஸ் மூத்த தலைவர் ப சிதம்பரம் கூறியுள்ளார். மேலும் தவெக அரசு 5 ஆண்டுகள் ஆட்சி அமைக்கும் நம்பிக்கை இருக்கிறது என்றும், முதல் முறையாக 101 பேர் சட்டசபைக்கு வந்திருக்கிறாகள் அவர்களுக்கு கால அவகாசம் அளிக்க வேண்டும் என்றும் அவர் கூறினார்.

நடந்து முடிந்த சட்டசபை தேர்தலில் விஜய்யின் தமிழக வெற்றிக் கழகம் 108 தொகுதிகளில் வெற்றி பெற்று திமுகவுடன் கூட்டணி வைத்து இருந்த கட்சிகள் ஆதரவுடன் ஆட்சி அமைத்துள்ளது. ரிசல்டுக்கு பிறகு திமுக கூட்டணியில் இருந்து முதல் கட்சியாக வெளியேறி விஜய் கட்சி ஆதரவு அளித்த காங்கிரஸ் கட்சிக்கு இரு அமைச்சரவை பதவியும் வழங்கப்பட்டுள்ளது.

ப சிதம்பரம் பேட்டி

இதே போல் விசிக மற்றும் இந்தியன் யூனியன் முஸ்லீம் கட்சிகளுக்கும் தலா ஒரு அமைச்சரவை பதவி வழங்கப்பட்டது. சிபிஐ, சிபிஎம் கட்சிகள் வெளியில் இருந்து ஆதரவு தருவதாக கூறிவிட்டன. இதனால் திமுக கூட்டணியில் இந்த கட்சிகள் இருக்கிறதா இல்லையா என்ற கேள்வி எழுந்தது. மேலும் தேசிய அளவில் இந்தியா கூட்டணியில் இருந்து திமுக வெளியேறி விட்டதாகவும் பார்க்கப்படுகிறது. ஏனென்றால் நேற்று நடந்த இந்தியா கூட்டணி ஆலோசனைக் கூட்டத்தில் திமுக பங்கேற்கவில்லை.

எனவே இனி இந்தியா கூட்டணியில் திமுக பங்கேற்காது என தகவல் பரவி வரும் நிலையில், இந்தியா கூட்டணியில் இருந்து விலகுவதாக மு.க ஸ்டாலின் என்னிடம் கூறவில்லை என்று ப சிதம்பரம் கூறியுள்ளார். இது தொடர்பாக செய்தியாளர்கள் சந்திப்பின் போது ப சிதம்பரம் கூறியதாவது:- "நடந்து முடிந்த சட்டசபை தேர்தலில் தவெக வெற்றி அனைவரையும் ஆச்சரியப்படுத்தியது. காங்கிரஸ், ஊடகங்கள், கருத்துக்கணிப்பாளர்கள் என யாரும் எதிர்பார்க்காத வகையில் அந்தக் கட்சி சுமார் 35 சதவீத வாக்குகளை பெற்று ஆட்சியை அமைத்துள்ளது.

ஸ்டாலின் என்னிடம் கூறவில்லை

கட்சி தொடங்கி 2 ஆண்டுகளே ஆன நிலையில் இவ்வளவு பெரிய வெற்றியைப் பெற்றிருப்பது குறிப்பிடத்தக்கது. அதற்காக தவெகவுக்கு பாராட்டுகளை தெரிவித்துக் கொள்வகிறேன். இளைஞர்கள் மற்றும் இளம்பெண்கள் அதிக அளவில் தமிழக வெற்றி கழகத்திற்கு வாக்களித்துள்ளனர். கிட்டத்தட்ட ஒவ்வொரு குடும்பத்திலும் குறைந்தது ஒரு வாக்காவது அந்தக் கட்சிக்கு கிடைத்துள்ளது. சமூகத்தின் அனைத்து தரப்பினரும் ஆதரவு அளித்துள்ளனர். சென்னை, கோவை, மதுரை போன்ற நகர்ப்புற பகுதிகளில் அக்கட்சி பெரிய வெற்றியை பதிவு செய்துள்ளது.

தேர்தலுக்குப் பிறகு டெல்லி சென்றிருந்தேன்.. அண்மையில் முன்னாள் முதல்வர் ஸ்டாலினை மரியாதை நிமித்தமாக சந்தித்தேன். அந்த சந்திப்பின் போது நன்றி தெரிவித்ததுடன் பல்வேறு கருத்துகளை பரிமாறிக் கொண்டேன்.. ஆனால், இந்தியா கூட்டணியில் இருந்து திமுக விலகப் போவதாக மு.க. ஸ்டாலின் தன்னிடம் எந்த தகவலும் தெரிவிக்கவில்லை.. இந்தியா கூட்டணி தொடர்பான ஆலோசனைக் கூட்டத்தில் திமுக பங்கேற்கவில்லை என்பது தெரியும்.. மேகதாது விவகாரத்தில் திமுக மற்றும் அதிமுக எடுத்த நிலைப்பாட்டை காங்கிரஸ் ஆதரித்தது போல தற்போதைய அரசின் முடிவுகளையும் ஆதரிக்கும்.." என்று கூறினார்.

5 ஆண்டுகள் ஆட்சி அமைக்கும்

மேலும் கூறிய அவர், "மதச்சார்பின்மை மற்றும் மாநில உரிமைகள் ஆகிய இரு கொள்கைகளையும் தமிழக வெற்றி கழகம் முன்னிறுத்தி வருகிறது. இந்த இரண்டு அம்சங்களே தற்போதைய தமிழக அரசுக்கு ஆதரவு அளிக்க போதுமான காரணங்கள். அந்த அடிப்படை கொள்கைகளில் இருந்து விலகாத வரை அவர்களுக்கு ஆதரவு அளிப்பதில் எந்தத் தவறும் இல்லை" என்றார்.

தவெகவுக்கு காங்கிரஸ் ஆதரவு அளித்ததை அடுத்து, இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் கட்சி, விடுதலை சிறுத்தைகள் கட்சி மற்றும் இந்திய யூனியன் முஸ்லிம் லீக் உள்ளிட்ட கூட்டணிக் கட்சிகளும் தங்களது ஆதரவை வழங்கியுள்ளதாக தெரிவித்தார். தற்போதைய அரசு நிலையான ஆட்சியை வழங்கி நல்லாட்சியை மேற்கொள்ள வேண்டும். தவெக அரசு 5 ஆண்டுகள் ஆட்சி அமைக்கும் நம்பிக்கை இருக்கிறது.. தவெக இப்போது தான் ஆட்சிப் பொறுப்பேற்றுள்ளது என்றும், அமைச்சரவையில் உள்ள 31 அமைச்சர்களுக்கும் சட்டப்பேரவை அனுபவம் இல்லை என்றும், 101 சட்டமன்ற உறுப்பினர்கள் முதல்முறையாக சட்டமன்றத்துக்குள் நுழைந்துள்ளதால், அவர்களுக்கு செயல்பட போதிய அவகாசம் வழங்கப்பட வேண்டும்" என்று கூறினார்.

English summary

P Chidambaram said M.K. Stalin never informed him about any plan to leave the INDIA alliance. He also expressed confidence that the TVK government would complete its term and urged patience for first-time legislators.