சென்னை ஏர்போர்ட்டில் அதிர்ச்சி.. ஓடும் விமானத்தின் அவசர கதவைத் திறந்து குதித்த பயணி.. ஷாக் காரணம்
சென்னை: ஷார்ஜாவிலிருந்து சென்னை வந்த ஏர் அரேபியா (Air Arabia) விமானத்தில், ஓடிக்கொண்டிருந்த விமானத்தின் அவசர கால கதவைத் திறந்து பயணி ஒருவர் கீழே குதித்த சம்பவம் பெரும் அதிர்ச்சியை ஏற்படுத்தியுள்ளது. ஞாயிற்றுக்கிழமை அதிகாலை சென்னை சர்வதேச விமான நிலையத்தில் இந்த அசம்பாவிதம் நிகழ்ந்தது.
நடந்தது என்ன?
ஷார்ஜாவிலிருந்து 231 பயணிகளுடன் ஏர் அரேபியா விமானம் ஞாயிற்றுக்கிழமை அதிகாலை சென்னை விமான நிலையத்தை வந்தடைந்தது. விமானம் தரையிறங்கி, ஓடுபாதையில் (Runway) இருந்து மெதுவாக டாக்ஸிவே (Taxiway) பகுதிக்குச் சென்று கொண்டிருந்தது. இன்னும் முழுமையாக நிற்காத நிலையில், திடீரென 34 வயது மதிக்கத்தக்க பயணி ஒருவர், விமானத்தின் அவசர கால கதவை (Emergency Exit) வலுக்கட்டாயமாகத் திறந்தார்.
இதைக் கண்டு சக பயணிகள் மற்றும் சிப்பந்திகள் அதிர்ச்சியில் உறைந்தனர். சுதாரிப்பதற்குள் அந்தப் பயணி விமானத்திலிருந்து கீழே குதித்தார். விமானம் மிக மெதுவான வேகத்தில் நகர்ந்து கொண்டிருந்ததால், அவருக்குப் பெரிய அளவில் காயங்கள் ஏற்படவில்லை என்றும், விமானத்திற்கு எந்தச் சேதமும் ஏற்படவில்லை என்றும் அதிகாரிகள் தெரிவித்துள்ளனர்.
விமானியின் துரித நடவடிக்கை
பயணி கதவைத் திறந்த அடுத்த கணமே, எச்சரிக்கை ஒலியை உணர்ந்த விமானி, உடனடியாக விமானத்தை நிறுத்தினார். இது குறித்து விமான நிலையக் கட்டுப்பாட்டு அறைக்கும், பாதுகாப்பு அதிகாரிகளுக்கும் அவசரத் தகவல் தெரிவிக்கப்பட்டது. உடனடியாகச் சம்பவ இடத்திற்கு விரைந்த மத்திய தொழிலக பாதுகாப்புப் படை (CISF) வீரர்கள், கீழே குதித்த அந்தப் பயணியை மீட்டனர்.
காரணம் என்ன?
முதற்கட்ட விசாரணையில் அந்தப் பயணிக்கு உடல்நலக்குறைவு ஏற்பட்டிருக்கலாம் எனத் தெரிகிறது. விமானப் பயணத்தின் போது அவர் இரண்டு முறை வாந்தி எடுத்ததாகவும், தனக்கு உடல்நிலை சரியில்லை என்று சிப்பந்திகளிடம் கூறியதாகவும் தகவல்கள் தெரிவிக்கின்றன. உடல்நல பாதிப்பால் ஏற்பட்ட பதற்றத்தில் அவர் இத்தகைய விபரீத முடிவை எடுத்தாரா அல்லது வேறு ஏதேனும் காரணம் உள்ளதா என்பது குறித்து காவல்துறையினர் தீவிர விசாரணை நடத்தி வருகின்றனர்.
விமான நிலைய அதிகாரி ஒருவர் கூறுகையில், "விமானம் ஓடுபாதையை விட்டு விலகி டாக்ஸிவேயில் மெதுவாகச் சென்று கொண்டிருந்த போதுதான் இச்சம்பவம் நடந்தது. இதனால் உயிரிழப்போ அல்லது விமானத்திற்குப் பாதிப்போ ஏற்படவில்லை" என்றார்.
பாதுகாப்பு கெடுபிடிகள் மற்றும் தாமதம்
இந்தச் சம்பவத்தைத் தொடர்ந்து, முன்னெச்சரிக்கை நடவடிக்கையாக அதிகாலை 03:23 மணி முதல் 04:23 மணி வரை சென்னை விமான நிலையத்தின் பிரதான ஓடுபாதை மூடப்பட்டது. அந்த நேரத்தில் வந்த பிற விமானங்கள் மாற்று ஓடுபாதைக்குத் திருப்பி விடப்பட்டன. சுமார் ஒரு மணி நேரத்திற்குப் பிறகு விமான போக்குவரத்து இயல்பு நிலைக்குத் திரும்பியது.
தற்போது அந்தப் பயணி சென்னை காவல்துறையினரிடம் ஒப்படைக்கப்பட்டுள்ளார். அவர் தமிழ்நாட்டைச் சேர்ந்தவர் என்று அடையாளம் காணப்பட்டுள்ளது. சர்வதேச விமானப் போக்குவரத்து விதிகளின்படி, பாதுகாப்பை மீறியதற்காக அவர் மீது வழக்குப் பதிவு செய்யப்பட வாய்ப்புள்ளது.
பயணிகள் விமானத்தில் இருக்கும்போது அவசர காலக் கதவுகளை அத்துமீறித் திறப்பது தண்டனைக்குரிய குற்றமாகும். எனினும், அந்த நபரின் மனநிலை மற்றும் உடல்நிலை குறித்து மருத்துவப் பரிசோதனைகள் செய்த பிறகே அடுத்தகட்ட நடவடிக்கைகள் எடுக்கப்படும் என்று பாதுகாப்புத் துறை வட்டாரங்கள் தெரிவிக்கின்றன. இந்தச் சம்பவம் சென்னை விமான நிலையத்தில் சில மணி நேரம் பெரும் பரபரப்பை ஏற்படுத்தியது.
Click it and Unblock the Notifications
Sign in with Google