”எம்ஜிஆர் அதிமுக” புது கட்சி தொடங்கும் பண்ருட்டி ராமச்சந்திரன்? விஜய்யின் தவெகவுடன் கூட்டணியா?
சென்னை: ஓ பன்னீர் செல்வம் அணியில் உள்ள பண்ருட்டி ராமச்சந்திரன் எம்ஜிஆர் அதிமுக என்ற பெயரில் புதிய கட்சியை தொடங்க உள்ளதாக தகவல் வெளியாகி உள்ளது. மேலும் விஜய்யின் தமிழக வெற்றிக் கழகத்தோடு கூட்டணி வைத்து வரும் சட்டமன்ற தேர்தலில் போட்டியிடவும் முடிவு செய்துள்ளதாக தகவல் வெளியாகி உள்ளது.
அரசியல் ஜாம்பவனாக அறியப்படும் பண்ருட்டி ராமச்சந்திரன் எம்ஜிஆரின் தளபதிகளில் ஒருவராக திகழ்ந்தவர். பாமக, விஜயகாந்துடன் இணைந்து செயல்பட்ட அவர் தற்போது ஓ பன்னீர் செல்வத்தில் அதிமுக தொண்டர்கள் உரிமை மீட்பு குழுவில் ஆலோசகராக இருந்து வந்தார். ஆனால் ஓபன்னீர் செல்வத்தின் செயல்பாடுகள் சரியில்லை என்றும் தேர்தல் நெருங்கிவிட்ட சூழலில் யாருடன் கூட்டணி என்பதையும் தெளிவாக கூறாம் இருந்ததால் இந்த முடிவை அவர் எடுத்துள்ளதாகவும் கூறப்படுகிறது.
அண்ணா மீது கொண்ட ஈர்ப்பின் காரணமாக பொறியாளராக இருந்த பண்ருட்டி ராமச்சந்திரன் அரசியலுக்குள் வந்தார். திமுக தலைவரான கருணாநிதி அமைச்சரவையில் போக்குவரத்து துறை அமைச்சராக பதவி வகித்தார். பின்னர் எம்ஜிஆருடன் இணைந்து பணியாற்றினார். அமைச்சராகவும் பதவி வகித்தார். எம்ஜிஆர் இறந்த பிறகு ஜெயலலிதாவுடன் பயணித்த பண்ருட்டியார் பாமகவில் இணைந்தார்.
பின்னர் மக்கள் நல உரிமைக் கழகம் என்ற கட்சியை தொடங்கி திமுக கூட்டணியில் இணைந்தார். இதன் பிறகு விஜயகாந்த் கட்சி ஆரம்பித்தபோது அவருடன் இணைந்தார். அதிமுக தேமுதி கூட்டணியை முன்னின்று உருவாகினார். பின்னர் மீண்டும் ஜெயலலிதா முன்னிலையில் அதிமுகவில் இணைந்தார். பின்னர் பெரிய அளவில் அரசியலில் ஈடுபடாமல் இருந்து வந்த அவர் ஓ பன்னீர் செல்வம் அதிமுக தொண்டர் உரிமை மீட்பு குழுவை அமைத்த போது அதன் அரசியல் ஆலோசகராக பண்ருட்டி ராமச்சந்திரன் நியமிக்கப்பட்டார். இதையடுத்து அதிமுகவில் இருந்து நீக்கப்பட்டிருந்தார்.
இந்த நிலையில் தேர்தலுக்கு இன்னும் இரண்டு மாதங்களே இருக்கும் நிலையில் ஓ பன்னீர் செல்வம் எந்த ஒரு நடவடிக்கையும் எடுக்காமல் இருந்ததால் அதிருப்தி ஏற்பட்டு புதிய கட்சியை தொடங்க இருப்பதாக கூறப்படுகிறது. ஏற்கனவே ஓ பிஎஸ் ஆதரவாளரான மனோஜ் பாண்டியன், வைத்திலிங்கம் திமுகவில் இணைந்த நிலையில் பண்ருட்டி ராமச்சந்திரன் புதிய கட்சியை தொடங்க இருப்பதாக வெளியாகி இருக்கும் தகவல் பரபரப்பை ஏற்படுத்தி உள்ளது. மேலும் நடிகர் விஜய்யின் தவெகவுடன் கூட்டணி அமைக்கவும் அவர் திட்டமிட்டுள்ளதாக தகவல் வெளியாகி இருக்கிறது.
Click it and Unblock the Notifications
Sign in with Google