விடக்கூடாது.. மேற்கு மண்டலத்தில் இன்று வாக்குச்சாவடி முகவர்கள் கூட்டம்.. முதல்வர் ஸ்டாலின் பங்கேற்பு
சென்னை: வரும் நாடாளுமன்ற தேர்தலுக்கு தயாராகும் வகையில் திமுக மேற்கு மண்டல வாக்குச்சாவடி முகவர்கள் கூட்டம் இன்று திருப்பூரில் பிரமாண்டமாக நடக்கிறது. இதில் பல்லாயிரக்கணக்கானவர்கள் பங்கேற்ற உள்ள நிலையில் முதல்வர் ஸ்டாலின் பங்கேற்று அறிவுரைகளை வழங்க உள்ளார்.
அடுத்த ஆண்டு நாடாளுமன்ற தேர்தல் நடைபெற உள்ளது. இதில் தமிழ்நாட்டில் உள்ள 39 தொகுதிகள், புதுச்சேரியில் உள்ள ஒரு தொகுதி என 40 இடங்களிலும் திமுக கூட்டணி வெற்றி பெற திட்டமிட்டுள்ளது. இதற்கான பணிகளை திமுக தொடங்கி செய்து வருகிறது.
அந்த வகையில் வாக்குச்சாவடி முகவர்கள் கூட்டங்களை திமுக பிரமாண்டமாக நடத்தி வருகிறது. இந்த கூட்டங்கள் மண்டல வாரியாக நடத்தப்பட்டு வருகிறது. ஒவ்வொரு தேர்தலிலும் வாக்குச்சாவடி முகவர்கள் மிகவும் முக்கியமானவர்கள் என்பதால் இந்த கூட்டங்களை திமுக பிரமாண்டமாக நடத்தி அறிவுரைகளை வழங்கி வருகிறது.
அதன்படி டெல்டா மற்றும் மத்திய மாவட்டங்களுக்கான வாக்குச்சாவடி முகவர்களின் கூட்டம் திருச்சியில் நடந்து முடிந்தது. அதன்பிறகு தெற்கு மாவட்டங்களுக்கான வாக்குச்சாவடி முகவர்களின் ஆலோசனை கூட்டம் ராமநாதபுரத்தில் நடந்து முடிந்தது. இந்த 2 கூட்டங்களிலும் முதல்வர் ஸ்டாலின் பங்கேற்று பேசினார்.
வரும் நாடாளுமன்ற தேர்தல் எவ்வளவு முக்கியம். வாக்குச்சாவடி முகவர்கள் எப்படி செயல்பட வேண்டும். சமூக வலைதள பயன்பாட்டின் முக்கியத்துவம் குறித்து முதல்வர் ஸ்டாலின் எடுத்துரைத்தார். அதேபோல் திமுகவின் திட்டங்களை பொதுமக்களிடம் கொண்டு சேர்க்க வேண்டும் என அவர் வலியுறுத்தினார்.
இந்நிலையில் தான் திமுக. மேற்கு மண்டல வாக்குச்சாவடி நிலை முகவர்கள் கூட்டம் இன்று நடைபெற உள்ளது. திருப்பூர் மாவட்டம் காங்கேயம் அருகே படியூர் தொட்டிப்பாளையத்தில் இந்த ஆலோசனை கூட்டம் நடைபெற உள்ளது. இதில் மேற்கு மண்டலத்தில் உள்ள 50 சட்டசபை தொகுதிகளில் உள்ள வாக்குச்சாவடி நிலை முகவர்கள் 14 ஆயிரத்துக்கும் அதிகமானவர்கள் பங்கேற்கிறார்கள்.
இதுதவிர ஏராளமான நிர்வாகிகள், தொண்டர்கள் கலந்து கொள்ள உள்ளனர். இதில் முதல்வர் ஸ்டாலின் பங்கேற்று பேச உள்ளார். இதையடுத்து விழா ஏற்பாடுகள் தீவிரமாக செய்யப்பட்டுள்ளது. சுமார் 40 ஏக்கரில் விழா ஏற்பாடு செய்யப்பட்டுள்ளது. பிரமாண்டமான மேடையும் அமைக்கப்பட்டுள்ளது என்பது குறிப்பிடத்தக்கது.
Click it and Unblock the Notifications
Sign in with Google