பட்டா டூ டிஜிட்டல் பாஸ்போர்ட்.. ரியல் எஸ்டேட்டை தலைகீழாக மாற்றப்போகும் சென்னை CMDA-வின் திட்டம் என்ன

சென்னை: வருவாய்த்துறை, பதிவுத்துறை, தமிழ்நிலம், மின்சார வாரியம், சென்னை குடிநீர் வாரியம், மாசுக்கட்டுப்பாட்டு வாரியம், RERA உள்ளிட்ட 20-க்கும் மேற்பட்ட அரசுத் துறைகளை API Integration தொழில்நுட்பம் மூலம் CMDA இணையதளத்துடன் கட்டாயமாக இணைக்க வேண்டும் என்று அகில இந்திய ரியல் எஸ்டேட் கூட்டமைப்பான பெயிரா கேட்டுக் கொண்டுள்ளது

தமிழ்நாட்டின் நகர்ப்புற வளர்ச்சி மற்றும் கட்டுமானத் துறையை சர்வதேச தரத்திற்கு உயர்த்தும் நோக்கில், சென்னை பெருநகர வளர்ச்சிக் குழுமம் (CMDA) ஏற்பாடு செய்திருந்த ஆன்லைன் திட்ட அனுமதி தொடர்பான முக்கிய பங்குதாரர்கள் ஆலோசனைக் கூட்டம் சென்னையில் இன்று நடைபெற்றது.

தமிழகத்தின் ரியல் எஸ்டேட் முதலீடுகள் மற்றும் குடிமக்கள் சேவைகளை அடுத்த கட்டத்திற்கு கொண்டு செல்வதை நோக்கமாகக் கொண்டு நடத்தப்பட்ட இந்த கூட்டத்தில், கட்டுமானத்துறை சார்ந்த பல்வேறு முக்கியப் புள்ளிகள் கலந்துகொண்டனர்.

சொத்து ஆவணங்கள்

இதில் அகில இந்திய ரியல் எஸ்டேட் கூட்டமைப்பின் (FAIRA) நிறுவனரும் தேசியத் தலைவருமான டாக்டர் ஆ. ஹென்றி கலந்துகொண்டு முன்வைத்த அதிரடியான மற்றும் தொலைநோக்கு பார்வை கொண்ட சீர்திருத்தப் பரிந்துரைகள் ஒட்டுமொத்த அரங்கையும் திரும்பிப் பார்க்க வைத்துள்ளதுடன், பெரும் பரபரப்பையும் ஏற்படுத்தியுள்ளது.

தற்போது தமிழகத்தில் ஒரு சாமானிய குடிமகன் வீடு கட்டவோ, தொழில்முனைவோர் வணிக வளாகங்கள் மற்றும் தொழிற்சாலைகள் அமைக்கவோ திட்டமிட்டால், அதற்கான அனுமதியைப் பெறுவதற்குள் பல்வேறு அரசு அலுவலகங்களின் வாசல்களில் மாதக்கணக்கில் தவம் கிடக்க வேண்டிய அவல நிலை நீடித்து வருகிறது.

ஒரே சொத்து தொடர்பான ஆவணங்கள் மற்றும் தரவுகள் வருவாய்த்துறை, பதிவுத்துறை, உள்ளாட்சி அமைப்புகள் என வெவ்வேறு துறைகளில் சிதறிக்கிடப்பதால், கடுமையான காலதாமதமும் நிர்வாகச் சிக்கல்களும் ஏற்படுகின்றன. இதுமட்டுமன்றி, முரண்பட்ட தரவுகளால் தேவையற்ற அலைச்சல்களும், பெரும் பண விரயமும் ஏற்பட்டு, இறுதியில் அது ஊழலுக்கே வழிவகுக்கிறது என்பதை டாக்டர் ஆ. ஹென்றி ஆதாரங்களுடன் சுட்டிக்காட்டினார்.

ஒரே சொத்து - ஒரே தரவு - ஒரே அனுமதி

இந்த ஒட்டுமொத்தப் பிரச்சினைகளுக்கும் முற்றுப்புள்ளி வைக்க வேண்டுமானால், "ஒரே சொத்து - ஒரே தரவு - ஒரே அனுமதி" என்ற புதிய நிர்வாக தத்துவத்தை தமிழக அரசு கையில் எடுக்க வேண்டும் என்று அவர் முழங்கினார்.

டிஜிட்டல் இந்தியா மற்றும் செயற்கை நுண்ணறிவு (AI) தொழில்நுட்பங்கள் வேகமாக வளர்ந்து வரும் இந்த காலகட்டத்தில், 'One Nation - One Property - One Approval System' என்ற தேசிய அளவிலான அதிநவீன நிர்வாக மாதிரிக்கு தமிழ்நாடுதான் முன்னோடியாகத் திகழ வேண்டும் என்றும், இதற்காக வருவாய்த்துறை, தமிழ்நிலம், மின்சார வாரியம், சென்னை குடிநீர் வாரியம், தீயணைப்புத்துறை, மாசுக்கட்டுப்பாட்டு வாரியம், மற்றும் RERA உள்ளிட்ட 20-க்கும் மேற்பட்ட அரசுத் துறைகளை CMDA இணையதளத்துடன் 'API Integration' தொழில்நுட்பம் மூலம் உடனடியாக ஒரே தளத்தில் கட்டாயமாக இணைக்க வேண்டும் என்றும் கேட்டுக்கொண்டார்.

நிலத்தின் சர்வே எண்

மேலும், சிங்கப்பூர் மற்றும் துபாய் போன்ற உலக நாடுகளுக்கு இணையான 'Auto-NOC' மற்றும் செயற்கை நுண்ணறிவு (AI) மூலமான கட்டிட வரைபடப் பரிசோதனை முறைகளை முன்மொழிந்த டாக்டர் ஹென்றி, இதன் மூலம், ஒருவர் தனது நிலத்தின் சர்வே எண்ணைப் பதிவிட்ட உடனே, அது நீர்நிலைப் பகுதியா, கடலோர ஒழுங்குமுறை மண்டலமா அல்லது விமான நிலையப் பாதுகாப்புப் பகுதியா என்பது தானாகவே சரிபார்க்கப்பட்டு, சிக்கல் இல்லாத நிலங்களுக்கு சில நிமிடங்களில் உடனடி அனுமதி (Instant Clearance) வழங்கப்பட வேண்டும் என்றார்.

அதேபோல், சிறிய வீடுகள் கட்டுவோருக்கு தெலுங்கானா மாநிலத்தின் 'TS-bPASS' மாதிரியைப் போல சுய சான்றளிப்பு (Self Certification) முறையில் உடனே அனுமதி வழங்கலாம் என்றும், அதிகாரிகள் குறிப்பிட்ட காலக்கெடுவுக்குள் கோப்புகளை நகர்த்தாவிட்டால் சட்டப்படி "Deemed Approval" எனப்படும் தானியங்கி அனுமதி வழங்கப்பட வேண்டும் என்றும் அதிரடி காட்டினார்.

ஒவ்வொரு நிலத்திற்கும் பட்டா, சிட்டா

ஒவ்வொரு நிலத்திற்கும் பட்டா, சிட்டா முதல் மின் இணைப்பு வரை அனைத்தும் அடங்கிய 'சொத்து டிஜிட்டல் பாஸ்போர்ட்' மற்றும் பொதுமக்கள் தங்கள் கோப்புகளின் நிலவரத்தை நேரடியாகக் கண்காணிக்கும் 'Citizen Dashboard' வசதியையும் அவர் கோரினார்.

இந்த புரட்சிகரமான மாற்றங்கள் CMDA தளத்தை வெறும் விண்ணப்பப் பதிவேற்ற இடமாக இல்லாமல், ஒரு நவீன டிஜிட்டல் சுற்றுச்சூழல் அமைப்பாக மாற்றும் என்றும், இதன் மூலம் ஊழலற்ற, முதலீட்டாளர்களுக்கு உகந்த ஒரு புதிய தமிழ்நாடு 2050-க்குள் உருவாகும் என்றும் டாக்டர் ஆ. ஹென்றி நம்பிக்கை தெரிவித்தார்.

English summary

Patta to Digital Passport: The Ultimate Chennai CMDA Master Plan Set to Revolutionize Tamil Nadu Real Estate!