மக்களே MP தேர்தலில் தேமுதிகவுக்கு ஆதரவு கொடுங்க! விஜயகாந்தின் பிரச்சார முழக்கம்! கட்சியினர் உற்சாகம்

சென்னை: உடல்நலிவு காரணமாக வீட்டில் ஓய்வெடுத்து வரும் தேமுதிக தலைவர் விஜயகாந்த், 2024 நாடாளுமன்றத் தேர்தலுக்கான முதல் பிரச்சார முழக்கத்தை அறிக்கை வாயிலாக வெளியிட்டுள்ளார்.

தமிழக மக்கள் தங்கள் நல்ஆதரவையும், ஒத்துழைப்பையும் வருகின்ற பாராளுமன்ற தேர்தலில் தேமுதிகவுக்கு வழங்கிட வேண்டுமென கேட்டுக்கொள்வதாக தெரிவித்துள்ளார். இது போதும் தலைவா என கேப்டன் விஜயகாந்தை அவரது கட்சியினரும், ரசிகர்களும் கொண்டாடி வருகின்றனர்.

இதனிடையே தேமுதிக சார்பில் தமிழக மக்களுக்கு என்னென்ன நலத்திட்டங்கள் செய்யப்பட்டுள்ளது என்பதை அவர் பட்டியல் போட்டுள்ளார். அதன் விவரம் வருமாறு;

கடந்த காலங்களில் முதியோர் இல்லங்களுக்கு தலா 1 லட்சம் ரூபாய் வீதம் தமிழ்நாட்டின் அனைத்து மாவட்டங்களுக்கும் 32 லட்சம் ரூபாய் வழங்கப்பட்டுள்ளது. ஈரோடு மற்றும் திருப்பூர் மாவட்டங்களில் 2 கோடியே 75 லட்சம் ரூபாய் மதிப்புள்ள வீட்டு மனை நிலங்கள் இலவசமாகவும், காஞ்சிபுரம் மாவட்டம் மாமண்டூரில் 20 லட்சம் ரூபாய் மதிப்பில் இலவச திருமண மண்டபமும் கட்டிக்கொடுகப்பட்டுள்ளது.

பெண் சிசுக் கொலையை தடுத்திட "பெண்கள் நாட்டின் கண்கள்" என்ற திட்டத்தின் மூலம் சுமார் 500 பெண் குழந்தைகளுக்கு அவர்களின் திருமண வயதில் தலா இரண்டு லட்சம் ரூபாய் கிடைக்கும் வகையில் 50 லட்சம் ரூபாய் வைப்பு நிதியாகவும், லட்சக்கணக்கான மாணவ, மாணவியர் பயன்பெறும் வகையில் 1 கோடியே 50 லட்சம் ரூபாய் மதிப்பில் தமிழகத்தில் 60 இடங்களில், 600 கணினிகள் கொண்ட கேப்டன் இலவச கணினி பயிற்சி மையமும் வழங்கி வருகிறோம்.

தமிழ்நாடு முழுவதும் உள்ள மாற்றுத்திறனாளிகளில் சுமார் 100 பேரை தேர்வு செய்து, அவர்களுக்கு பயன்படும் வகையில் மாவட்ட நிர்வாகிகள் மற்றும் தொண்டர்களின் ஆதரவுடன் சுமார் 65 லட்சம் ரூபாய் மதிப்பிலான நான்கு சக்கரம் பொருத்திய மோட்டார் சைக்கிள் (TVS Scooty) வாகனங்களையும், தமிழகம் முழுவதும் வறுமை நிலையில் உள்ள சுமார் ஆயிரம் (1000) நலிவுற்ற குடும்பங்களை தேர்வு செய்து ஒவ்வொரு குடும்பத்திற்கும் தலா பத்தாயிரம் (10,000) வீதம் சுமார் ஒருகோடி ரூபாயும் வழங்கி உள்ளோம்.

அதே நேரத்தில் தமிழக மக்கள் தங்கள் நல்ஆதரவையும், ஒத்துழைப்பையும் வருகின்ற பாராளுமன்ற தேர்தலில் தொடர்ந்து வழங்கிட வேண்டுமென கேட்டுக்கொள்கிறேன்.

English summary

DMDK leader Vijayakanth, who is resting at home due to ill health, has released the first campaign slogan for the 2024 parliamentary elections through a statement.